2 Yelebiŋ'a 14

1Te Abiya kule paɛ a sɔdoma, te ba pin' en naba David teŋa la poan, te a dayɔa Asa sɔe a na'arɛ dɛna naba. Asa saŋa la poan, daaŋɔ ka le sige teŋa la poan yuuma pia. 2Asa tone sɛla n ane soŋa Na'ayenɛ a Yenɛ la nɛŋan. 3A doohe gbi' sateŋhe baga kaanbegɔ zen'enhe la, la ba zɔya zuto po'ohegɔ zen'enhe la, la kuga se'a te ba kaanbera la, ge kɔ' Aserah bagarɛ dɔɔrɔ la te ba sɛ la bahɛ. 4A bo Yudadoma nɔɔrɛ te ba dɔla Na'ayenɛ n de ba sɔdoma Yenɛ la, ge dɔla a pa'alegɔ la a nɔze'elego la. 5A me sagom kaanbegɔ zen'enhe la ko'ɛnka zen'enhe la Yuda teŋhe la woo poan bahɛ, te daaŋɔ ka bɔna ka poan. 6Te a mɛ teŋhe Yuda teŋa la poan mɛ dangɔɔma kae se. Se'ere n sɔe la, daaŋɔ ka boe teŋa la poan, te se'em me ka zabera la ka yuuma aŋa woo poan. Se'ere n sɔe la Na'ayenɛ n bo ba vo'ohogo. 7Te a yele Yudadoma wa yeti, Bahɛ ya te to mɛ dangɔɔma, la limihego deto kae teŋhe wa, kɛn'ɛhɛ se nayahe dekɛ kuto kɛn'ɛhɛ se poan. Teŋa la kelom dɛna la to denɛ, la tomam n nam Na'ayenɛ to Yenɛ la zuo. A bahɛ te to tara sunma'ahom mɛ bɔbɔrɛ woo. Te nɛreba la eŋɛ bala, nyɛ tebehom. 8Asa pɛɛntɛɛnreba kanlɛ Yuda poan ma'an dela tuha kɔbehe setan' n tare zaba te'elehe kanra la kana, te Benyamin poan dɛna tuha kɔbehe seyi' la pihinii zanla tɛ'ɛlehe bibihe ge pɛnga logoro, te ba zan'an dɛna sɛba n mi' zaberɛ. 9Te Kus teŋa naba Zera ihege la pɛɛntɛɛnreba tuha kɔbehe pia, la zaba yiri toroto kɔbehe setan' wa'an Maresa teŋa na te a zabɛ la Yudadoma wa. 10Te Asa me maahom yehe to'ohɛ n Zepata teŋa paberɛ n boe la Maresa la. 11Te Asa yi' Na'ayenɛ a Yenɛ la yeti, Na'ayenɛ, se'em ka boe wan ta'an zabɛ bo taromdoma sɛba te paŋadoma zabera la ba wa. Bala Na'ayenɛ to Yenɛ wa, soŋɛ tɔ ge tomam dele la hom, ge dekɛ la hom yu'urɛ la to'oha kooŋɔ wa. Na'ayenɛ, hom de tomam Yenɛ, da bahɛ te se'em nyaŋɛ hɔ. 12Te Na'ayenɛ damɛ Kusdoma wa, te ba zɔta yeregera Asa la Yudadoma la nɛŋan. 13Te Asa la a pɛɛntɛɛnreba la n boe la en la dige ba ta paɛ Gerar teŋa, ko Kus pɛɛntɛɛnreba ba kekeko te ba kan le nyaŋɛ eŋɛ se'ere. Se'ere n sɔe la, ba lu la Na'ayenɛ la a pɛɛntɛɛnreba nu'uhen. Te Asa la a nɛreba wa fan' lɔgɔrɔ zo'e zo'e lebe. 14Te ba sagom teŋkanra se'ehe woo n lɛm Gerar teŋa la. Se'ere n sɔe la, Na'ayenɛ n dekɛ ba tuunle sagaŋɔ, te Yudadoma la sagom ba teŋhe la, ge fan' lɔgɔrɔ zo'e zo'e. Se'ere n sɔe la lɔgɔrɔ n perɛ teŋhe la poan. 15Yudadoma wa me ko' sɛba n ugure dunhe zen'an la poan mɛ, ge pe'e piihe la kekeko la yogoma lebe Yerusalem na.

will be added

X\