2 Yelebiŋ'a 24

1Yoas dela yuuma ayopɔe ge di na'am, zin'an a na'am gɔŋɔ zuo Yerusalem poan, behɛ teŋa la yuuma pihinaahe. A ma yu'urɛ dela Zibia, yehe Beerseba teŋa na. 2Te Yoas wa ete sɛla n de ma'an Na'ayenɛ nɛŋan, malemadaana Yehoiada saŋa la poan zan'an. 3Te Yehoiada wa di pɔgɔba bayi' bo Yoas, te a dɔgɛ dayɔɔhe la pɔyɔɔhe. 4Yele ana wa pooren, te Yoas ta lo' a potɛn'ɛrɛ te a malom maalɛ Na'ayenɛ Yire la. 5Bala te a yi' malemadoma la Levidoma la yele ba yeti, Dole ya Yuda teŋhe wa woo poan yuunɛ woo tɔ'ɔha ligiri Israeldoma wa woo zen'an na te to maala Yenɛ yire wa. Eŋɛ ya yele dena wa kalam. Ge Levidoma la ka eŋɛ yele wa kalam. 6Bala te naba Yoas yi' malema keema Yehoiada na soke en yeti, Bene te ho ka bahɛ te Levidoma la doohe Yuda la Yerusalem teŋhe poan to'ohe koba se'a te Moses n de Na'ayenɛ yameŋa la yuun bahɛ te Israel lagaŋɔ la yɔɔra bɔ'ɔra Yenɛ Sogorɛ la tare na? 7Se'ere n sɔe la toonfɛn'ɛhadaana Ataliah kɔma la ɛnkɛ kɛn' Yenɛ yire la poan mɛ ta pon degehɛ toolom lɔgɔrɔ la n boe Na'ayenɛ Yire la poan la tona bɔ'ɔra Baal baga. 8Te naba wa bo nɔɔrɛ te ba maalɛ daka, ze'ele ka Na'ayenɛ Yire la koleŋa nɔɔrɛn na. 9Ge doohe Yuda la Yerusalem teŋhe poan mɔɔlɛ yeti, nɛra woo yɔ koba se'a te Moses n de Yenɛ yameŋa la yuun bahɛ te Israel yɔɔra saŋsɛka te ba yuun bɔna pɔgɔtia poan ha la. 10Te kpɛ'ɛndoma la zan'an la nɛreba la zan'an nyeena, ge tare ba koba la na eta daka la poan ta ba'ahɛ zan'an. 11Ban ete se'em dela, Levidoma la han ne tare daka la kɛn' na bo naba kpɛ'ɛndoma wa, te ba behɛ te ligiri la zo'e mɛ bini, naba gɔŋɔ goleha la malema nɛŋadaana ligiri kpɛ'ɛma ne wan ka'ɛ daka la, ge lebehe tare ka ta ze'ele ka ze'elego zen'an la. Ba ete la wana daarɛ woo, to'ohe ligiri la zo'e zo'e. 12Te naba la Yehoiada dekɛ ligiri wa bo sɛba n tone Na'ayenɛ Yire la tooma la, la mɛteba la kpa'areba sɛba te degehɛ te ba tona Na'ayenɛ Yire la maalegɔ tooma la, la sɛba n tone yire la maalegɔ zen'se'ehe n de kuto la nyɔgom tooma la. 13Nɛreba la n tone se'em n bala, te yire la maalegɔ la kena kalom kalom. Ba malom maalɛ de mɛ wo yire la n daa ane se'em la, te Yire la malom tara paŋa. 14Ban ba'ahɛ la, ba tare ligise'a n gee la mɛ na bo naba la Yehoiada, te ba bahɛ te ba dekɛ i maalɛ yire poan lɔgɔrɔ bo Na'ayenɛ Yire la. Ba maalɛ la lɔgɔseto n wan tara tona nyɔ'an tooma, laahe kanra, la sanlema la sanlenpeelega lɔgɔrɔ, te ba nya nyɔ'anra nyɔ'an bo'olom saŋa woo bɔ'ɔra Na'ayenɛ, Yehoiada vom yuuma la poan zan'an. 15Yehoiada ta ba' korogɛ mɛ ge nya ki. A yuuma kɔbega la yuuma pihitan' poan te a ki, 16te ba pin' en naba David teŋa la poan, nadoma yɔɔrɔ poan la enŋa n tom soŋa bo Israel, la Yenɛ, la a Yire la. 17Yehoiada n ki tole la, pooren te Yuda kpɛ'ɛndoma wa'ana dekɛ ba mɛhe bo naba la, te naba la to'e ba. 18Ba zagahɛ Na'ayenɛ Yire la mɛ. Ba zagahɛ ba sɔdoma Yenɛ la mɛ ge kaanbera Aserah bagarɛ dɔɔrɔ, la baga, te Na'ayenɛ sunsunyiim taɛ bahɛ Yuda la Yerusalem zuo, tuure dena wa zuo. 19Ge la bala zan'an, Na'ayenɛ tom la nɔtɔgɔheba bo ba na, te ba tare nɛreba wa lebe Na'ayenɛ zen'an na. Ge la nɔtɔgɔheba la n pon tɔgɔra bahɛ ba zuo la me, ba pon ka kɛleha. 20Te Yenɛ paŋa sige malemadaana Yehoiada dayɔa Zekaria zuo, te a ze'ele nɛreba la poan yele ba yeti, Yenɛ yeti ya, bene te ya ganlona Na'ayenɛ nɔya la? Yenɛ nu'o kan bɔna ya zuo. Yamam n zagahɛ Na'ayenɛ la zuo, a me zagahɛ ya mɛ. 21Te ba naɛ taaba gɔngelena la en, te naba la bo ba nɔɔrɛ te ba lobe en ko Yenɛ yire zenzaka la poan. 22Naba Yoas ka tɛnre etesoŋɔ seko te Zekaria sɔ Yehoiada tom bo en la, ge ko a dayɔa wa Yenɛ yire zenzaka la poan. Zekaria la n ta kiira la, a yeti, Na'ayenɛ, suunre behɛ yele wa ge lerege de. 23Te yuunɛ ta kaara na, te Aram teŋa pɛɛntɛɛnreba wa'ana na zabɛ la Yoas, zabɛ la Yuda la Yerusalem, ko kpɛ'ɛndoma la zan'an n boe teŋa la poan la ge vaɛ lɔgɔrɔ la zan'an tare lebe ta bo ba teŋa Damaskus naba. 24Yelemɛŋɛrɛ, Aram teŋa pɛɛntɛɛnreba wa ka wa'an zo'e na, ge Na'ayenɛ n de ba sɔdoma Yenɛ la n dekɛ pɛɛntɛɛnreba bɔbɔgɔ la eŋɛ ba nu'uhen. Se'ere n sɔe la, Yuda zagahɛ Na'ayenɛ n de ba sɔdoma Yenɛ la mɛ. Bala zuo te nɛreba wa nyaŋɛ pɔgɔlom Yoas. 25Aram teŋa pɛɛntɛɛnreba la n ta keŋɛ ge bahɛ Yoas la, te a pon banlɛ mɛ, te a mɛŋa yamehe yehe a pooren la enŋa n ka'ɛ malemadaana Yehoiada dayɔa ziim la, me ko en a soŋɔ zuo. Te a ki te ba pin' en naba David teŋa la poan, ge ba ka pin' en nadoma yɔɔrɔ la poan. 26Sɛba n wa yehe a pooren la dela, Simeat n de Ammon teŋa pɔka la dayɔa Zabad la Simrit n de Moab teŋa pɔka la dayɔa Yehozabad. 27Han dɛna a dayɔɔhe, yelese'a n daa porɛ bahɛ a zuo, la en malom mɛ Yenɛ yire la yɛla la golehɛ eŋɛ la nadoma yɛla gɔŋɔ la poan. N ki la, a dayɔa Amazia n sɔe a na'arɛ dɛna naba.

will be added

X\