2 Yelebiŋ'a 8

1Yuuma pihiyi' la ba'ahegɔ poan, yuunɛ se'ere te Naba Solomon mɛ yire bo Na'ayenɛ la a mɛŋa yire, 2te Naba Solomon malom mɛ teŋkanra se'a te Hiram yehe se a teŋa bo en la ba'ahɛ, bahɛ te Israeldoma ta kɛn'ɛra se poan. 3Te Solomon tɛn' pɛɛma la Hamat Zoba nyaŋɛ ba. 4Solomon n mɛ Tadmor teŋa n boe pɔgɔtia poan la, la lɔgɔrɔ biŋere teŋse'ehe woo te a sɔna Hamat teŋa la. 5Ge me mɛ zuin Bet Horon la teŋeren Bet Horon, mɛ dangoone kae se kɛn'ɛhɛ se kuto nayahe. 6Ge mɛ' Baalat teŋa la lɔgɔrɔ teŋse'ehe woo te a sɔna la a yiri toroto teŋhe la a yiri ban'areba teŋhe la sɛla woo te Naba Solomon suunre bɔta te a mɛ' Yerusalem poan la Lebanon teŋa la teŋse'ehe woo te a sɔna behera la poan a mɛ' mɛ. 7Nɛresɛba n yee Hitidoma la Amoridoma la Perizdoma la Hivdoma la Yebus doma poan dagɛ Israeldoma la, 8bama n bahɛ ba yaahe se'ehe pooren te ba bɔna ba teŋhe la poan te Israel buuri la ka ko ba la, Naba Solomon lagahɛ la bama te ba tona toonkpɛ'ɛma bɔ'ɔra Israeldoma la la zina wa. 9Ge Naba Solomon ka dekɛ Israel nɛra te a dɛna da'aberɛ tona. Bama dela pɛɛntɛɛnreba la a zabzabereba nɛŋadoma la a yiri toroto la sɛba n tukure a yiri toroto nɛŋadoma. 10Bana n de Naba Solomon kpɛ'ɛndoma la nɛŋadoma, te ba kanlɛ dɛna kɔbehe seyi' la pihinuu, sɔna nɛreba la behera. 11Te Naba Solomon bahɛ te ba tare a pɔgɔsɛka n de Faro pɔyɔa la ze'ele naba David Teŋa la poan na kɛn'ɛhɛ yire la te a mɛ bo ka la poan. Se'ere n sɔe la, Naba Solomon yeti, Mam pɔga wa ka nare ka kɛn'ɛra Israel naba David yire wa poan. Se'ere n sɔe la Na'ayenɛ nɔbiŋere daka la n kɛn' zen'se'ehe woo, se dela toolom zen'enhe. 12Te Naba Solomon kaanbɛ nyɔ'an bo'olom bo Na'ayenɛ, kaanbegɔ daka la te a mɛ zenzaka la poan bo Na'ayenɛ la poan. 13A kaanbere dɔla la daarɛ woo kaanbegɔ la n dole se'em la, kaanbere dɔla la Moses n bo nɔse'a doohe Vo'ohogo Dabeha la ŋmarepaalega de'enɔ la yuunɛ woo de'enɔ totan': Boroboro N Ka Tare Mi'ihom De'eŋɔ la Dabeha Ayopɔe De'eŋɔ la Pagahe Tin'a De'eŋɔ. 14Doohe la a sɔ naba David n pa'alɛ se'em biŋe la, a yelehe mɛ te malemadoma kaanbegɔ tooma la, te Levidoma la sɔna pɛnka la tooma, ge soŋora malemadoma la ba daarɛ woo tooma la poan, ge tɔnrɛ nayaŋguruba la me ba nayahe. Yenɛ nɛra naba David n bo nɔdenɛ. 15Ba se'em ka gbelege naba la n bo nɔse'ere la sɔrɔɔ seko poan. Ze'ele malemadoma ta paɛ Levidoma la, bii ba gbelege nɔse'ere n biŋe bo lɔgɔrɔ biŋere deto la. 16Naba Solomon toonɛ wa n pɔhɛ se'em bala, pɔhɛ Na'ayenɛ Yire la ɛɛnbegɔ poan ta paɛ de ba'ahegɔ. Na'ayenɛ Yire la n mɛ ba'ahɛ se'em na bala. 17Te Solomon keŋɛ Ezion Geber la Elat n boe Edom ko'kantɛ nɔɔrɛn la. 18Te Hiram bahɛ te a yamehe tona, yamehe se'ehe n mi' ko'om te se tara ɔɔnrɔnɔ na doohe la Naba Solomon yamehe keŋɛ Opir teŋa ta to'e sanlema bɔɔrehe kɔbehe senaahe la pihinuu na bo Naba Solomon.

will be added

X\