2 Yelebiŋ'a 11

1Arehoboam n wa'ana paɛ Yerusalem na la, a lagahɛ la Yuda la Benyamin buuri la, te ba borase'ehe n de pɛɛntɛɛnreba kanlɛ dɛna tuha kɔbega la tuha pihinii, te ba zabɛ la Israel to'e sɔ'ɔlom la bo Arehoboam. 2Ge te Na'ayenɛ tɔgɛ bo Yenɛ nɛra Semaiah zen'an na yeti, 3Yele Naba Solomon dayɔa Arehoboam n de Yuda naba wa, la Israel buuri se'a woo n kɛn'ɛre Yuda poan, la Benyamin buuri la yeti, 4Na'ayenɛ yeti, da keŋɛ ya ta zabɛ la ya sɔɔnrɔ wa. Nɛra woo lebe kule ge yele dena wa ze'ele la mam mɛŋa zen'an na. Te ba to'e Na'ayenɛ yelehom la, ka keŋɛ ta zabɛ la Yeroboam. 5Te Arehoboam bɔna Yerusalem ge mɛ teŋhe Yuda teŋa, te teŋsenhe dɛna zaba gu'a teŋhe. 6Teŋse'ehe te a mɛ dela Betlehem, Etam, Tekoa, 7Bet Zur, Soko, Adulam, 8Gat, Maresa, Zip, 9Adoraim, Lakis, Azeka, 10Zora, Aiyalon la Hebron. Teŋhe sena wa n de teŋhe Yuda poan te dangɔɔma mɛ kae se. 11Ge te a malom kpemehe pɛɛntɛɛnreba bɔŋa zen'an la, dekɛ kpɛ'ɛndoma bahɛ se poan, ge bahɛ te dia, kaam la daam bɔna dia biŋere zen'enhe la bo ba. 12Ge a bahɛ te zaba te'elehe la kana bɔna teŋa woo poan, ge malom kpemehe pɛɛntɛɛnreba la soŋa. Enŋa n tare Yuda la Benyamin teŋhe se'em n bala. 13Se'ere n pa'ahɛ dela, malemadoma la Levidoma la woo n boe ba teŋhe ba teŋhe Israel teŋa poan la zan'an boe la a zuo. 14Levidoma la bahɛ ba bɔn'ɔrɔ la ba lɔgɔrɔ mɛ zan'an ge wa'an Yuda la Yerusalem poan na. Se'ere n sɔe la, Yeroboam la a dayɔɔhe la ka dekɛ ba pa'ahɛ te ba dɛna Na'ayenɛ malemadoma. 15A mɛŋa n loohe a malemadoma bo kaanbegɔ zen'enhe la, te ba dɛna nɛŋadoma kaanbera boa baga la la nagabila baga la te a maalɛ la. 16Ge Israeldoma sɛba woo n lo' ba suunre te ba dɔla Na'ayenɛ Israel Yenɛ la ne doohe Levidoma wa mɛ keŋɛ Yerusalem ta kaanbɛ Na'ayenɛ n de ba sɔdoma Yenɛ la. 17Ba kpemehe Yuda sɔ'ɔlom wa mɛ ge bɔna Solomon dayɔa Arehoboam zuo yuuma atan'. Yuuma atan' te ba dɔla naba David la Solomon n dole sose'ere la. 18Te Arehoboam di Yesse dayɔa naba David dayɔa Yerimot pɔyɔa Mahalat n de naba David dayɔa Eliab pɔyɔa Abihail pɔyɔa, 19te Mahalat dɔgɛ bodibinto te to yu'ura yi'ira Yeus, Semaria la Zaham. 20Te a di Absalom pɔyɔa Maaka, te a dɔgɛ Abiya, Atai, Ziza la Selomit. 21Te Arehoboam nɔŋɛ Absalom pɔyɔa Maaka gana a pɔgɔba la pɔgɔbɔ'ɔrenhe zan'an. A tare la pɔgɔba pia la senii, la pɔgɔbɔ'ɔrenhe pihiyoobe, tara dayɔɔhe pihiyi' la senii, pɔyɔɔhe pihiyoobe. 22Te Arehoboam loe a dayɔa Abiya n de Maaka bia la, te a sɔna ge dɛna a sɔɔnrɔ la nɛŋadaana, maahena te a ta eŋɛ en naba. 23A dekɛ la yam degehɛ a dayɔɔhe la tɔnrɛ Yuda la Benyamin teŋhe la poan, la pɛɛntɛɛnreba bɔŋa zen'enhe la zan'an, bo ba dia n ka tare makerɛ, ge di pɔgɔba kekeko bo ba.

will be added

X\