2 Yelebiŋ'a 3

1Te Solomon pɔhɛ mɛta Na'ayenɛ Yire la Moria zoore n boe Yerusalem teŋa la zuo, zen'sɛka te Na'ayenɛ tabelɛ nɛɛ a mɛŋa pa'alɛ a sɔ Naba David la. Zen'kana wa dela Yebus boraa Arauna dia tɔa zen'an te Naba David yuum maahom ka biŋe. 2Naba Solomon pɔhɛ mea wa la a na'am dia yuuma anaahe poan, de ŋmarehe seyi' dabeha ayi' poan. 3Ɛɛnba la te Solomon ɛɛnbɛ te a mɛ Yenɛ Yire la n ane se'em n wana. A ɛɛnbɛ de mɛ wo ɛnberɛ kɛka la, te de woko dɛna santire pihiyoobe, te de yaleŋa dɛna santire pihiyi'. 4Te Yire la bɔpaka la n boe de nɛŋan na la woko zuna la yire la yaleŋa, dɛna santire pihiyi', te ka saazuo woko dɛna santire pihiyi', te a takɛ ka poan la salensoma ma'an. 5Te a dekɛ dɔɔsonɔ ma'an te'e bɔkantɛ la mɛŋa teŋa la saazuo zan'an, dekɛ salensoma takɛ ko poan la zan'an, ge golɛ kpa'kpa' tiihe la zɔntɔ kae kɔ. 6Ge dekɛ sanlenkuga pɔnrehɛ Yire la, te sanlema la woo me ze'ele Parvaim teŋa na. 7Te a dekɛ sanlema takɛ Yire la, de yuunhe, la koleŋa dɔɔrɔ la, la dangɔɔma la de kolehe, ge golɛ kelompagehedoma lamenɛ de dangɔɔma. 8Te a beŋe Saraa la, te ka yaleŋa dɛna santire pihiyi' wo yire la yaleŋa n zone se'em la, te a takɛ Saraa wa poan la sanlensoma bɔɔrehe kɔbehe seyoobe. 9Sanlema kpa'ahe la tebehom zone la kpila pihinuu. Te saazuo deto la zan'an pin' mɛ la sanlema. 10Te a dekɛ dɔɔrɔ maalɛ kelompagehedoma takɛ ba la sanlema ze'ele Saraa la poan. 11Kelompagehedoma wa kelompagehe seyi' n kalone taaba, te se woko dɛna santire pihiyi'. Kelompagehedoma wa kelompaka kayena woo woko dela santire anuu, kalona ayema kelompaka kayena, ge te kelompaka sɛka n gee la me woko dɛna santire anuu kalona Yenɛ yire la dangoone la. 12Te kelompagehe daana ayema la me kelompaka kayena me woko dɛna santire anuu, kalona Yenɛ yire la dangoone la te kelompaka kayema la me dɛna santire anuu, me kalona kelompagehe daana ayema la me kelompaka. 13Kelompagehedoma wa kelompagehe la n kalone taaba la woko dela santire pihiyi', te ba zɛ'a saazuo tɔ bɔ' kantɛ la na. 14Te ba wogɛ tanɛ se'ere n beŋere la te de dɛna tan sabega la tan mɔlɔgɔ la tan mɔle mɛŋka la tan peelega buruma te ba kpa' kelompagehedoma de poan. 15Te a mɛ zɛnya ayi' te a zɛ'a Yenɛ Yire la zanɔɔren te ba woko dɛna pihitan' la anuu, te lihe se'ehe n forɛ zɛnya wa zuto la kayena woo woko dɛna santire anuu. 16Ge maalɛ zɔntɔ ze'ele saraa la poan yehe na te to wa'ana pagalɛ zɛnya wa zuo, te a maalɛ *pomegranate wɔla kɔbega yule zɔntɔ la poan. 17A maalɛ zɛnya ayi' wa ze'ele la Yenɛ Yire la zanɔɔren, te deyema bɔna zuɔ te a segɛ denɛ Yakin, te deyema me bɔna gɔbega, te a segɛ denɛ Boaz.

will be added

X\