2 Yelebiŋ'a 5

1Lɔgɔseto woo te Naba Solomon maahom te a maalɛ bo Na'ayenɛ Yire la n ba'ahɛ se'em n bala, te Naba Solomon tare lɔgɔseto te a sɔ naba David yuun yehe biŋe bo Yenɛ yire la, sanlenpeelega, sanlema, la yire poan lɔgɔrɔ la zan'an na kɛn'ɛhɛ Yenɛ yire la poan. 2Te Naba Solomon lagahɛ Israel kema, yizuto keendoma la yiredaandoma zan'an Yerusalem poan na, te ba tare nɔbiŋere daka la n de Na'ayenɛ nɔbiŋere bɔna la ba la ze'ele Naba David teŋa la n de Zion la wa'ana. 3Te Israel zan'an lagahɛ naba wa zen'an, ŋmarehe seyopɔe de'eŋɔ saŋa la poan. 4Israel kema la zan'an han paɛ na, Levidoma la nya ɔnbegɛ nɔbiŋere daka la. 5Te malemadoma la Levidoma la ɔnbegɛ nɔbiŋere daka la Yenɛ Sogorɛ la toolom lɔgɔseto woo n boe ko poan la tare na. 6Te Naba Solomon, la Israel nɛreba la zan'an n boe la en nɔbiŋere daka la nɛŋan la, kaanbera piihe la nii te la zo'e gaŋɛ kan ta'an kaanlɛ. 7Te malemadoma la tare nɔbiŋere daka la wa'an ka ze'elego zen'an, Yenɛ yire Saraa la poan, kelompagehedoma la kelompagehe la teŋa zen'an en ba' dɛna toolom zen'an la. 8Kelompagehedoma wa kelompagehe la yeregɛ mɛ lile nɔbiŋere daka la la dɔɔsaala seto n tare ziira ka la. 9Dɔɔsaala wa ba' wɔgɛ mɛ zuo, te ho han bɔna bɔ'pooren la na to nyɛta mɛ na, han dagana bilam ma'an, to ka nyɛte na. To boe bini la zina wa. 10Sɛla sɛla ka boe nɔbiŋere daka la poan, han dagana kugulama ayi' poan la te Moses daa dekɛ a eŋɛ bini Horeb Zoore la poan ha la, zen'an te Na'ayenɛ yuum biŋe nɔɔrɛ la Israeldoma ban ze'ele Mizraim teŋa yehe na la. 11Te malemadoma la ze'ele toolom zen'an wa yehe na. Malemadoma la n boe zen'an la poan la zan'an pee ba mɛhe mɛ ka yelege se'em bahɛ. 12Te Levidoma yoonyooneba la, ta ta' la Asap la Heman la Yedutun la ba dayɔɔhe la ba sɔɔnrɔ bagɛ ba mɛhe la lɔgɔsonɔ, tara senyagahe, kɔnlɔ la duurenhe zɛ'a lebehe kaanbegɔ daka la pooren ha, te malemadoma kɔbega la pihiyi' bɔna ba poan pɛɛbera tentana. 13Te tentana la la bonŋmɛ'ɛladoma la lagom ŋmɛ'ɛra pɛngera ge bɔ'ɔra Na'ayenɛ fara. Te tentana la senyagahe la, la yooma lɔgɔrɔ la zan'an ŋmɛ'ɛra dɔla yooma la. Te ba yoona paŋa pɛngera Na'ayenɛ yeti, Yenɛ ane soŋa mɛ. A zo'ohogɔ ka tare ba'ahegɔ. Te saŋgbanɛ sige na perɛ Yenɛ yire la poan. 14Te malemadoma la ka nyaŋɛ ze'ele tom ba tooma. Se'ere n sɔe la Na'ayenɛ paŋa n wa'ana to'e Yenɛ yire la zan'an.

will be added

X\