2 Yelebiŋ'a 7

1Naba Solomon n sohɛ wana ba'ahɛ la, bugum n ze'ele saazuo lu' nyɔ'an bo'olom la la kaanbegɔ lɔgɔrɔ la woo zuo di' to zan'an te Na'ayenɛ paŋa perɛ Yenɛ yire la poan zan'an. 2Te malemadoma la koŋe ba kɛn' Na'ayenɛ Yire la poan. Se'ere n sɔe la, Na'ayenɛ paŋa n to'e yire la zan'an. 3Israel buuri la zan'an n ze' bini ge nyɛ bugum la n ze'ele saazuo na la, ge nyɛ Na'ayenɛ paŋa la n perɛ yire la poan na se'em la, te ba woo dekɛ ba nɛhe kpanbɛ teŋa zenzaka la poan ge pɛngɛ Na'ayenɛ yeti, Yelemɛŋɛrɛ, Na'ayenɛ ane soŋa, a zo'ohogɔ ka tare ba'ahegɔ. 4Te Naba wa la nɛreba la zan'an kaanbɛ kaanbegɔ bo Na'ayenɛ. 5Naba Solomon kaanbɛ la lɔlehe tuha pihiyi' la ayi', piihe tuha kɔbega la pihiyi'. Naba la, la nɛreba la n yu'ɛ Yenɛ yire la se'em n bala. 6Te malemadoma la ze'ele ba ze'elego zen'an, la Levidoma la n zanle yooma lɔgɔrɔ seto te Naba David yuun maale pɛngera ge bɔ'ɔra Na'ayenɛ faanra la yeti, Yenɛ zo'ohogɔ la ka tare ba'ahegɔ la zuo la. Te malemadoma la n ze' Levidoma pooren la nya pɛɛbera tentana la, ge te Israeldoma po ze'a bini. 7Te Naba Solomon miihe zenzaka la teŋasoka n gan' Na'ayenɛ Yire la nɛŋan la te bilam dɛna toolom zen'an te a nyɔ' nyɔ'an bo'olom la kaam la, sunma'ahom bo'olom la. Se'ere n sɔe la nyɔ'an bo'olom la boom bo'olom la kaam la zan'an ka nyaŋɛ kɛn' nyɔgom kaanbegɔ daka la te Naba Solomon kure la la poan. 8Te Solomon de'em de'eŋɔ kona wa dabeha ayopɔe te Israel nɛreba lagahɛ na, dɛna nɛrekooŋɔ. Basɛba ze'ele la Hamat teŋa nɔɔrɛn na, ta' sɛba n boe Mizraim bɔka la na. 9Dabeha anii daarɛ te ba lagahɛ zin'ire bo kaanbegɔ daka la ma'an, de'eŋ daka la me ma'an dabeha ayopɔe. 10Ŋmarehe seyopɔe la poan, ka dabeha pihiyi' la tan' daarɛ te Naba Solomon keehe nɛreba la zan'an te ba lɛbera kula ba yiya ge nyeena te ba poorɛ pee la som sebo te Na'ayenɛ dekɛ doohe Naba David la Naba Solomon la a Israel nɛreba zan'an n de a nɛreba la. 11Te Naba Solomon ba'ahɛ Na'ayenɛ Yire la, la na'am yire la, nyaŋɛ eŋɛ n lo' a suunre poan te a eŋɛ yelese'a woo Yenɛ yire la la a mɛŋa yire la poan la ba'ahɛ. 12Te Na'ayenɛ ta lilige a mɛŋa pa'alɛ Solomon yu'uŋɔ, ge yele en yeti, Mam wom ho sohoga la, ge loe zen'kana wa bo n mɛŋa te de dɛna mam kaanbegɔ yire. 13Mam han yu' saazuo te saa da ni, bii n tom la tenta'aba na te ba sagom teŋa wa, bii n tom la too bahɛ n nɛreba wa zuo na, 14te mam nɛreba wa te ba segɛ ba mam yu'urɛ wa han sigehe ba mɛhe, ge sohɛ ge ɛ mam, ge yehe ba mɛhe ba toonfɛn'ɛha la poan n wan bɔna n saazuo wa ha ke kelehe ba, ge di suguru bo ba tuure la ge tebɛ ba teŋa la. 15Nananawa, mam nini wan gan'an yire wa zuo, te n toba ana kɛle kɛleha sohoga sɛka woo n wan ze'ete zen'kana wa poan na. 16Mam loe ge yehe yire dena wa mɛ te n yu'urɛ wan pota de poan saŋa woo, te n nini la n suunre bɔna de poan saŋa woo. 17Ge han dɛna hom, ho han dɔla mam wo ho sɔ David n daa dole se'em la, ge eta mam wan bɔ'ɔra ho nɔɔrɛ se'em la, ge dɔla mam malema la n nɔze'elego la. 18N wan sɛ ho na'am wa wo mam yuun biŋe nɔɔrɛ la ho sɔ David se'em yeti, a kan malom koŋɛ nɛra te a zin'ire a na'am gɔŋɔ la zuo behera Israel wa la. 19Ge ho han ta bire poore, zagahɛ mam malema la mam nɔse'a te mam bo ho la, ge keŋɛ ta kaanbera yena a se'a ge na'ahera ba, 20n wan vooɛ hɔ n teŋa wa te n dekɛ bo ho wa poan bahɛ, ge vooɛ yire se'ere te mam loe te n yu'urɛ pota de poan wa n nɛŋan bahɛ, ge bahɛ te de lebege yetɔgɔbiŋire la toorɛ zen'an bo nɛreba. 21Ge han dɛna yire se'ere n nyɛ yu'urɛ kantɛ wa, la wan eŋɛ nɛra woo n dole tɔla pakerɛ te ba yɛta yeti, Wane te Na'ayenɛ eŋɛ teŋa wa la yire wa wana? 22Nɛreba wan lerege yeti, ba zagahɛ la ba Na'ayenɛ n de ba sɔdoma Yenɛ tare ba ze'ele Mizraim teŋa yehe na, ge ton to'ohe yena a se'a kaanbera ge na'aha a. Bala zuo te ba Yenɛ la bahɛ te nɔyalegerɛ dena sige ba zuo.

will be added

X\