2 Yelebiŋ'a 27

1Yotam wa dɛna la yuuma pihiyi' la anuu, ge di na'am, behɛ teŋa la yuuma pia la ayoobe Yerusalem poan. A ma' dela Zadok pɔyɔa te a yu'urɛ yi'ira Yerusa. 2Te Yotam tooma tegɛ Na'ayenɛ nini wo a sɔ Uzia n yuun ane se'em la, ge enŋa ka makɛ te a kɛn' Na'ayenɛ Yire la poan wo a sɔ la. Ge nɛreba la kelom tona la ba ŋmɛlema tooma. 3Te Yotam malom mɛ' Na'ayenɛ Yire la zuin nayaŋa la, ge toŋe dangoone se'ere n boe zoore la n yi'ire Opel la. 4Ge mɛ teŋkanra Yuda teŋa la n yage zoore zuo la, ge mɛ pɛɛntɛɛnreba bɔŋa zen'enhe, la limihego zen'enhe mɔen ha. 5Yotam tɛn' pɛɛma mɛ la Ammondoma zaba nyaŋɛ ba, te naba la yɔ koberɛ n de sanlenpeelega bɔɔrega kɔbega, ki' bɔra tuha pia, la mui bɔra tuha pia yuunɛ denɛ poan la bo Yotam, te Ammondoma la zan'an yɔ bala mea bo en yia yuunɛ la, la yuunɛ se'ere n tagalɛ la, la ta'an yuunɛ la. 6Te Yotam malom kpe'em. Se'ere n sɔe la, a dekɛ a sɛla woo delom la Na'ayenɛ a Yenɛ la. 7Yotam tooma a se'a n gee la, a na'am yɛla la a pɛɛntɛɛnrɛ yɛla la yelese'a te a eŋɛ golehɛ eŋɛ la Israel la Yuda nadoma gɔŋɔ la poan. 8A yuuma pihi la anuu te a di na'am behɛ Yerusalem yuuma pia la ayoobe. 9Yotam kule paɛ a sɔdoma te ba pin' en la David teŋa la poan. Te a dayɔa Ahaz sɔe a na'arɛ dɛna naba.

will be added

X\