2 Yelebiŋ'a 29

1Hezekia dela yuuma pihiyi' la anuu ge di na'am, behɛ teŋa la yuuma pihiyi' la awae' Yerusalem poan. A ma yu'urɛ dela Abiya, dɛna Zekaria pɔyɔa. 2Te a tooma woo tegɛ Na'ayenɛ nini wo a sɔ David tooma la. 3A na'am gɔŋɔ zuo pɔhega yuunɛ la pɔhega ŋmarega poan te a yu'ɛ Na'ayenɛ Yire la kolehe la malom maalɛ se. 4Nya tare malemadoma la Levidoma la wa'an zenzaka sɛka n lebehe dapɔya bɔba la, 5yele ba yeti, Kelehe ya mam, Levidoma wa, pee ya mɛhe nananawa, ge miihe Na'ayenɛ n de to sɔdoma Yenɛ la yire wa, ge yehe sɛla woo n de dɛnkɔ de poan. 6Se'ere n sɔe la, to sɔdoma la daa bahɛ ba birikinte la mɛ, ge tom be'em Na'ayenɛ to Yenɛ wa nɛŋan, zagahɛ en, ge yehe ba nɛhe a yire wa n de a bɔŋa zen'an wa poan, bire ba pɔya bo en. 7Ge yo' zenzagahe la kolehe la, ge kiinhe bugum lamehe la zan'an. Ge ka nyɔ'anra digilom zun'uhe a yire la poan, bii ba nyɔ'anra nyɔ'an bo'olom bɔ'ɔra Yenɛ wa n de Israel Yenɛ wa. 8Bala n sɔe te Na'ayenɛ sunsunyiim taɛ bahɛ Yuda la Yerusalem zuo, te a damɛ ba te la tara dabeem la paleŋ'ɛnka, te nɛra woo toora ba wo yan nyɛte de se'em wa. 9Beha ya, ba kɔrom to sɔdoma mɛ la so'a, nyɔkɛ te dayɔɔhe la te pɔyɔɔhe la to pɔgɔba keŋɛ yele dena wa zuo. 10Nananawa, la boe mam suunren te n biŋe nɔɔrɛ la Na'ayenɛ Israel Yenɛ wa, te a gu' te a sunsunyiim wa da taɛ bahɛ to zuo. 11N dayɔɔhe wa, da zagahɛ ya. Na'ayenɛ n loe ya te ya bɔna a nɛŋan tona bɔ'ɔra en, ge dɛna a tontoneba nyɔ'anra digilom. 12Levidoma sɛba n ihege te ba tom dela, Amasai dayɔa Mahat, la Azaria dayɔa Yoel, n yehe Kohat buuri la poan na, la Abdi dayɔa Kis, la Yehalelel dayɔa Azaria n yehe Merari buuri la poan na, la Zima dayɔa Yoa, la Yoa dayɔa Eden n yehe Gerson buuri la poan na. 13Simri la Yeiel n yehe Eliazapan buuri poan nan la, la Zekaria la Matania n yehe Asap buuri poan na. 14la Yehiel la Simei n yehe Heman buuri poan na, Semaiah la Uziel n yehe Yedutun buuri poan na. 15Te ba lagahɛ ba sɔɔnrɔ la, pee ba mɛhe ge kɛn' te ba doohe miihe Na'ayenɛ Yire la wo naba la n bo a nɔɔrɛ la wo Na'ayenɛ n bo en yelehom la se'em la. 16Bala te malemadoma la kɛn' Na'ayenɛ Yire la poan ha ta pee. Lɔgɔdɛnkɔ seko woo te ban nyɛ, ba tare yehe Na'ayenɛ Yire la zenzaka yeŋa, keŋɛ Kidron bɔn'ɔn la poan ta bahɛ ko bilam. 17Ba pɔhɛ yire la miihego la yuunɛ pɔhega ŋmarega pɔhega daarɛ. Dabeha anii daarɛ te ba miihe paɛ Na'ayenɛ Yire zenzaka la poan, ge dekɛ dabeha anii miihe Na'ayenɛ Yire la poan ta ba'ahɛ. Yuunɛ pɔhega ŋmarega la dabeha pia la ayoobe daarɛ. 18Te ba nya kɛn' naba Hezekia zen'an ta yele en yeti, To miihe Na'ayenɛ Yire la ba'ahɛ la nyɔ'an kaanbegɔ daka la la ka lɔgɔrɔ la zan'an la tebola la te Na'ayenɛ danlehom boroboro la pagata a zuo la, la a lɔgɔrɔ la zan'an. 19To me malom maalɛ lɔgɔseto zan'an te naba Ahaz n wa dɛna naba la yuun yehe to la dekɛ tɔ ze'ele Na'ayenɛ kaanbegɔ daka la nɛŋan. 20Te naba Hezekia ihege bolika man'aherɛ man'aherɛ lagahɛ nabiihe la zan'an, te ba keŋɛ Na'ayenɛ Yire la poan. 21Ba tare la lɔlehe seyopɔe la peraahe seyopɔe la pebibihe n de pebibihe seyopɔe, la botelehe seyopɔe te la dɛna sɔ'ɔlom la, la Yenɛ Yire la la Yuda zan'an be'em duuhego bo'olom. Te naba la bo Aron dayɔɔhe la n de malemadoma la nɔɔrɛ te ba dekɛ dunhe la kaanbɛ Na'ayenɛ kaanbegɔ daka la zuo. 22Te ba kɔrom lɔlehe la te malemadoma la dekɛ ziim la miihe kaanbegɔ daka la. Te ba kɔrom peraahe la dekɛ se ziim la miihe kaanbegɔ daka la ge kɔrom pebibihe la me dekɛ se ziim la me miihe kaanbegɔ daka la kae. 23Te ba nya tare botelehe la n de be'em duuhego bo'olom la na ze'ele naba la nɛreba la nɛŋan, te ba dekɛ ba nu'uhe pagalɛ botelehe la zuo. 24Te malemadoma kɔrom boohe wa dekɛ se ziim la kaanbɛ be'em bo'olom kaanbegɔ daka la zuo te la dela be'em duuhego yɔ Israeldoma zan'an. Se'ere n sɔe la naba la bahɛ te nyɔ'an bo'olom la be'em bo'olom la dɛna la Israel zan'an denɛ. 25Te a bahɛ te Levidoma la ze'ele Na'ayenɛ Yire la poan la gulo la kɔnlɔ la duurenhe wo naba David la Gad la n yuun de naba la behera la, la Natan n de nɔtɔgɔha la n yuun bo nɔɔrɛ se'em la. 26Te Levidoma la maahom zɛ'a la naba David yooma lɔgɔrɔ la, te malemadoma la me tara tentana. 27Te Hezekia bo nɔɔrɛ te ba kaanbɛ nyɔ'an bo'olom la kaanbegɔ daka la zuo. Ban pɔhɛ nyɔ'an bo'olom la kaanbegɔ la, te nɛreba la pɔhɛ yoona, te tentana la me pɔhɛ yoonɛ na'aha Na'ayenɛ, te Israel naba David yooma lɔgɔrɔ la kɔkɛ. 28Nɛreba la n na'ahere Na'ayenɛ se'em la, yoonyooneba la me yoone la bala mea te tentana la me pɛɛbera dɔla, tara tara te nyɔ'an bo'olom kaanbegɔ la ta ba'ahɛ. 29Kaanbegɔ la n ta ba'ahɛ la, naba la nɛreba la zan'an n boe la en la zin'ire pɔnrɛ la na'ma na'ahɛ Na'ayenɛ. 30Te naba Hezekia la a kpɛ'ɛndoma nya bo Levidoma la nɔɔrɛ te ba dekɛ naba David la Asap n yuun behere bɔ'ɔra naba la yooma la yoon pɛngɛ Na'ayenɛ. Te ba yoon la popeelom, ge na'ahɛ Na'ayenɛ 31Te Hezekia yeti, Yan nya pee ya mɛhe bo Na'ayenɛ wa, nya maahom ya tare kaanbegɔ la fara bo'olom na bo Na'ayenɛ. Bala te lagaŋɔ la zan'an nya tare ba kaanbegɔ la ba fara bo'olom na, te sɛba n maahom ba suunre te ba bo la tare nyɔ'an bo'olom na. 32Nyɔ'an bo'olom la te lagaŋɔ la tare na la dela, lɔlehe pihiyopɔe, peraahe kɔbega, pebibihe kɔbehe seyi'. Te bama zan'an dɛna nyɔ'an bo'olom bo Na'ayenɛ. 33Toolom lɔgɔrɔ la n de fara bo'olom la dela, lɔlehe kɔbehe seyoobe, piihe tuha atan'. 34Ge malemadoma la pɔ'ɛ mɛ kan ta'an siie nyɔ'an bo'olom dunhe wa zan'an, bala te ba sɔɔnrɔ Levidoma la soŋɛ ba tara tara te toonɛ la ta ba'ahɛ, te malemadoma basɛba me pee ba mɛhe pa'ahɛ. Levidoma la tan' ba mɛhe tara gana malemadoma la. 35Nyɔ'an bo'olom kekeko boe bini mɛ, te sunma'ahom kaanbegɔ kaam nɛnɔ la nyɔ'an bɔna, ta pa'ahɛ la nyɔ'an bo'olom woo daam bo'olom. Na'ayenɛ Yire wa kaanbegɔ tooma la n le pɔhɛ se'em n bala. 36Te Hezekia la nɛreba la zan'an nyeena la Yenɛ n eŋɛ sɛla bo a nɛreba la. De daa din'e ba mɛ.

will be added

X\