2 Yelebiŋ'a 2

1Te Naba Solomon bo nɔɔrɛ te ba mɛ yire bo Na'ayenɛ yu'urɛ la na'ahegɔ zen'an, ge mɛ na'am yire bo enŋa mɛŋa. 2Bala te Naba Solomon loe boraahe tuha pihiyopɔe te ba dɛna ziireba, ge loe basɛba tuha pihinii te bama ŋmata kuga zɔya zuto, ge loe basɛba me tuha atan' la kɔbehe seyoobe te bama kaara tontoneba wa woo behera. 3Te Naba Solomon nya tom sɔɔleŋa bo Hiram n de Tire teŋa naba la yeti, Wo hom yuun ane la mam sɔ Naba David se'em, yuun bo en mɔlɔsonɔ tiihe te a mɛ a yire kɛn'ɛra la, eŋɛ bala bo mam me na. 4Behɛ, n boe bini te n mɛ la yire bo Na'ayenɛ n de n Yenɛ la yu'urɛ, te n nyɔ'anra digilom de poan bɔ'ɔra en, ge biŋera toolom boroboro la bini saŋa woo, ge kaanbera nyɔ'an bo'olom bolika la zanɔɔrɛ, la Vo'ohogo Dabeha la ŋmarepaalehe de'enɔ, la de'enɔ seto woo te Na'ayenɛ to Yenɛ la loohe te to dɛ'ɛna la de poan. Yele ana n de sɛla te Israel buuri la wan eta saŋa woo. 5Yenɛ yire se'ere te n wan mɛ la wan dɛna la yikantɛ. Se'ere n sɔe la, tomam Yenɛ la dela Yenɛ kantɛ gana yena woo. 6Ge ane n wan ta'an mɛ yire bo en? Saazuo, la zuin zuin han ka seke a kɛn'an zen'an. Mam dela ane wan ta'an mɛ yire bo en han dagana n nyɔ'anra nyɔ'an bo'olom bɔ'ɔra en? 7Bala, bo mam nɛresɛba n tare sanlema, sanlenpeelega, nyɔgom la kuto lɔgɔrɔ maalegɔ yam, ge me mina tansabela, tanmɔla la tanpoonhogɔ, lɔgɔrɔ pɛ'a, ge mina gologa, te ba wa'ana naɛ la mam nɛresɛba n boe Yuda la Yerusalem poan te mam sɔ Naba David yuun loe ba la tom. 8Ho me bo mam Lebanon teŋa dɔɔsonɔ buuri totan' la na. N mi' te hom yamehe la mi' Lebanon teŋa dɔɔrɔ wa ŋmaa soŋa soŋa. Bala mam nɛreba sɛba n mi' toon denɛ la wan naɛ la ba tona, 9te ba ŋma mɔlɔsonɔ tiihe la peelesonɔ tiihe la sabelesonɔ tiihe wa bo mam na. Se'ere n sɔe la, yire se'ere te n bɔna bini te n mɛ wa wan dɛna la yire n boe deyema. 10Behɛ, n wan yɔ ho dɔŋmateba la ki' soma dogorɔ tuha pihiyi', la mui me dogorɔ tuha pihiyi', daam dogorɔ tuha pihiyi' la kaam dogorɔ tuha pihiyi'. 11Te Tire naba Hiram lebehe gɔŋɔ bo Solomon na yeti, Na'ayenɛ nɔŋɛ a nɛreba wa mɛ n sɔe te a dekɛ ho eŋɛ ba naba wa. 12Hiram tɔgɛ pa'ahɛ yeti, Pɛnka dɛna Na'ayenɛ wa n de Israel Yenɛ wa, naam saazuo la teŋparɛ wa denɛ. Yenɛ dena n bo Naba David dayɔa, te ka tara yam, te baŋerɛ pereka, te ka tara bɔkerɛ la mi'ilom zo'e zo'e te ka mɛ yire bo Na'ayenɛ, ge mɛ na'am yire bo a mɛŋa wa. 13Nananawa, n tone la Huram Abi n tare lɔgɔrɔ maalegɔ mi'ilom ge me tara bɔkerɛ na, 14a ma dela Dan buuri, te a sɔ dɛna Tire teŋa nɛra. Enŋa n mi' sanlema, sanlenpeela, nyɔgom, kuto, kuga, dɔɔrɔ, tansabela, la tanmɔla, la tanpoonhogɔ, la lɔgɔrɔ maalegɔ, ge tana gola bɔlombɔlehe yema yema. A me wan ta'an tom toonse'ere woo te ho ho bo en. A wan wa'ana na naɛ la hom nɛresɛba n mi' toon ana wa la, la mam daana ho sɔ Naba David nɛreba la te ba tona. 15Ge hom n daana wa bahɛ te ki', la kaam, la daam sebo te ho yele la paɛ mam na wo hom yele se'em la. 16Tomam wan ŋma Lebanon teŋa dɔɔsonseto woo te ho bɔta la pugule ko'kantɛ la poan te to paɛ hɔ Yoppa teŋa nɔɔrɛn na te ho vaɛ keŋɛ Yerusalem. 17Te Solomon kaanlɛ saama woo n boe Israel teŋa la, doohe la a sɔ naba David n yuun kaanlɛ se'em la, te ba kanlɛ la dɛna tuha kɔbega la tuha pihinuu la atan', la nɛre kɔbehe seyoobe. 18Te a loe ba poan tuha pihiyopɔe te bama ziira, ge te ba tuha pihinii me ŋmata kuga zɔya zuto, ge te ba tuha atan' la kɔbehe seyoobe behera ba te ba tona.

will be added

X\