2 Yelebiŋ'a 33

1Manase wa dɛna la yuum pia la ayi', ge di na'am la, behɛ teŋa la yuuma pihinuu la anuu Yerusalem teŋa poan. 2Te a tom teŋse'ehe te Na'ayenɛ sagom se Israeldoma nɛŋan la be'em la taaba Na'ayenɛ nɛŋan. 3A malom doohe mɛ mɛ' kuŋkuma zuto kaanbegɔ zen'enhe la te a sɔ Hezekia yuun doohe gbi' bahɛ la, ge me mɛ Baal baga kaanbegɔ zen'enhe, ge mɛ Aserah baga, ge na'ahera lɔgɔrɔ seto n yuli saazuo wa. 4Ge mɛ baga kaanbegɔ zen'enhe eŋɛ Na'ayenɛ Yire la te Na'ayenɛ yeti enŋa yu'urɛ wan pota de poan Yerusalem wa la poan. 5A mɛ kaanbegɔ zen'enhe, Na'ayenɛ Yire la zenzagahe seyi' poan bo lɔgɔseto n yuli saazuo wa, 6tara a dayɔɔhe nyɔ'anra bugumen kaanbera Ben Hinom Bɔn'ɔn la poan, tona sɔɔntooma, bakolo boka, behega la bagabibihe tooma. A ba' tom la be'em Na'ayenɛ nɛŋan, nyie Na'ayenɛ sunsunya. 7Te a dekɛ bagarɛ te a maalɛ, tare na ze'ele Yenɛ yire se'ere te Na'ayenɛ yele naba David la a dayɔa Solomon yeti, Yire dena wa te mam loe Yerusalem wa poan, Israel buuri wa zan'an poan, te n yu'urɛ pota de poan wuuha la poan. 8N kan malom voen Israel teŋkana wa te n dekɛ bo ba sɔdoma la, ba han wan dɔla ge eta sɛla woo te mam bo ba nɔɔrɛ te eta wo pa'alegɔ la malema la nɔze'elego se'a te mam te doohe Moses poan bo ba la. 9Manase n bɔregɛ Yuda la Yerusalem teŋhe nɛreba bahɛ se'em n bala, te ba tom be'em gana teŋse'ehe nɛreba te Na'ayenɛ yuum sagom ba Israeldoma ninin la. 10Te Na'ayenɛ tɔgɔra bɔ'ɔra Manase la a nɛreba wa, ge ba ka kelehe. 11Bala te Na'ayenɛ bahɛ te Asiria naba zaba nɛŋadoma zabɛ la Manase la a nɛreba la, nyaŋɛ Manase, nyɔkɛ en dekɛ baŋa tuhe a nyɔyan la, bobe en la nyɔgom zɔntɔ tare en lebe Babilon teŋa. 12N ta bɔna woŋerɛ poan la, te a ɛ Na'ayenɛ a Yenɛ la, sigehe a mɛŋa teŋa teŋa a sɔdoma Yenɛ la nɛŋan. 13N sohɛ Na'ayenɛ se'em la, ve'e Na'ayenɛ, te a kelehe a sohoga la, ge le tare Manase lebe Yerusalem n de a sɔ'ɔlom la poan la na. Te Manase baŋɛ te Na'ayenɛ n seren de Yenɛ. 14Wana pooren te Manase malom mɛ David teŋa yeŋa dangoone la n lebehe Gihon teŋa zuɔ bɔba paberɛ la poan ha, ta paɛ Zim Nayaŋa la, mɛ dangoone la woko bilam kae nayaŋa la n boe teŋa la yi'ire Opel la, ze'ele pɛɛntɛɛnreba ba ze'elego zen'enhe, Yuda teŋkanra woo te dangoone mɛ kae se la poan, te ba gu'ura. 15Ge me yehe sateŋhe baga la, la baga woo Na'ayenɛ Yire la poan, la baga kaanbegɔ zen'enhe la woo te a mɛ zɔya zuto, la Na'ayenɛ Yire la poan la Yerusalem teŋa poan zan'an ta bahɛ. 16Te a nya ze'ele Na'ayenɛ kaanbegɔ daka la, kaanbɛ sunma'ahom bo'olom, la fara bɔ'a bo'olom ka zuo, ge bo Yudadoma na'aha Na'ayenɛ Israel Yenɛ la. 17Ge nɛreba kelom kena kuŋkuma zuto mɛ kaanbera, ge ba kaanbere bɔ'ɔra la Na'ayenɛ ba Yenɛ la. 18Manase toonse'a n gee la, ta paɛ en sohɛ Yenɛ se'em la, la yelese'a te behereba la dekɛ Na'ayenɛ Israel Yenɛ la yu'urɛ tɔgɛ bo en la golehɛ eŋɛ la Israel nadoma yɛla gɔŋɔ la poan. 19La a sohoga la n daa ve'e Yenɛ se'em la, a be'em etegɔ la zan'an, la en dagɛ birikina la, la zen'se'ehe te a doohe mɛ kaanbegɔ zen'enhe, en sɛ a Aserah bagarɛ dɔɔrɔ la, ge maalɛ baga la kaanbera la golehɛ bɔna la Hozai gɔnɔ la poan. 20Te Manase kule paɛ a sɔdoma, te ba pin' en naba yire la poan. Te a dayɔa Amon sɔe a na'arɛ dɛna naba. 21Amoni wa dɛna yuum pihiyi' la a yi ge di na'am la, behɛ Yerusalem yuuma a yi'. 22A tom be'em te la ka tigɛ Na'ayenɛ nini wo a sɔ Manase tooma la. Te Amoni na'ahɛ ge kaanbɛ baga se'a woo te a sɔ Manase mɛ la. 23Ge Amoni ka nyaŋɛ sigehe a mɛŋa wo a sɔ Manase la Na'ayenɛ nɛŋan, ge be'em la n kɔ'ɔn ma'an pa'aha. 24Te Amoni kpɛ'ɛndoma wa sugɛ dekɛ potɛn'ɛrɛ ko' en naba yire mea poan. 25Te teŋa la nɛreba ko' sɛba zan'an n sugɛ dekɛ potɛn'ɛrɛ ko' Naba Amon la, ge diihe a dayɔa Yosia naba.

will be added

X\