2 Yelebiŋ'a 23

1Yuuma ayopɔe poan, te malemadaana Yehoiada me bi'ihe a mɛŋa, te zaba nɛŋadoma Yeroham dayɔa Azaria, Yehohanan dayɔa Ismael, Obed dayɔa Azaria, Adaiah dayɔa Maaseiah la Zikri dayɔa Elisapat n behere pɛɛntɛɛnreba kɔbehe kɔbehe la naɛ nɔɔrɛ la en. 2Te ba doohe Yuda teŋa zan'an lagahɛ Levidoma, yizuto keendoma la yiredaandoma zan'an n boe Yuda la Yerusalem teŋhe poan na. 3Te lagaŋɔ la zan'an naɛ nɔɔrɛ la naba wa Yenɛ yire la poan. Te Yehoiada yele ba yeti, Behɛ ya, naba dayɔa n wan dɛna naba wo Na'ayenɛ n tɔgɛ se'em bo naba David yire wa la. 4Ya wan eŋɛ se'em n wana. Yamam malemadoma la Levidoma sɛba n kene Vo'ohogo Daarɛ na la, ya porogerɛ boyena botan' poan wan gura Yenɛ yire kolehe la, 5te ya porogerɛ deyema gura naba yire, te boyena la me gura ɛnberɛ nayaŋa la, ge te nɛreba la zan'an kɛn' Na'ayenɛ Yire la zenzagahe la poan na. 6Ge da bahɛ te nɛra se'em kɛn' Na'ayenɛ Yire la poan han dagana malemadoma la la Levidoma la n tone ko poan la. Bama dela toolom nɛreba. Ge nɛra woo nana Na'ayenɛ nɔɔrɛ. 7Levidoma la n wan gura naba la. Ba woo tara ba zaba lɔkɔ ba zaba lɔkɔ. Nɛra yoo han kɛn' Yenɛ yire la na, ba ko' a daana. Naba la han yɛhera na, ba dɔla en, a han lɛbera kɛn'ɛra ba dɔla en bala. 8Te Levidoma la, la Yuda nɛreba la zan'an eŋɛ malemadaana Yehoiada n pa'alɛ se'em la. Te ba woo tara ba nɛreba, te sɛba n boe tooma Vo'ohogo Daarɛ la tona, te sɛba n de ba kule Vo'ohogo Daarɛ la yee pa'ahɛ. Se'ere n sɔe la, Yehoiada ka bo sore te se'em kule. 9Te malemadaana Yehoiada dekɛ kana kɔbega kɔbega, la zaba te'elehe kanra la bonpegehe la n de naba David denɛ bɔna Yenɛ yire la poan la bo zaba nɛŋadoma la woo. 10Te a bahɛ te nɛra woo tara a zaberɛ lɔkɔ a zaberɛ lɔkɔ, zɛ'a a ze'elego a ze'elego zen'an yire la zuɔ la de gɔbega, ge ze'ele kae kaanbegɔ daka la Yenɛ Yire la naba la. 11Te ba nya tare naba la dayɔa la yehe na dekɛ na'am muŋa vugule en, dekɛ nɔbiŋere gɔŋɔ la eŋɛ a nu'uhen nya bobe en na'am. Te malemadaana Yehoiada la a dayɔɔhe la sɔ' en la kaam ge voole yeti, Naa, naa, naba! 12Ataliah n ta wom te nɛreba la zote ge vɔɔla pɛngera naba la, te a wa'ana kɛn' Na'ayenɛ Yire la poan nɛreba la zen'an na. 13A behɛ te naba la n bala zɛ'a na'am zɛɛnrɛ la zen'an, koleŋa nɔɔrɛn na, te zaba nɛŋadoma la tentana pɛɛbereba zɛ'a kae en, te teŋa la nɛreba la zan'an perɛ la nyeema ge pɛɛbera tentana, te yoonyooneba tara ba bonŋmɛ'ɛla bɔna nɛŋa la pɛnka yooma. Te Ataliah aanhom a futo te a yɛ, ge kaahɛ yeti, Ba ŋma' mam, ba ŋma'! 14Te malemadaana Yehoiada yi' zaba nɛŋadoma la n behere pɛɛntɛɛnreba kɔbega kɔbega la na bo ba nɔɔrɛ yeti, Nyɔkɛ ya en tare yehe yeŋa ta kɔrɔgɛ en. Se'em woo n dole a poore, ko a daana me. Da ko ya en Na'ayenɛ Yire wa poan. 15Te ba gin' en, tare en ta paɛ yeho nayaŋa la n boe naba yire la, kɔrɔgɛ en bilam. 16Te Yehoiada nya biŋe nɔɔrɛ bo a mɛŋa, nɛreba la la naba la te ba wan dɛna Na'ayenɛ nɛreba. 17Te nɛreba la zan'an bibige keŋɛ Baal bagarɛ yire la poan ta gbi' yire la ge wɔnrɛ de bimbina la la bagara la, ge ko Matan n kaanberɛ a la biŋe bimbina la nɛŋan. 18Yehoiada nya dekɛ Na'ayenɛ Yire tooma la woo eŋɛ malemadoma la nu'uhen. Bama n de Levidoma te naba David yuun loe ba te ba sɔna Na'ayenɛ Yire la behera, nyɔ'anra nyɔ'an bo'olom bɔ'ɔra Na'ayenɛ wo lan golehɛ Moses Pa'alegɔ la poan, la yooma la pɛnka wo David yele ba se'em. 19A bahɛ te sɛba n gure Na'ayenɛ Yire nayahe la gura de soŋa te dɛngerɔdaana da kɛn' bini. 20Te a nya ihege la zaba nɛŋadoma la n behere pɛɛntɛɛnreba kɔbehe kɔbehe la, nɛrezura doma keendoma la n behere nɛreba la, la teŋa la nɛreba la zan'an, te ba nya tare naba la doohe Na'ayenɛ Yire la koleŋa sɛka n boe nɛŋa ha la poan yehe na paɛ naba yire la poan, nya bahɛ te a zin'ire na'am gɔŋɔ la zuo. 21Te teŋa la nɛreba la nyeena, te sunma'ahom bɔna teŋa la poan. Se'ere n sɔe la, ba nyaŋɛ ko Ataliah.

will be added

X\