2 Yelebiŋ'a 28

1Ahaz wa dɛna la yuuma pihiyi' ge di na'am, behɛ teŋa la yuuma pia la ayoobe Yerusalem poan. Ge a tooma ka tegɛ Na'ayenɛ nini wo a sɔ David n daa ane se'em la. 2Enŋa ton nɛ la Israel nadoma la nataka, kure kuto baga, na'aha Baal bagarɛ la. 3Ge nyɔ'anre kaanbegɔ bo'olom Ben Hinom Bɔn'ɔn la poan, tara a dayɔɔhe nyɔ'anra kaanbera wo teŋse'ehe nɛreba te Na'ayenɛ dige se Israeldoma nini bahɛ la. 4A dole la kuŋkuma la zɔya zuto la tikanra tilain kaanbera ge nyɔ'anra zun'uhe bɔ'ɔra baga. 5Bala zuo te Na'ayenɛ a Yenɛ la dekɛ en enŋa Aram naba nu'uhen. Te Aramdoma wa nyaŋɛ en ge nyɔgɛ a nɛreba la kekeko lebe Damaskus teŋa. Ge le dekɛ en eŋɛ Israel naba nu'uhen te a zabɛ pɔgɔlom en paɛ paɛ. 6Pɔgɔloŋɔ la dela, Aremalia dayɔa Peka n de Israel naba la kɔrom la Yuda teŋa pɛɛntɛɛnreba n mi' pɛɛntɛɛnrɛ soŋa, tuha kɔbega la tuha pihiyi' daarɛ deyena zaberɛ poan, doohe la ban zagahɛ Na'ayenɛ n de ba sɔdoma Yenɛ la zuo. 7Te Epraim pɛɛntɛɛnra ayema n tɔe te ba yi'ira en Zikri la, kɔrɔgɛ naba dayɔa Maaseiah, la Azrikam n de naba yire la keema, la Elkana n tage naba poore la. 8Te Israeldoma wa nyɔkɛ ba sɔɔnrɔ la pɔgɔhe, bodibinto la pugunto te ba kanlɛ dɛna tuha kɔbehe pihiyi', ge me fan' ba lɔgɔrɔ zo'e zo'e tare lɔgɔrɔ la wa'an Samaria teŋa na. 9Ge Na'ayenɛ nɔtɔgɔha n boe teŋa la poan te ba yi'ira Oded, n yehe to'ohɛ pɛɛntɛɛnreba la n lebere Samaria teŋa na la, yele ba yeti, Behɛ ya, Na'ayenɛ wa n de ya sɔdoma Yenɛ wa suunre n nyiin la Yuda teŋa wa zuo te a dekɛ ba eŋɛ ya nu'uhen la. Ge ya kɔrom ba ta ba' gaŋɛ mɛ te la vɛnkɛ Yenɛ suunre, 10ge te ya nya maahena te ya dekɛ Yuda la Yerusalem boraahe wa la pɔgɔhe wa tɔnrɛ bo ya mɛhe te ba dɛna ya yamehe. Yamam mɛhe ka tare tuure zo'e zoe Na'ayenɛ ya Yenɛ la nɛŋan? 11Kelehe ya mam, ge bahɛ ya te ya sɔɔnrɔ la te ya nyɔgɛ te ba dɛna yamehe la lebe, ge Na'ayenɛ sunsunyiim wan taɛ bahɛ ya zuo na! 12Te Epraim buuri la poan keendoma basɛba, Yehohanan dayɔa Azaria, Mesilemot dayɔa Berekia, Salum dayɔa Yehizkia, la Hadlai dayɔa Amasa ka sakɛ bo sɛba n nan ze'ele zaberɛ la poan lɛbera na la, 13yele ba yeti, Da tare ya nɛreba wa te ya nyɔgɛ la wa'an ka'lam na! Ya bote to gee la Na'ayenɛ, pa'ahɛ to be'em la to geere seko n pon gan'an la? To be'em la ba' zo'e gaŋɛ mɛ te Yenɛ sunsunyiim tara baha Israel zuo na. 14Te pɛɛntɛɛnreba la bahɛ nɛreba la te ba nyɔkɛ na la, la ba lɔgɔrɔ la kpɛ'ɛndoma la la Israel nɛreba la zan'an nɛŋan. 15Te ba loohe nɛreba, dekɛ nɛreba wa te ba nyɔgɛ na wa, eŋɛ ba nu'uhen, te ba behɛ lɔgɔrɔ la te pɛɛntɛɛnreba la fan' na la poan ganhɛ futo yɛɛlɛ sɛba n ka yɛ futo la, ge bo sɛba woo n ka pire tagara, tagara, bo' ba dia, daam, ge bo' ba kaam te ba sɔn' ba iŋhe, ge bahɛ te sɛba n kan ta'an keŋɛ la zom bonhe zuto, te ba tare ba lebe Yeriko teŋa la n de kpa'kpa' tiihe teŋa la poan, ba mɛhe nɛreba zen'enhen, ge nya lebe ba mɛŋa teŋa Samaria poan na. 16Saŋkaŋa poan la, te naba Ahaz tom la Asiria naba zen'an te a wa'ana soŋɛ en. 17Se'ere n sɔe la, Edom buuri n wa'ana le zabɛ la Yudadoma, nyɔkɛ nɛreba keŋɛ, 18ge te Pilistidoma me wa'ana zabɛ la Yuda teŋse'ehe n boe zɔya tilin la Negev bɔba la, fan' Bet Semes teŋa, Aiyalon, Gederot la Soko teŋhe la se teŋbibihe zan'an, Timna teŋa la ka teŋbibihe, la Gimzo teŋa la ka teŋbibihe, la teŋse'ehe woo n boe bilam la. 19Na'ayenɛ n sigehe Yuda teŋa la dela, Israel naba Ahaz bahɛ te Yuda tom la be'em, ka le ta dɛna birikindoma Na'ayenɛ nɛŋan. 20Bala te Asiria naba Tiglat Pileser wa'ana ton bo en daaŋɔ ge ka soŋɛ en. 21Ahaz dekɛ la Na'ayenɛ Yire poan lɔgɔrɔ toseto, naba yire poan lɔgɔrɔ toseto, la nabiihe yire lɔgɔrɔ toseto pa'ahɛ bo Asiria naba wa, ge bala zan'an, a ka soŋɛ en. 22Ge la en pon bɔna namehegɔ kona wa poan la, naba Ahaz wa ton kelom yɛhera la birikinte poan la Na'ayenɛ. 23A ton kaanbere la Damaskus teŋa baga se'a n nyaŋɛ en la, ge yɛta te Aram teŋa nadoma baga la n soŋɛ ba, bala n me wan kaanbɛ la bama te ba soŋɛ mam. Ge bama n wan lobɛ en la Israel zan'an. 24Te Ahaz vaɛ la Yenɛ Yire lɔgɔrɔ la toseto keŋɛ, ge yo' Na'ayenɛ Yire kolehe la, ge maalɛ a mɛŋa kaanbegɔ zen'enhe Yerusalem bɔbɔrɛ woo. 25Yuda teŋa zen'an woo, a doohe mɛ la kaanbegɔ zen'enhe nyɔ'anra digilom bɔ'ɔra baga, nyiiha Na'ayenɛ n de a sɔdoma Yenɛ la sunsunya. 26Ahaz toonse'a n gee la, la a sɔrɔtɔ zan'an, pɔhega ta paɛ ba'ahegɔ zan'an, golehɛ eŋɛ la Yuda la Israel teŋhe nadoma yɛla gɔŋɔ la poan. 27Te Ahaz kule paɛ a sɔdoma, te ba pin' en Yerusalem teŋa. Ge ba ka pin' en Israel nadoma yɔɔrɔ la poan. Te a dayɔa Hezekia sɔe a na'arɛ dɛna naba.

will be added

X\