2 Yelebiŋ'a 30

1Hezekia tom mɛ yi' Israel zan'an la Yuda, ge golehɛ gɔnɔ tom bo Epraim la Manase, te ba wa'an Na'ayenɛ Yire la poan Yerusalem poan na te ba de'em Azootole De'eŋɔ la bo Na'ayenɛ Israel Yenɛ la. 2Se'ere n sɔe la, naba la a nabiihe, la Yerusalem nɛreba zan'an pon maahom mɛ te ba de'em Azootole De'eŋɔ la yuunɛ ŋmarehe seyi' poan. 3Ba ka nyaŋɛ de'em de'eŋɔ wa ko de'eŋɔ saŋa. Se'ere n sɔe la, malemadoma sɛba n pee ba mɛhe saŋkaŋa la ka zo'e, te nɛreba la me ka kan'ahɛ bɔna Yerusalem poan. 4Bala zuo te la nara bo naba la la nɛreba la zan'an. 5Te ba ko' nɔɔrɛ te ba mɔɔlɛ kae Israel zan'an, ze'ele Beerseba ta paɛ Dan teŋa ha, te ba wa'ana te ba de'em Azootole De'eŋɔ la bo Na'ayenɛ Israel Yenɛ la, Yerusalem poan. Se'ere n sɔe la, ba ka nyaŋere lagahera nɛrekooŋɔ dɛ'ɛna ko wan lan golehɛ pa'alɛ se'em la. 6Te bitonohe la ihege la gɔnɔ la te naba la a nabiihe la mɛŋa golehɛ la, doohe Israel la Yuda teŋhe poan zan'an bo. Gɔnɔ la poan, naba la mɛŋa n bo nɔɔrɛ yeti, Israel buuri wa, lebe ya Na'ayenɛ la n de Abraham la Isaak, la Israel Yenɛ la zen'an na, te a me lebe yamam sɛba n peɛn, ge yehe Asiria naba nu'uhen wa zen'an na. 7Da ane ya wo ya sɔdoma la ya sɔɔnrɔ la n yuun dagɛ birikindoma Na'ayenɛ n de ba sɔdoma Yenɛ la nɛŋan, te a bahɛ te ba ka tara vɔnrɛ wo yan nyɛte de se'em zina wa. 8Da kperɛ ya toba wo ya sɔdoma n yuun ane se'em la. Dekɛ ya mɛhe bo Na'ayenɛ, la ya kɛn' a yire wa te a pee de te de wan bɔna wuuha wa poan tona bɔ'ɔra Na'ayenɛ ya Yenɛ wa, te a sunsunyiim la n taɛ wo bugum la da sige ya zuo na. 9Ya han lebe Na'ayenɛ zen'an na, bala a wan zɔ ya sɔɔnrɔ sɛba te ba nyɔgɛ la ya kɔma la ninbɔn'ɔn ge bahɛ ba te ba lebe teŋa wa na, ya Na'ayenɛ la dela ninbɔn'zɔrɛ la som Yenɛ. A kan bire a poore bahɛ ya, ya han wan lebe a zen'an. 10Te bitonohe la tare gɔŋɔ doohe teŋkanra la poan la poan zan'an ta paɛ Epraim la Manase teŋhe ta paɛ Zebulun teŋhe ha, ge teŋhe la nɛreba la la'ara ba, kɛɛta ba ge ɛnregera ba. 11Ge bala zan'an la, nɛreba yehe Aser, Manase la Zebulun buuri poan mɛ sigehe ba mɛhe ge wa'an Yerusalem na. 12Te Yenɛ nu'o me paga Yuda nɛreba zuo, te potɛn'yenɛ bɔna ba poan, te ba eŋɛ wo naba la, la a nabiihe la n bo ba nɔɔrɛ se'em doohe Na'ayenɛ yelehom la. 13Te nɛrekooŋɔ lagahɛ Yerusalem poan te ba de'eŋ Boroboro N Ka Tare Mi'ihom De'eŋɔ la yuunɛ ŋmarehe seyi' poan. 14Te ba doohe vige baga kaanbegɔ dagahe la woo n boe Yerusalem teŋa poan la, ge voen baga nyɔ'an zun'uhe dagahe la woo tare ba ta bahɛ Kidron bɔn'ɔn la poan. 15Ge ba nya kɔrom Azootole pebibihe la yuunɛ ŋmarehe seyi' la poan, ka dabeha pia la anaahe daarɛ. Te vi di malemadoma la Levidoma la, te ba nya pee ba mɛhe, ge me tare nyɔ'an bo'olom wa'an Na'ayenɛ Yire la poan na. 16Te ba nya ze'ele la ba ze'elego zen'enhe wo Pa'alegɔ te Moses Yenɛ nɛra pa'alɛ ba. Te Levidoma la nya tare ziim la na bo malemadoma la te ba tɔ'ɔha ka'aha. 17Ge nɛreba la kekeko n ka pee ba mɛhe, ge me kan ta'an maahom ba Azootole pebibihe la bo Na'ayenɛ la zuo. Levidoma la n kɔrom ba Azootole pebibihe la bo Na'ayenɛ bo ba. 18Nɛreba la kekeko, te sɛba yehe Epraim la Manase la Isakar la Zebulun teŋhe poan na ka pee ba mɛhe, ge lagom di Azootole dia la, te la ka doohe la lan golehɛ se'em la, ge Hezekia n sohɛ yeti, Na'ayenɛ sonɛ wa, di suguru 19bo se'emdaana woo n maahom a suunre te a ɛ hom Yenɛ n de to sɔdoma Na'ayenɛ wa, ge tara dɛngerɔ doohe la a daana n ka pee a mɛŋa doohe ho yire wa peere malema la. 20Bala te Na'ayenɛ wom Hezekia sohoga la, ge tebɛ nɛreba la. 21Israel buuri la n boe Yerusalem poan la de'eŋ Boroboro N Ka Tare Mi'ihom De'eŋɔ de poan la dabeha ayopɔe, la nyeema kantɛ. Te Levidoma la malemadoma la tara yooma lɔgɔrɔ, yoona pɛnka yooma bɔ'ɔra Na'ayenɛ daarɛ woo. 22Te Hezekia tɔgɛ kpemehe Levidoma la n mɔ'ɛ nini la sɛla n de Na'ayenɛ denɛ la. Ba de'em la bala dabeha ayopɔe, ge dita ba tɔntɛ n de se'em ba kaanbegɔ bonɔ la poan. Ba kaanbera la sunma'ahom la fara bo'olom bɔ'ɔra Na'ayenɛ n de ba sɔdoma Yenɛ la. 23Te nɛreba la zan'an ko nɔɔrɛ te ba de'em de'eŋɔ wa dabeha ayopɔe pa'ahɛ. Seren le de'em la nyeema dabeha ayopɔe pa'ahɛ. 24Se'ere n sɔe la, Yuda naba Hezekia bo nɛreba la la lɔlehe tuhure, piihe tuha ayopɔe, te nabiihe la bo lɔlehe tuhure, piihe tuha pia, te malemadoma sɛba n pee ba mɛhe me zo'e. 25Te Yuda nɛreba zan'an, malemadoma, Levidoma, nɛreba la, sɛba n de saama ze'ele Israel poan na, la sɛba n boe Yuda poan zan'an lagom nyeena. 26Te popeelom kantɛ sige Yerusalem poan, popeelom sebo taaba n ka tabelɛ bɔna Yerusalem poan ze'ele Israel naba David dayɔa Solomon saŋa la na. 27Te malemadoma la ihege ze'ele saazuo, kan' som bahɛ nɛreba la zuo, te ba sohoga la paɛ saazuo ha, Yenɛ mɛŋa bɔŋa zen'an la poan.

will be added

X\