2 Yelebiŋ'a 12

1Arehoboam sɔ'ɔlom wa n ta sɛ ba'ahɛ kpe'em la, enŋa la Israel zan'an nya zagahɛ Na'ayenɛ pa'alegɔ la mɛ. 2Te Arehoboam zin'an na'am gɔŋɔ zuo ta paɛ yuuma anuu, ge doohe la bama n le dagana birikindoma Na'ayenɛ nɛŋan la zuo, te Mizraim teŋa naba Sisak wa'ana zabɛ la Yerusalem. 3A tare la zaba yiri toroto tuhure la kɔbehe seyi' la yiri ban'areba tuha pihiyoobe, te nɛresɛba n doohe a poore wa'ana la ka tare kanlɛ. Ba ze'ele la Libya la Suk la Kus teŋhe na. 4Te ba zabɛ nyaŋɛ Yuda teŋkanra la te dangɔɔma mɛ kae se la na paɛ Yerusalem. 5Te Semaiah n de nɔtɔgɔha la wa'an Arehoboam la Yuda nabiihe la te Sisak dabeem kɛn' ba te ba kan'ahɛ taaba na bɔna Yerusalem la yeti, Na'ayenɛ yeti, Ya zagahɛ mam mɛ, bala te mam me zagahɛ ya bo Sisak. 6Te Israel nɛŋadoma la naba wa sigehe ba mɛhe ge yeti, Na'ayenɛ tare boorɔ. 7Na'ayenɛ n nyɛ ban sigehe ba mɛhe la, te Yenɛ tɔgɛ bo Semaiah yeti, Bama n sigehe ba mɛhe, bala n kan sagom ba, ge n kan doohe Sisak poan ka'ɛ n sunsunyiim bahɛ Yerusalem zuo. 8Ge ba wan dɛna Sisak yamehe, te ba baŋɛ bama n de mam yamehe, la bama n de teŋhe nadoma yamehe n boe yema yema se'em. 9Mizraim teŋa naba Sisak n wa'ana zabɛ la Yerusalem se'em n bala, vaɛ Na'ayenɛ Yire la poan lɔgɔrɔ, la na'am yire la poan lɔgɔrɔ la zan'an. A vaɛ sɛla woo mɛ ta ta' la zaba te'elehe se'ehe te Naba Solomon dekɛ sanlema kure la. 10Te naba Arehoboam tee kure nyɔgom te'elehe, dekɛ eŋɛ kpɛ'ɛndoma sɛba n gure naba yire nayahe la nu'uhen. 11Saŋsɛka woo te Naba wa yɛ'ɛha Na'ayenɛ Yire la poan na, guruba wa ne zanla la bama doohe en na kɛn' ge ne la tare ba lebe ta biŋe guruba wa bɔ'ɔ poan. 12Naba wa han ne sigehe a mɛŋa, Na'ayenɛ sunsunyiim la ne lebe gan'arɛ mɛ, te a kan sagom en, te som me bɔna Yuda teŋa saŋkaŋa mea poan. 13Te naba Arehoboam kpemehe a mɛŋa bɔna Yerusalem dɛna naba. Arehoboam dela yuuma pihinaahe la deyema ge pɔhɛ dɛna naba, zin'ire a na'am gɔŋɔ zuo yuuma pia la ayopɔe Yerusalem poan, teŋsɛka te Na'ayenɛ loe Israel buuri la teŋhe la woo poan te a yu'urɛ pota ka poan la. Arehoboam ma yu'urɛ dela Naama, dɛna Ammon buuri. 14Arehoboam tom la be'em. Se'ere n sɔe la a ka lo' a suunre te a doohe Na'ayenɛ. 15Arehoboam tooma pɔhega ta paɛ a ba'ahegɔ golehɛ eŋɛ la nɔtɔgɔha Semaiah buuri tuunhom yɛla gɔŋɔ la poan la, la Ido n de behera la buuri tuunhom yɛla gɔŋɔ la poan. Te pɛɛntɛɛnrɛ bɔna Arehoboam la Yeroboam teŋasoka saŋa woo. 16Te Arehoboam kule paɛ a sɔdoma, te ba pin' en naba David teŋa la poan, te a dayɔa Abiya sɔe a na'arɛ dɛna naba.

will be added

X\