2 Yelebiŋ'a 18

1Yehosapat nyɛ lɔgɔrɔ mɛ panrɛ dɛna zuodaana ge dekɛ mɛŋa naɛ la Israel naba Ahab pɔgɔdire poan. 2Yuunɛ deyema te a keŋɛ te a ta behɛ Ahab Samaria poan. Te Ahab ko piihe la lɔlehe kekeko bo Yehosapat la nɛresɛba n doohe en na la. Ge nya pan'ahɛ en te a keŋɛ ta zabɛ la Aramot Gilead teŋa. 3Israel naba Ahab wa soke Yuda naba Yehosapat yeti, Ho wan doohe la mam ta zabɛ la Aramot Gileaddoma wa? Te Yehosapat lerege en yeti, Mam dela hom, te mam nɛreba dɛna ho nɛreba, bala to wan bɔna la hɔ pɛɛntɛɛnrɛ la poan. 4Ge Yehosapat yele Israel naba wa yeti, Ton ɛ la Na'ayenɛ potɛn'ɛrɛ yia. 5Bala te Israel naba wa lagahɛ nɔtɔgɔheba la te ba dɛna kɔbehe senaahe, te a soke ba yeti, To keŋɛ ta zabɛ la Aramot Gileaddoma wa bii n bahɛ? Te ba lerege yeti, Naba, keŋɛ ge Yenɛ wan dekɛ ba eŋɛ ho nu'uhen. 6Ge Yehosapat soke n yeti, Na'ayenɛ nɔtɔgɔha ayema ka le bɔna te to wan soke enŋa me? 7Te Israel naba wa lerege Yehosapat yeti, Nɛra ayema gee ya te to wan soke en Na'ayenɛ potɛn'ɛrɛ, ge mam yaɛ en mɛ. Se'ere n sɔe la, a ka pote yelesoma bɔ'ɔra mam han dagana be'em yɛla ma'an daarɛ woo. A dela Imla dayɔa Mikaiah. Te Yehosapat yeti, Naba, da tɔgɔra bala. 8Te Israel naba wa yi' a kpɛ'ɛma ayema na yeti, Keŋɛ ta tare Imla dayɔa Mikaiah kalam na. 9Israel naba la Yuda naba Yehosapat zin' la ba koka ba koka zuo bagɛ ba na'am futo zin'an dia tɔa zen'an n boe Samaria teŋa nayaŋa nɔɔrɛn la, te nɔtɔgɔheba la woo zɛ'a ba nɛŋan pota. 10Te Kenaanah dayɔa Zedekia maalɛ kuto iila a mɛŋa ge yeti, Na'ayenɛ yeti, Iila ana te ho wan dekɛ vorɛ Aramdoma wa ta ko ba zan'an. 11Nɔtɔgɔheba la zan'an pote la bala mea yeti, Zom Aramot Gilead ge ho wan ta nyaŋɛ. Na'ayenɛ wan dekɛ ba eŋɛ hom naba nu'uhen. 12Te bitonoŋa la te ba tom te a yi' Mikaiah na la paɛ yele en yeti, Behɛ, nɔtɔgɔheba la tɔgɔre yelehom boyena bɔ'ɔra naba la wo n bote se'em la. Bala n belone ho mɛ te ho ta tɔgɔra wo bama n tɔgɔre se'em la, tɔgɔra naba la n bote se'em la. 13Te Mikaiah yeti, Mam pɔ' la Na'ayenɛ wa yeti, Mam Yenɛ wa n yelese'ere la, denɛ te mam wan yele bo en. 14Mikaiah n paɛ naba la zen'an na la, te naba la yele en yeti, Mikaiah, to keŋɛ ta zabɛ la Aramot Gileaddoma wa bii n bahɛ? Te a lerege yeti, Keŋɛ mɛ, keŋɛ ge ho wan nyaŋɛ. Ba wan dekɛ ba eŋɛ ho nu'uhen. 15Te naba la yele en yeti, Sugumnɔɔren bolɛ te ho bɔta te n yele ho te ho da porɛ ponpɔrɔŋɔ bo mam han dagana yelemɛŋɛrɛ ma'an Na'ayenɛ yu'urɛ la poan? 16Te Mikaiah nya yeti, Mam nyɛ te Israeldoma yeregɛ mɛ bagalage zɔya la zuto wo piihe n ka tare duŋkeena la, te Na'ayenɛ yeti, Nɛrebana wa ka tare daana, bahɛ te ba woo lebe kule ba yire la sunma'ahom. 17Te Israel naba la yele Yehosapat yeti, N ka yele ho yeti a kan porɛ yelesonɛ bo mam han dagana be'em ma'an? 18Te Mikaiah yeti, Bala zuo kelehe Na'ayenɛ yelehom wa. Mam nyɛ me te Na'ayenɛ zin'an a na'am koka zuo, te saazuo doma la zan'an zɛ'a a zuɔ la a gɔbega. 19Te Na'ayenɛ yeti, Ane wan pan'ahɛ Israel naba Ahab te a ta ki Aramot Gileaddoma nu'uhen? Te ayema yeti wana, te ayema yeti wana. 20Te pan'ahegɔ sea tole na ze'ele Na'ayenɛ nɛŋan yeti, Mam wan pan'ahe en. Te Na'ayenɛ soke en yeti, Sɔrɔɔ kone poan? 21Te sea la yeti, N wan bo a nɔtɔgɔheba la zan'an ponpɔrɔŋɔ paŋa. Te Na'ayenɛ yeti, Hom seren wan nyaŋɛ. Keŋɛ ta eŋɛ bala. 22Bala, Na'ayenɛ dekɛ la ponpɔrɔŋɔ sea eŋɛ ho nɔtɔgɔheba bana wa nɔyan. Ge Na'ayenɛ yeti, Nɔyalegerɛ ma'an n wan sige ho zuo. 23Bilam te Kenaanah dayɔa Zedekia fɔnbɛ Mikaiah sapɛnka, ge yeti, Na'ayenɛ sea la bahɛ mam la wane ma'an ge tɔgɛ bo hom? 24Te Mikaiah lerege en yeti, Behɛ, daanse'ere daarɛ te ho wan zɔ ta sogɛ la te ho wan baŋɛ. 25Te Israel naba la yeti, Tare ya Mikaiah lebe ta bo teŋbehega nɛŋadaana Amon n behere teŋa la, la a dayɔa Yoas la, 26ge yele ba yeti naba yeti, Pagɛ ya nɛre'ena wa, da bɔ'ɔra ya en dia la ko'om soŋa, gura te n lebe yɔle yɔle na. 27Te Mikaiah yele en yeti, Hom wa han lebe yɔle yɔle na, Na'ayenɛ ka tɔgɛ doohe mam poan. Yamam sɛba woo n ze' wa, kelehe ya. 28Te Israel teŋa naba, la Yuda teŋa naba Yehosapat ta keŋɛ pɛɛntɛɛnrɛ la Aramot Gileaddoma. 29Te Israel teŋa naba la yele Yehosapat yeti, Mam wan yɛɛhɛ n na'am futo la ge kɛn' zaberɛ la poan, ge hom bagɛ ho na'am lɔgɔrɔ la kɛn'. 30Ge Aram teŋa naba la bo a zaba nɛŋadoma sɛba a tare a zaba yiri toroto la nɔɔrɛ yeti, Da zabɛ ya la nɛra se'em, bia bii bonkotɛ. Zabɛ ya la Israel naba la ma'an. 31Bala, nɛŋadoma la n tare zaba yiri toroto la n ta nyɛ Yehosapat la, ba yeti, Israel naba la n wana. Nya ŋmɛregɛ zabera la en. Te Yehosapat kaahɛ bahɛ na, te Na'ayenɛ soŋɛ en, ŋmɛregɛ ba nɛhe yehe a zen'an. 32Zaba toroto nɛŋadoma wa n ta baŋɛ te a dagɛ Israel naba la, ba bahɛ a dika mɛ ge ŋmɛregɛ. 33Te boraa kayema ve'e ka tanhɔ yeen tɛn' bahɛ ha yoo, te pɛɛnɛ la ta doohe Israel naba la zaba tɛ'ɛlega la yoko peka poan nyɔkɛ Israel naba la. Te a yele sɛba n tukure a zaba toroko la yeti, Ŋmɛregɛ ya tare mam yehe zaberɛ wa poan ge n ba' pɔgɔlom mɛ. 34Te zaberɛ la ba' mɔ'ɛ de daarɛ, te Israel naba wa uma a zaba toroko la poan Aramdoma la nɛŋan na, ta ki zanɔɔrɛ.

will be added

X\