2 Yelebiŋ'a 9

1Sheba teŋa pɔka n de naba la n ta wom Naba Solomon paŋa la yele la, a ihege mɛ wa'an Yerusalem na la sɔgɔha n kpe'em, te a magahɛ Naba Solomon behɛ. Te a wa'ana kɛn' Yerusalem la paŋa, ge te yogoma ziira nyɛga la sanlema zo'e zo'e la sanlenkuga. N wa'ana paɛ Naba Solomon la, a sɔnhɛ sɛla woo n boe a suunren mɛ bo Naba Solomon. 2Te Naba Solomon lerege a sɔgɔha la woo. A sokere ka gee kpe'em te a ka lerege bo en. 3Sheba teŋa pɔgɔnaba wa n nyɛ Solomon yam la, naba yire la te a mɛ' la, 4dise'ehe n ze'ete a dia tebole zuo, a tontoneba la n zin'ite se'em, a kpɛ'ɛndoma n yɛɛre fuseto, a yamehe se'ehe n bo'ore dia n yɛɛre fuseto, la kura se'a te Naba Solomon dɔla bilam kɛn'ɛra Na'ayenɛ Yire la poan la, a maam mɛ. 5Te a yele naba wa yeti, Mam n boe n teŋa ha ge wom ho yele n ane se'em, te ho yam ana se'em la seren dela sera. 6Ge, aai, mam daa ka sakɛ bo ban yeti sɛla la han dagana mam wa'ana te mam mɛŋa nini nyɛ wa. Behɛ, ban yele mam sɛla la dela ho yam la porogerɛ ma'an. Ho gaŋɛ mam wom ho yele se'em la mɛ. 7Ho pɛɛntɛɛnreba la dela zusoŋɔdoma, ho yamehe se'ehe n tone ho nɛŋan saŋa woo ge wuna ho yam yelehom wa dela zusoŋɔdoma. 8Pɛnka dɛna Na'ayenɛ ho Yenɛ la denɛ, la a suunre n kɛn' hɔ te a loe ho zin'ire a na'am gɔŋɔ wa zuo te ho sɔe behera bɔ'ɔra Na'ayenɛ ho Yenɛ la. Yenɛ n nɔŋɛ Israel ge sɛ ba ze'ele te ba ka tara ba'ahegɔ la zuo te a loe hom te ho dɛna naba behera ba, ge tona yelemɛŋɛrɛ la tontɔɔ. 9Ge a nya bo naba la sanlema bɔɔrehe kɔbega la pihiyi' la nyɛga kekeko la sanlenkuga. Nyɛga se'a taaba te Sheba teŋa pɔgɔnaba wa bo Naba Solomon la taaba makerɛ ka boe. 10Hiram yamehe la Solomon yamehe la tare la sanlema ze'ele Opir teŋa me na la tisoma dɔɔsonɔ la sanlenkuga. 11Te naba la bahɛ te ba dekɛ dɔɔrɔ la maalɛ Na'ayenɛ Yire la kura, la na'am yire la kura, ge dekɛ tɔ maalɛ taletehe la kɔnlɔ, bo yoonyooneba la. Lɔgɔtona wa taaba ka tabelɛ bɔna Yuda teŋa la poan. 12Te Naba Solomon bo Sheba teŋa pɔgɔnaba wa a sunboolom n de sɛla, te la gaŋɛ enŋa n tare sɛla na bo Naba Solomon la. Te enŋa la a yamehe lebe kule. 13Sanlema se'a te Naba Solomon tɔ'ɔha yuunɛ deyena ma'an poan tebehom dela sanlema bɔɔrehe kɔbehe seyoobe la pihiyoobe la ayoobe, 14te sanlema se'a te leebedoma, kɔɔhereba tara kena na, te Arabia teŋa teŋbehereba n tara sanlema la sanlenpeelega se'a kena na la ka pa'ahɛ. 15Te Naba Solomon bahɛ te ba dekɛ sanlema ŋmɛ' kure zaba te'elehe kɔbehe seyi', sanlema kpila kɔbehe seyoobe n dekɛ kure zaba te'elega kayena woo. 16Ge me maalɛ zaba te'elehe bibihe kɔbehe setan', dekɛ sanlema kpila kɔbehe setan' tebehe maalɛ te'elega kayena woo. Te Naba wa dekɛ ba biŋe Lebanon Tiihe Yire poan. 17Te naba wa bahɛ te ba dekɛ wɔbɔgɔ nyɛna maalɛ na'am koka kantɛ, takɛ ka la sanlema. 18Te kura ayoobe n dɔla zɔna na'am koka wa zuo, ge kure sanlema koka bila te kaŋa dɛna na'tagelega ta' la na'am koka wa, ge maalɛ nu'uhe pagalegɔ zen'an ka kenkɛlehe seyi' la poan, ge maalɛ gbegema ayi' te deyena deyena zɛ'a lɛm nu'uhe pagalegɔ zen'enhe la. 19Te gbegema pia la ayi' la yaga kura ayoobe la nɔgbenɛ woo zuo, gbegema ayi' ayi' kute deyena deyena woo zuo. Ba ka tabelɛ maalɛ sɛla bala bo sɔ'ɔlom sebo na'am. 20Naba Solomon lɔgɔseto woo n tare nyuura ko'om dela sanlema te ba dekɛ maalɛ, te a yire la te ba dekɛ Lebanon teŋa dɔɔrɔ ma'an maalɛ la lɔgɔrɔ zan'an dɛna sanlema. Sanlema peelega lɔkɔ ka pa'ahɛ Naba Solomon yire lɔgɔrɔ la poan. Sanlema peelega ka tare tebehom Naba Solomon saŋa la. 21Naba wa mɛŋa tare ɔɔnrɔnɔ mɛ te to kena Tarsis teŋa la Hiram yamehe la boyena yuuma atan' woo poan. To han lɛbera na, to ne ziira la sanlema, la sanlenpeelega, la wɔbɔgɔ nyɛna, la ŋmaaŋkpara, la niŋkanra. 22Te Naba Solomon dɛna nakantɛ gana teŋparɛ wa zuo nadoma zan'an, tarega la yam poan. 23Teŋparɛ wa zuo nadoma zan'an kene la Solomon zen'en na te ba wom a yam la te Yenɛ dekɛ eŋɛ a suunren la. 24Ba woo n kene na la, ba tare la ba bo'olom ba bo'olom te bo dɛna sanlenpeelega la sanlema la futo la zaberɛ lɔgɔrɔ la tiihe biila la yiri la yiribonhe kekeko yuunɛ woo. 25Naba Solomon ta tara la yiri la i toroto gɔtɔ tuha anaahe, yiri ban'areba tuha pia la ayi', te a loohe ba bahɛ a yiri toroto teŋhe la poan la Yerusalem poan te ba bɔna la naba wa. 26Enŋa ma'an n de naba sɔna nadoma zan'an behera, ze'ele Euprates Kolaa la ta ta' Pilistidoma, keŋɛ zaan ta beem la Mizraim teŋa. 27Te naba wa bahɛ te sanlema peela buge Yerusalem wo kuga la, te dɔɔ mɔlɔsomɔ buge wo kenkanhe dɔɔrɔ n buge bɔn'ɔn poan se'em la. 28Te ba tara yiri zɛ'ɛta Mizraim teŋa, la teŋhe wa zan'an poan kena na bɔ'ɔra Naba Solomon. 29Naba Solomon toonse'a n gee la, a pɔhega la a ba'ahegɔ golehɛ eŋɛ la nɔtɔgɔha Natan yɛla gɔŋɔ la poan, la Silo buuri nɛra Ahiya porega yɛla la poan, la liligere se'ere n lilige pa'alɛ Ido n de behera la doohe Nebat dayɔa Yeroboam yɛla la poan. 30Naba Solomon zin'ire a na'am gɔŋɔ zuo la yuuma pihinaahe Yerusalem poan, behera Israel zan'an. 31Te Solomon kule paɛ a sɔdoma, te ba pin' en a sɔ David teŋa la poan, te a dayɔa Arehoboam sɔe a na'arɛ dɛna naba.

will be added

X\