2 Yelebiŋ'a 35

1Te Yosia de'em Azootole De'eŋɔ la bo Na'ayenɛ Yerusalem poan, te ba ko Azootole dunhe la yuunɛ pɔhega ŋmarega la dabeha pia la anaahe daarɛ. 2Te a loohe malemadoma la bahɛ ba tooma zen'enhe Yenɛ yire la poan, ge tɔgɛ kpemehe ba doohe ba tooma Na'ayenɛ Yire la poan. 3Ge me yele Levidoma la n dole pa'ala nɛreba la, ge yelege ba mɛŋa ze'ele bo Na'ayenɛ la yeti, Dekɛ ya nɔbiŋere daka la ta ze'ele yire se'ere te naba David dayɔa Naba Solomon mɛ la poan, te ka da le dɛna ya ziira ka ya bɔgɔrɔ zuo. Nya tone ya bɔ'ɔra Na'ayenɛ ya Yenɛ la, la a nɛreba Israeldoma wa. 4Maahom ya mɛhe yire yire, yizuo yizuo, wo Israel naba David, la a dayɔa Israel naba Solomon n yuun golehɛ pa'alɛ se'em la. 5Tigihe ya taaba toolom zen'an wa poan te Levidoma ze'ele la yire woo nɛreba la n ze' ba zen'an ba zen'an la. 6Te ya nya kɔrom Azootole dunhe la. Maahom ya mɛhe, ge bahɛ te ya sɔɔnrɔ la me maahom bala mea wo Na'ayenɛ yelehom la te Moses pa'alɛ se'em la. 7Te naba Yosia mɛŋa bo lɔgɔrɔ te to dɛna nɛreba la zan'an n boe la Azootole kaanbegɔ lɔgɔrɔ. Lɔgɔrɔ la dela, piihe la boohe tuha pihitan', la nii tuha atan', te ba dekɛ kaanbɛ Azootole kaanbegɔ la. Lɔgɔtona yehe la naba la mɛŋa lɔgɔrɔ poan n bala. 8Te a kpɛ'ɛndoma la me bo ba popeelom bo'olom bo nɛreba la, la malemadoma la, la Levidoma la. Te Hilkia la Zekaria la Yehiel n de Yenɛ yire la kpɛ'ɛndoma la, yehe piihe tuha ayi' la kɔbehe seyoobe, ge yehe lɔlehe la me poan kɔbehe setan' bo malemadoma la te la dɛna a Azootole bo'olom. 9Konania me la Semaiah la Netanel la a sɔɔnrɔ la Hasabia la Yeiel la Yozabad; doma n de Levidoma nɛŋadoma la me lagahɛ piihe tuha anuu, lɔlehe kɔbehe senuu bo Levidoma la te la dɛna ba Azootole bo'olom. 10Ban maahom toonɛ la se'em n bala, te malemadoma la ze'ele ba ze'elego zen'enhe, te Levidoma la me ze'ele ba ze'elego zen'enhe wo naba la n bo a nɔɔrɛ se'em la. 11Te ba kɔrom Azootole dunhe la, te malemadoma la tɔ'ɔha ziim la Levidoma la nu'uhen miiha kaanbegɔ daka la, te Levidoma la me siira dunhe la. 12Te ba yehe nyɔ'an bo'olom la te ba dekɛ tɔnrɛ yizuto nɛreba la te ba dekɛ bo Na'ayenɛ wo lan golehɛ se'em Moses gɔŋɔ la poan. Eŋɛ lɔlehe la bala mea. 13Te ba sɛn' Azootole dunhe la wo malema n de se'em la, ge dogɛ toolom bo'olom la me dogorɔ la sara poohen tara bɔ'ɔra nɛreba la kalam kalam. 14Bilam n ba'ahɛ la, te ba nya dogɛ bo ba mɛhe mɛ la malemadoma la. Se'ere n sɔe la, Aron yaahe wa n de malemadoma la kɔn'ɔn yee la nyɔ'an bo'olom la bo kaam la nyɔ'an tara tara la yu'uŋɔ. Bala zuo te Levidoma wa dogɛ bo ba mɛhe, la Aron yaahe la n de malemadoma la. 15Yoon yooneba la n de Asap yaahe la me kɔ'ɔn zɛ'a la ba ze'elego zen'enhe wo naba David, Asap, Heman la Yedutun n behere bɔ'ɔra naba la n yuum pa'alɛ se'em la. Te sɛba n gure kolehe la ka bahɛ ba zen'enhe la ge keŋɛ zen'an. Se'ere n sɔe la, Levidoma dogɛ bo ba zan'an mɛ. 16Saŋkaŋa la, ba maahom toonɛ la de daarɛ la se'em n bala te ba de'eŋ Azootole De'eŋɔ la, ge kaanbɛ nyɔ'an bo'olom Na'ayenɛ kaanbegɔ daka la zuo, wo naba Yosia n bo nɔɔrɛ se'em la. 17Israel buuri sɛba n daa boe la n daa de'eŋ Azootole De'eŋɔ la saŋkaŋa la se'em n bala, de'eŋ Boroboro N Ka Tare Mi'ihom De'eŋɔ la dabeha ayopɔe. 18Azootole De'eŋɔ koŋɔ taaba ka tabelɛ de'em Israel teŋa la yehe nɔtɔgɔha Samuel saŋa la na, bii Israel naba sɛka tabelɛ de'em ko wo Yosia n de'em ko se'em la malemadoma, Levidoma, Yuda la Israeldoma sɛba n boe la zan'an, la Yerusalem teŋa nɛreba la zan'an. 19Yosia na'am gɔŋɔ zuo yuuma pia la anii poan te ba de'em Azootole De'eŋɔ kona wa. 20Wana wa woo pooren, Yosia n maahom Yenɛ Yire la ba'ahɛ la, te Mizraim teŋa naba Neko, wa'an Karkemis teŋa n lɛm Euprates Kolaa la na te a zabɛ. Te Yosia yehe to'ohɛ en bini te ba zabɛ. 21Te Neko tom nɛreba a zen'an na yeti Yuda naba, Mam la hom me tare la dene la taaba? Dagɛ hom te mam zabera zina wa, ge mam zaberɛ mɛ la nɛreba basɛba ha. Yenɛ n yele mam te n eŋɛ de kalam. Bala zuo, ho mɛŋa som zuo, da dekɛ ho nɛŋa kɛn'ɛhɛ Yenɛ se'ere n boe la mam wa, te a sagom hɔ. 22Ge naba Yosia ka bahɛ ge lebe, ge ton maahom a mɛŋa te a zabɛ la Neko. A pon ka kelehe Neko yetɔgom la n ze'ele Yenɛ mɛŋa nɔɔrɛn na la, ge keŋɛ Megido paberɛ la poan te a ta zabɛ. 23Te pɛɛntɛɛnreba la ta tɛn' naba Yosia, te a yele a kpɛ'ɛndoma yeti, tare ya mam keŋɛ ge ba pɔgɔlom mam mɛ. 24Te a nɛreba la ɔnbegɛ en zaba toroko koŋɔ poan, eŋɛ toroko koyema te a tara poan, tare n lebe Yerusalem na te a ki, te ba pin' en a sɔdoma yɔɔ poan. Te Yuda la Yerusalem zan'an kele bo en. 25Te Yeremia saam ge fabelɛ bo Yosia. Te boraahe la pɔgɔhe n de yoonyooneba yoona tɔgɔra ge fabela Yosia yele la zina. Te yooma la la fabelegɔ koŋɔ la dɛna malema Israel poan. Ba golehɛ a eŋɛ la fabelegɔ gɔŋɔ la poan. 26Yosia toonse'a woo n gee la sɛla woo te a eŋɛ dole Na'ayenɛ pa'alegɔ gɔŋɔ la, 27a tooma la zan'an, pɔhega ta paɛ ba'ahegɔ, ba golehɛ Israel la Yuda nadoma yɛla gɔnɔ la poan.

will be added

X\