2 Yelebiŋ'a 34

1Yosia wa dɛna la yuuma anii ge di' na'am, behɛ teŋa la yuuma pihitan' la deyema Yerusalem poan. 2Te a tooma tegɛ Na'ayenɛ nini, te a dɔla a sɔ naba David n yuun dole se'em la, ka ŋmɛregera de poan lɛbera zuɔ bii gɔbega. 3A na'am gɔŋɔ zuo yuuma anii poan te a nan de bia la, te a pɔhɛ a sɔ naba David Yenɛ la ɛɛa. A yuuma pia la ayi' poan te a pɔhɛ fɔɔra kunkuma zuto baga kaanbegɔ zen'enhe la, Aserah baga, dɔɔrɔ baga, la kuto baga la Yuda la Yerusalem teŋhe poan baha. 4A ne zɛ'a mɛ ge bahɛ te ba gbi'ira Baal baga kaanbegɔ bimbina la baha, wɔnta zun'uhe nyɔ'an zen'enhe la n yage kaanbegɔ zen'enhe la zuin la bahɛ, ge wɔnrɛ Aserah baga dɔɔrɔ la, dɔɔrɔ baga la, la kuto baga la buuri buuri, degehɛ ba lobe pagalɛ sɛba n kaanbere ba la yɔɔrɔ zuto. 5Ge nyɔ' sɛba n kaanbere baga aŋa la konba baga la bimbina la zuto, fɔ baga la Yuda la Yerusalem teŋhe poan bahɛ. 6Manase la Epraim la Simeon teŋhe poan ta paɛ Naptali teŋa la ka daboto la n kae teŋhe sene la, 7a bahɛ te ba doohe wɔnrɛ baga kaanbegɔ zen'enhe la mɛ, ge tɔ Aserah baga la dɔɔrɔ baga la buuri buuri, ge doohe wɔnrɛ zun'uhe nyɔ'an zen'enhe la bahɛ, ge nya lebe Yerusalem teŋa. 8Yosia na'am gɔŋɔ zuo yuuma pia la anii poan, te a to'e teŋa la, la Yenɛ yire be'em poan, ge tom Azalia dayɔa Sapan, la Maaseiah n de teŋa la kpɛ'ɛma ayema, la Yoahaz dayɔa Yoa la n de goleha la, te ba malom maalɛ Na'ayenɛ a Yenɛ la yire la. 9Te ba wa'an Hilkia n de malemadoma keema la zen'an na, tara Yenɛ yire ligiri la te Levidoma sɛba n gure Yenɛ yire kolehe la to'ohe Manase buuri, Epraim buuri, Israel buuri la n gee fiin wa la, la Yuda la Benyamin nɛreba zan'an zen'enhen, la sɛba woo n kɛn'ɛre Yerusalem la zen'enhen na. 10Nya dekɛ ligiri la eŋɛ sɛba te ba loe te ba malom maalɛ Na'ayenɛ Yire la nu'uhen. Te sɛba n behere tooma la me yɔɔra sɛba n tone Na'ayenɛ Yire la maalegɔ tooma la. 11Ba dekɛ i bo la kpa'areba la mɛteba te ba da' kuga te ba kirehɛ tara mɛta, la dɔɔseto n wan dekɛ ɛnŋɛ daahe, yire la te Yuda nadoma bahɛ te de sagom lebege daboo la. 12Te nɛreba wa ton toonɛ wa la birikinte, te nɛŋadoma bɔna kaara ba te ba tona. Nɛŋadoma wa dela, Yahat la Obadia n de Levi buuri dɛna Merari yaahe la, la Zekaria la Mesulam n de Levi buuri, dɛna Kohat yaahe la. Levidoma wa dela sɛba n tan' bonŋmɛ'ɛla ŋmɛ'ɛra soŋa soŋa. 13Bama n behere sɛba n ziire tebehegɔ la, ge behera tontona ba zan'an n tone toonse'ere woo bini. Te Levidoma la basɛba dɛna gɔnɔ goleheba, la kpɛ'ɛndoma, la nayaŋa guruba. 14Ban ta dekera ligiri la te nɛreba tare na bo Na'ayenɛ Yire la poan la, Hilkia n de malemadaana nyɛ Na'ayenɛ Pa'alegɔ Gɔŋɔ la te Moses yuun bo ba. 15Te Hilkia yele Sapan n de gɔŋgoloha la yeti, N nyɛ Pa'alegɔ Gɔŋɔ la Na'ayenɛ Yire la poan. Ge te a nya dekɛ gɔŋɔ la bo Sapan. 16Te Sapan tare gɔŋɔ la wa'an naba zen'an na, ge yele naba la yeti, sɛla woo te ho dekɛ eŋɛ ho yamehe la nu'uhen te ba tom la, ba tone. 17Ba me dekɛ ligise'a n boe Na'ayenɛ Yire la poan, yɔ bo sɛba n behere nɛreba la te ba tona la. 18Te Sapan n de gɔŋɔ goleha la yele naba la pa'ahɛ yeti, Hilkia n de malemadaana la n bo mam gɔŋɔ wa. Ge nya kaanlɛ gɔŋɔ la naba la nɛŋan. 19Naba la n wom Pa'alegɔ seko n boe gɔŋɔ la poan la, a aanhom la futo la te a yɛ la. 20Te naba bo Hilkia, Ahikam dayɔa Sapan, Mikah dayɔa Abdon, gɔŋɔ goleha Sapan, la Asaiah n de naba tontona la nɔɔrɛ yeti, 21Yehe ya soke Na'ayenɛ bo mam la Israel nɛreba wa a gee fiin wa, yelese'a n boe gɔŋɔ wa te a nyɛ wa poan la yele bo mam. Se'ere n sɔe la, Na'ayenɛ sunsunyiim sebo te a ka'ɛ bahɛ to zuo la ba' gaŋɛ mɛ, doohe la to sɔdoma yuun ka dole Na'ayenɛ yelehom wa, eta yelese'a woo te a bɔta la. 22Te Hilkia doohe la sɛba te naba la tom na la te ba keŋɛ nɔtɔgɔha n de pɔka te ka yu'urɛ yi'ira Hulda, dɛna Hasra dayɔa Tokhat me dayɔa Salum n behere futo biŋere zen'an la pɔga. Pɔka la kɛn'ɛre la Yerusalem teŋa wa zen'an kayema, te ba paɛ tɔgɛ bo ka. 23Te pɔka la yele ba yeti, Na'ayenɛ Israel Yenɛ n yele se'em n wan, ta yele ya boraa sɛka n tom ya na la yeti, 24Na'ayenɛ yeti, Nɔyalegerɛ wan sige zen'kana wa zuo na, la nɛresɛba n boe ka poan wa zuo. N wan bahɛ te sagaŋɔ seko n golehɛ eŋɛ gɔŋɔ wa poan te ba nan kɔ'ɔn kaanlɛ kɔ naba ninin la sige ba zuo na. 25Se'ere n sɔe la, ba zagahɛ mam mɛ, ge nyɔ'anra zun'uhe bɔ'ɔra baga a se'a, nyiiha mam sunsunya la ba mɛhe n dekɛ ba nu'uhe maalɛ baga se'a la. Bala zuo, mam sunsunyiim wan ka'ɛ bahɛ teŋkana wa zuo na kan malom keŋɛ. 26Yele ya Yuda naba se'em n tom ya na te ya soke Na'ayenɛ behɛ la yeti, Na'ayenɛ Israel Yenɛ la yeti, yelese'a te ho wom gɔŋɔ la poan la n de se'em n wana. 27Doohe la hom wom yelehom n tɔgɛ bahɛ zen'kana wa, la nɛresɛba n boe ka poan wa, te la vɛnkɛ ho suunre te ho sigehe ho mɛŋa Yenɛ nɛŋan la, hom sigehe ho mɛŋa bo mam, ge aanhom ho futo, ge kele se'em mam nɛŋan la, n seren wom ho sohoga la. Na'ayenɛ n yele. 28N wan bahɛ te ho paɛ ho sɔdoma ho daarɛ. Ho wan sige ho yɔɔ poan la sunma'ahom, te ho nini kan nyɛ nɔyalegerɛ se'ere n wan sige zen'kana wa, la ka nɛreba wa zuo na la. Te nɛreba la lebe ta yele naba la bala. 29Te naba wa yi' Yuda la Yerusalem keendoma zan'an lagahɛ na. 30Te naba wa ihege yɛ'a Na'ayenɛ Yire la poan, la Yuda la Yerusalem teŋa nɛreba, la malemadoma, Levidoma, la nɛra woo bonkotɛ la bonbila zan'an. Te ba paɛ bini te a kaanlɛ nɔbiŋere gɔŋɔ la yɛla la ba zan'an toban te ba wom. 31Te naba la ze'ele a zɛɛnrɛ la ge biŋe nɔɔrɛ la Na'ayenɛ, te a wan dɔla Na'ayenɛ nɔɔrɛ la a kan'aŋɔ la a malema la la a suunre la a potɛn'ɛrɛ zan'an, ge eta yelese'a woo n golehɛ bɔna ena gɔŋɔ la poan la. 32A bahɛ te sɛba woo n boe Yerusalem la Benyamin teŋhe poan la woo naɛ mɛ la en te ba wan dɔla Yenɛ n de ba sɔdoma Yenɛ la nɔbiŋere la. 33Te Yosia yehe yelefɛn'ɛha la n boe teŋsɛka woo n de Israel buuri teŋa poan mɛ, ge bahɛ te sɛba woo n boe Israel la tona bɔ'ɔra Na'ayenɛ ba Yenɛ la ma'an. Enŋa saŋa la poan, ba ka ŋmɛregɛ ge bahɛ Na'ayenɛ n de ba sɔdoma Yenɛ la dɔlɔga.

will be added

X\