2 Yelebiŋ'a 10

1Te Arehoboam keŋɛ Sekem teŋa. Se'ere n sɔe la, Israeldoma la zan'an lagahɛ la Sekem te ba ta bobe Arehoboam na'am. 2Te la ta lu Nebat dayɔa Yeroboam toban Mizraim teŋa, zen'an te a le'ehɛ Naba Solomon zen'en ta bɔna la. Te a ze'ele Mizraim teŋa la lebe na. 3Te ba tom yi' Yeroboam na. Yeroboam la Israel nɛreba la zan'an n paɛ na la, ba yele Arehoboam mɛ yeti, 4Ho sɔ yuun bahɛ te la wona to mɛ, bala yolohe zeero seto te a dekɛ ziile to la te to bɔna ho nu'uhen. 5Te Arehoboam yele ba yeti, Lebe ya dabeha atan' poan na. Te nɛreba la yeregɛ. 6Te naba Arehoboam zin'ire la a keendoma sɛba na daa tone bɔ'ɔra a sɔ Naba Solomon n daa nan vɔe la yeti, Yamam kan'aŋɔ dela kone te n wan lerege nɛreba wa? 7Te keendoma wa lerege en yeti, Ho han wan sigehe ho mɛŋa bo ba, bogolɛ ba sunya, ge tɔgɛ yetɔgɔsomɔ bo ba, ba wan bɔna ho nu'uhen yɛ'ɛha. 8Ge Arehoboam ka to'e keendoma la kan'aŋɔ la, ge ton to'e la bonbilipaalehe la te enŋa la bama lagom zo'e na te ba tona bɔ'ɔra en la zen'an. 9Nya soke ba yeti, yamam kan'aŋɔ dela kone? To wan lerege nɛreba wa en yele mam yeti, yolohe to zeero wa te ho sɔ dekɛ ziile to wa la wane? 10Te bonbilipaalehe wa te enŋa la bama lagom zo'e na wa yele en yeti, yele nɛresɛba en yele ho yeti ho sɔ dekɛ la zeero ziile to, ge yolohe to zeero la bahɛ la yeti, Mam nu'dibila kanregɛ gana mam sɔ sea mɛ. 11Mam sɔ daa dekɛ la zeero n tebegɛ ziile ya, mam wan dekɛ zeero malom pa'ahɛ ya. Mam sɔ daa tare la kpa'aha dɔnlegera ya toba, ge mam wan tara la naŋhe dɔnlegera ya toba. 12Te Yeroboam la nɛreba la zan'an lebe dabeha atan' daarɛ la na wo naba la n yele ba se'em yeti lebe ya dabeha atan' daarɛ na la. 13Te naba Arehoboam ka lerege nɛreba la ma'ma'. A zagahɛ keendoma la nɔɔrɛ la mɛ, 14ge lerege ba wo bonbilipaalehe la n kan'an en se'em yeti, Mam sɔ daa dekɛ la zeero n tebegɛ ziile ya, mam wan dekɛ zeero malom pa'ahɛ ya. Mam sɔ daa tare kpa'aha dɔnlegera ya toba, ge mam wan tara la naŋhe dɔnlegera toba la. 15Naba wa n ka kelehe keendoma wa se'em n bala. Se'ere n sɔe la, la dela yɛla n maahom Yenɛ zen'an na tona, te la bahɛ te Na'ayenɛ yelehom te a tɔgɛ doohe Silon teŋa nɛra Ahiya zen'an bo Nebat dayɔa Yeroboam la wa'ana tom. 16Israel zan'an n nyɛ te naba la ka kelehe ba la, ba lebehe en yeti, Tomam me tɔntɛ dela dene David poan? Tomam ka tare sɛla te to wan vaɛ Yesse dayɔa wa poan. Israeldoma, kule ya yiya. David, hom me leen behera ho yire. Te Israel zan'an yeregɛ kule. 17Ge Israel buuri sɛba n kɛn'ɛre Yuda teŋkanra la poan la n boe Arehoboam nu'uhen. 18Te naba Arehoboam tom Hadoram n de sɛba n tone toonkanra la nɛŋadaana la Israeldoma zen'an, te Israel buuri la ta lobe en ko. Te naba Arehoboam kanbelɛ kalam maahom a zaba toroko te a zɔ Yerusalem. 19Israel n ka sakɛ bo David yiredoma la se'em n bala na paɛ zina.

will be added

X\