2 Yelebiŋ'a 26

1Te Yuda nɛreba zan'an dekɛ Uzia n nan de yuuma pia la ayoobe la, bobe en na'am te a sɔe a sɔ Amazia na'arɛ. 2Enŋa n lebehe zabɛ to'e Elat teŋa te ka le dɛna Yuda sɔ'ɔlom, a sɔ Amazia kum pooren. 3Uzia dela yuuma pia la ayoobe ge di' na'am, behɛ teŋa la yuuma pihinuu la ayi' Yerusalem poan. A ma dela Yerusalem teŋa pɔka te a yu'urɛ yi'ira Yekolia. 4Te Uzia tooma tegɛ Na'ayenɛ nini wo a sɔ Amazia n daa tone se'em la. 5Te Uzia mɔ'ɛ nini la Yenɛ dɔlɔga, saŋsɛka te nɔtɔgɔha Zekaria la te Yenɛ bɔ'ɔra en liligere la bɔkerɛ la nan vɔe la. Uzia n mɔ'ɛ nini la Na'ayenɛ dɔlɔga la, te Yenɛ nu'o paga a zuo. 6Te a zabɛ la Pilistidoma, gbi' Gat, Yabne la Asdod teŋhe dangɔɔma la bahɛ, ge mɛ' teŋkanra Asdod teŋa la, la Pilistidoma teŋhe la poan. 7Te Yenɛ soŋɛ en te a nyaŋɛ Pilistidoma, Arabdoma sɛba n kɛn'ɛre Gur Baal la la Meundoma la. 8Te Ammondoma tara bo'olom kena na po'oha Uzia, te a yu'urɛ yehe zaan ta paɛ Mizraim teŋa beene, en kpe'em la zuo. 9Te Uzia mɛ limihego deto Yerusalem sɛnka nayaŋan la, paberɛ nayaŋan la, la dangoone la n ŋmɛregɛ zen'an la, mɛ dangɔɔma kae tɔ. 10Ge mɛ limihego deto pɔgɔtia poan ha, tun' bulehe kekeko. Se'ere n sɔe la, a tare la dunhe kekeko te se bɔna kuŋkuma zuto la paba poan. Ge tara kaareba te ba tona a vatɔ poan, ge tara sɛba n mi' tia kɔa, te ba bɔna teŋsɛka n yage zoore zuo la zen'se'ehe woo n tare pɔn'ɔhegɔ poan tona. A nɔŋɛ la kɔa. 11Te Uzia tara pɛɛntɛɛnreba n kpemehe ba mɛŋa maahom gura zaberɛ. Ba boe la tansugure tansugure wo ba nɛŋadoma Yeiel n de gɔŋgoloha, la Maaseiah n de kpɛ'ɛma la n pa'alɛ ba se'em la. Hanania n de naba kpɛ'ɛndoma ayema la n de nɛŋadaana. 12Yizuto keendoma sɛba n de pɛɛntɛɛnreba bana wa nɛŋadoma la kanlɛ dela tuha ayi' la kɔbehe seyoobe. 13Pɛɛntɛɛnreba sɛba n boe ba nu'uhen dela tuha kɔbehe setan' la ayopɔe la kɔbehe senuu, kpe'em te ba pɛɛma ka luta teŋa, te ba zabera la naba la diŋdoma. 14Te Uzia bo pɛɛntɛɛnreba la zan'an zaba te'elehe la kana la zuowama la zaba futo la pɛɛma la tiini la kalɔbehe. 15Yerusalem poan, a bahɛ te sɛba n mi' lɔgɔrɔ maalegɔ n maalɛ lɔgɔkanra n wan ta'an tɛɛnra pɛɛma ge lɔbera kugu kanra ba mɛŋa. Te a kpe'eŋo la yeregɛ zen'an woo. Se'ere n sɔe la, a nyɛ la te'elego tara tara ta kpe'em. 16Ge Uzia n ta kpe'em bala la, pa'alɛ n mɛŋa n perɛ en, te a ganlom a mɛŋa, ka le dɛna birikina Na'ayenɛ a Yenɛ la nɛŋan, kɛn' Na'ayenɛ Yire la poan te a nyɔ' ko'ɛnka n bo ko'ɛnka daka la zuo a mɛŋa. 17Te malemadaana Azaria me tare Na'ayenɛ malemadoma pihinii n ka zote dabeem, doohe a poore kɛn'. 18Te ba kɛn' ka sakɛ bo naba Uzia, ge yele en yeti, Hom Uzia ka tare sore te ho nyɔ' zun'uhe bo Na'ayenɛ. La dela malemadoma la n de Aron yaahe la te ba yehe ba ze'ele te ba nyɔ'anra zun'uhe la. Yehe Yenɛ Yire wa poan, ge ho dagɛ birikina, ge me kan tara zuo Na'ayenɛ n de Yenɛ wa nɛŋan, toondena wa la zuo. 19Te Uzia n ze' ge zanla zun'uhe nyɔ'an dokɔ la a nu'uhen te a nyɔ' ko'ɛnka la sunsunya nyie. A sunsunya la n nyiire la malemadoma la, te iŋsagaŋɔ to'e a a gbe'ere wa bilam bilam, malemadoma la nɛŋan, Na'ayenɛ Yire la poan, ko'ɛnka daka la zen'an. 20Te malema nɛŋadaana Azaria la a taaba la zan'an beha en, ba nyɛ te iŋsagaŋɔ ban'an n to'e a gbe'ere. Te ba kanbela tara n yɛha, Yenɛ yire la, te a mɛŋa me kanbela te a yehe kalam, la Yenɛ n ŋmɛ' en la ban'an la. 21Naba Uzia tare iŋsagaŋɔ ban'an wa la bala ta ki la a ban'an wa. A kɛn'ɛre la a ma'an yire poan la ban'an wa. Se'ere n sɔe la, ba ŋmaɛ en Na'ayenɛ nɛreba la poan bahɛ mɛ ban'an la zuo, te a dayɔa Yotam sɔe naba yire la gankera nɛreba la ge behera teŋa la zan'an. 22Uzia tooma zan'an, a pɔhega yɛ'a ba'ahegɔ, Amoz dayɔa Isaiah n golehɛ a zan'an. 23Te Uzia kule paɛ a sɔdoma, te ba pin' en nadoma samanɛ la poan lɛm la nadoma yɔɔrɔ la. Se'ere n sɔe la, ba yeti a dela konkone. Te a dayɔa Yotam sɔe a na'arɛ dɛna naba.

will be added

X\