2 Yelebiŋ'a 31

1Wana wa woo n ta ba'ahɛ la, Israel buuri la zan'an yehe mɛ kɛn' Yuda teŋhe woo poan wɔnrɛ baga woo la Aserah baga dɔɔrɔ la doohe baga kaanbegɔ seko woo n boe kuŋkuma zuto, ge gbi' baga bimbina la woo Yuda la Benyamin la Epraim la Manase teŋhe poan zan'an. Te Israel buuri wa nya lebe ba teŋhe ba teŋhe, ba yiya ba yiya poan. 2Te Hezekia tɔnrɛ malemadoma la la Levidoma la ba tansugure ba tansugure, ba toonɛ ba toonɛ, te ba nyɔ'anra nyɔ'an bo'olom la sunma'ahom bo'olom, ge tona bɔ'ɔra Yenɛ fara yooma yoona Na'ayenɛ Yire nayahe. 3Naba bɔ'ɔra lɔgɔseto a lɔgɔrɔ poan te ba tara kaanbera la, tehɛ te ba kaanbera bolika la zanɔɔrɛ nyɔ'an bo'olom la Vo'ohogo Dabeha la Ŋmarepaalehe la de'enɔ seto woo nyɔ'an bo'olom zan'an wo lan golehɛ Na'ayenɛ Pa'alegɔ la poan se'em la. 4A me bo sɛba woo n kɛn'ɛre Yerusalem poan nɔɔrɛ, te ba bɔ'ɔra malemadoma la Levidoma la tɔntɛ n de se'em ba zen'an la, te la bahɛ te ba ta'an mɔ'ɛ nini la Na'ayenɛ Pa'alegɔ la. 5Nɔɔrɛ la n bo ba'ahɛ la, la pon ka yuue, te Israeldoma la lagahɛ ba dideena boom bo'olom la daam paalom bo'olom la kaam paalom la seerom la ban kɔ disɛka woo ba vatɔ poan la kekeko te la ka tara makerɛ, te la dɛna ba sɛla woo pia porogerɛ bo'olom te ba tare na. 6Te Israeldoma la Yudadoma sɛba n kɛn'ɛre Yuda teŋhe poan la me tara lɔlehe la piihe pia porogerɛ bo'olom na, la toolom lɔgɔseto n de Na'ayenɛ denɛ la pia porogerɛ bo'olom n ka tare makerɛ, wa'an Na'ayenɛ ba Yenɛ nɛŋan na. 7Yuunɛ ŋmarehe setan' poan, te ba pɔhɛ tare ba lɔgɔrɔ la kena na kugura to kura kura, ta kuge to ba'ahɛ ŋmarehe seyopɔe poan. 8Te Hezekia la a nadoma n ta wa'ana nyɛ lɔgɔrɔ la kuguro la, te ba pɛngɛ Na'ayenɛ ge kan' som bahɛ a nɛreba Israeldoma la zuo. 9Te Hezekia soke malemadoma la Levidoma la lɔgɔrɔ la n guge gan'an la yele. 10Te malemadoma keema Azaria n yehe Zadok yizuo na la lerege en yeti, Yehe daanse'ere daarɛ te nɛreba la pɔhɛ tara ba bo'olom kena Na'ayenɛ Yire wa poan na la, dia gan' to la yoo, te to dita tegera ge baha. Na'ayenɛ kan' la som bahɛ a nɛreba la zuo, te lɔgɔkanra wa n kuge kuge wa dela sɛla te ba gee na bala. 11Te Hezekia bo nɔɔrɛ te ba maahom lɔgɔrɔ biŋere bɔ'ɔrɔ Na'ayenɛ Yire la poan, te ba maahom bɔ'ɔrɔ la. 12Te ba dekɛ birikinte vaɛ bo'olom lɔgɔrɔ la pia porogerɛ bo'olom lɔgɔrɔ la toolom lɔgɔrɔ la n dekɛ bo Na'ayenɛ la kɛn'ɛhɛ bɔ'ɔrɔ la poan, te Levi boraa Konania dɛna nɛŋadaana beha lɔgɔrɔ la, te a sɔɔn Simei taga a poore. 13Te Naba Hezekia bahɛ te Yehiel la Azaria la Nahat la Asahel la Yerimot la Yozabad la Eliel la Ismakia la Mahat la Benaiah sɔna behera, te Konania dɛna ba nɛŋadaana, te a sɔɔn la tagalɛ. 14Imnah n de Levi nɛra la dayɔa Kore n gure Yenɛ yire la dapɔya bɔba nayaŋa la n sɔe popeelom bo'olom la n de Yenɛ denɛ la toolom lɔgɔrɔ la tɔnta. 15Enŋa n bo Eden la Miniamin la Yesua la Semaiah la Amaria la Sekania sore te ba bɔna malemadoma teŋhe la poan tara birikinte tɔnta ba sɔɔnrɔ la lɔgɔrɔ bɔ'ɔra ban boe zen'an woo bonkoroba la bonbibihe woo boyena. 16Ba tɔnre bɔ'ɔra la boraa woo n de yuuma atan' beene yɛ'ɛha, te a yu'urɛ bɔna buuri tuunhom yu'ura la poan, te a kɛn'ɛra Na'ayenɛ Yire la poan tona a daarɛ woo tooma la te ba bɔna tansugure tansugure tona la. 17Ge ba tɔnta bɔ'ɔra malemadoma sɛba me yu'ura n golehɛ doohe ba buuri yizuto tuunhom la, la Levidoma sɛba n de yuuma pihiyi' beene yɛ'ɛha, doohe la ba tooma la ban boe tansuga se'ere poan. 18Ba tɔnrɛ bɔ'ɔra ba kɔma la pɔgɔba la dayɔɔhe la pɔyɔɔhe la nɛreba zan'an yu'ura. Se'ere n sɔe la, ba dela birikindoma n yehe ba mɛŋa ze'ele bo Na'ayenɛ. 19Aron buuri poan malemadoma la n kɛn'ɛre ba teŋkanra la poan yaama bɔn'ɔrɔ la poan la, bii malemadoma teŋkanra la poan la, ba yehe la nɛreba, te bama dɔla tɔnta boraa woo n boe malemadoma buuri la poan lɔgɔrɔ bɔ'ɔra ba, la Levidoma sɛba woo yu'ura n boe buuri yizuto yu'ura la poan la. 20Hezekia n doohe Yuda poan zan'an eŋɛ se'em bala, te a etegɔ la dɛna som, nara, ge dɛna yelemɛŋɛrɛ Na'ayenɛ a Yenɛ la nɛŋan. 21Sɛla woo te Hezekia pɔhɛ Yenɛ Yire la poan, a nam pa'alegɔ la nɔya mɔ'ɛ nini te a eere Yenɛ tone a tooma. Ge sunma'ahom bɔna la en.

will be added

X\