2 Yelebiŋ'a 19

1Te Yuda naba Yehosapat lebe ta paɛ a yire Yerusalem teŋa la iŋma'ahom, 2te Hanani dayɔa Yehu n de behera la to'ohɛ en na, yele naba Yehosapat wa yeti, La ane soŋa te ho soŋora toonfɛn'ɛhadoma, ge nɔŋɛ sɛba n yaɛ Na'ayenɛ, te la bahɛ te daaŋɔ ze'ele Na'ayenɛ zen'en sige ho zuo na? 3Ge yelesonɛ boe ho poan doohe la hom vɔn' Aserah baga la teŋa la poan bahɛ, ge lo' ho suunre te ho dɔla Yenɛ la. 4Te Yehosapat bɔna Yerusalem poan, ge doohe a sɔ'ɔlom la poan, ze'ele Beerseba ta paɛ Epraim teŋa n yage zoore zuo la, kan'an ba, ŋmɛregɛ ba sunya lebe Na'ayenɛ n de ba sɔdoma Yenɛ la zen'an na. 5Ge loohe yelegankereba bahɛ Yuda teŋse'ehe woo te dangɔɔma mɛ kae se la poan. 6A yele ba yeti, Behɛ ya toonɛ soŋa ge ya ka tone bɔ'ɔra nɛresaala, ya tone bɔ'ɔra la Na'ayenɛ se'ere n ne bɔna la ya te ta'an gankɛ yele la. 7Bala, bahɛ ya te Na'ayenɛ zɔɔlom bɔna ya poan. Behɛ ya yan ete sɛla woo la soŋa. Se'ere n sɔe la Na'ayenɛ to Yenɛ la nu'o kan bɔna sɛla n dagɛ tontɔɔ bii ninkɔɔri bii mu'ure bo'olom to'ore poan. 8Yerusalem poan me, Yehosapat loohe la Levidoma basɛba, malemadoma la Israel yizuto keendoma basɛba te bama ze'ele Na'ayenɛ na'arɛ gankera nɔkpɛ'ɛma se'a woo n boe Yerusalem nɛreba teŋasoka. 9Ge kan'an ba yeti, Tone ya la Na'ayenɛ zɔɔlom, la birikinte la ya suunre zan'an. 10Nɔkpe'en se'ere han ne ze'ele ya sɔɔnrɔ sɛba n boe teŋkanra la poan la wa'an ya zen'an na, dɛna la ziim ka'ahegɔ bii pa'alegɔ la bii nɔya bii malema bii nɔze'elego. Ya kan'an ba la ninmɔ'ɔrɛ te ba da gee Na'ayenɛ de poan, te sunsunyiim da taɛ bahɛ yamam la ya sɔɔnrɔ la zuo. Ete ya bala la ya da tara geere. 11Behɛ ya, Malemadoma keema Amaria wan bɔna ya nɛŋa yelese'a n de Yenɛ toonɛ la poan, te Ismael dayɔa Zebadia n de Yudadoma keema la wan sɔna yelese'a n de naba toonɛ la behera. Levidoma la wan soŋora ya. Tone ya soŋa ge Na'ayenɛ wan bɔna la se'em n de tontɔɔdaana.

will be added

X\