2 Yelebiŋ'a 1

1Naba David dayɔa Solomon zin'ire a na'am gɔŋɔ la zuo mɛ, kpe'em sɔna a sɔ'ɔlom la zan'an behera, te Na'ayenɛ a Yenɛ la bɔna la en, ge zɛnkɛ en te a dɛna nakantɛ. 2Te Naba Solomon tɔgɛ bo Israel zan'an, zaba nɛŋadoma sɛba n behere pɛɛntɛɛnreba tuha, la sɛba n behere kɔbehe, yelegankereba, keendoma woo n boe Israel, la yiredaana woo. 3Te Naba Solomon la Israel lagahɛ ba zan'an keŋɛ kaanbegɔ zen'an la n boe Gibeon teŋa poan la. Se'ere n sɔe la, Yenɛ lagaŋɔ zen'an Sogorɛ la te Moses n de Na'ayenɛ yameŋa yuun tin' ka pɔgɔtia la n boe bilam la. 4Te Naba David tare Yenɛ nɔbiŋere daka la ze'ele Kiriat Yearim teŋa na kɛn'ɛhɛ zen'sɛka te a pon maalɛ biŋe ka la poan. A tin' la sogorɛ yire Yerusalem poan bo ka. 5Te nyɔgom kaanbegɔ daka la te Hur dayɔa Uri me dayɔa Bezalel maalɛ ka la zɛ'a Na'ayenɛ Sogorɛ la nɛŋan na n bo Gibeon zoore la, te Naba Solomon la Israel lagaŋɔ la zan'an sɔkera Yenɛ potɛn'ɛrɛ ka poan. 6Te Solomon paɛ Na'ayenɛ nɛŋan, nyɔgom kaanbegɔ daka la n ze' Sogorɛ la nɛŋan la, kaanbɛ nyɔ'an bo'olom tuhure daka la zuo. 7Yu'uŋɔ koŋɔ mea poan te Yenɛ nɛɛ a mɛŋa pa'alɛ Naba Solomon ge yeti, Soke mam hom bote sɛla, te n bo ho. 8Te Solomon yele Yenɛ yeti, Ho bo mam sɔ Naba David la zo'ohogɔ, ge bahɛ te mam sɔe a na'arɛ dɛna naba wa. 9Nananawa, Na'ayenɛ n de Yenɛ wa, ho nɔpo'ologɔ la te ho po'olɛ la mam sɔ Naba David la tom ya, doohe la hom bahɛ te mam wa'ana dɛna naba behera nɛreba n zo'e wo tentɔnɔ wa la. 10Nananawa, bo mam yam la mi'ilom te n ta'an tara nɛreba wa yɛhera ge lɛbera na. Ane n wan ta'an behera ho nɛrekooŋɔ wa. 11Te Yenɛ yele Solomon yeti, Dena wa n de ho sunboolom wa, te hom ka sohɛ mam lɔgɔrɔ bii tarega bii na'ahegɔ bii ho diŋdoma kum, bii ho sohɛ mam vom woko, ge sohɛ la yam la mi'ilom bo ho mɛŋa wa, te ho behera mam mɛŋa nɛreba sɛba te mam dekɛ ho eŋɛ naba te ho behera ba wa la. 12N dekɛ yam la mi'ilom bo ho, ge bo ho tarega la lɔgɔrɔ la na'ahegɔ, te naba n ka boe n tabelɛ nyɛ to taaba paɛ mam n yeti n bo ho sɛla wa, bii sɛba n yee ho pooren. 13Te Naba Solomon bahɛ Sogorɛ n boe kaanbegɔ zen'an Gibeon teŋa la, ge lebe Yerusalem ta zin'an a na'am gɔŋɔ zuo behera Israel teŋa. 14Naba Solomon tare yiri toroto la yiri ban'areba mɛ. Yiri toroto la ma'an dela tuhure la kɔbehe senaahe, te a yiri ban'areba dɛna tuha pia la ayi'. Basɛba bɔna yiri ban'areba teŋa la poan la basɛba me bɔna la naba la n boe Yerusalem poan la. 15Te naba wa bahɛ te sanlenpeelega la sanlema buge Yerusalem wo kuga la, te dɔɔ mɔlɔsomɔ me gan'an yoo wo kenkanhe n buge se'em sɛnka poan la. 16Naba Solomon yiri ze'ete la Mizraim la Kue teŋa na. Naba la leebedoma n ne da' i la ligikanra Kue teŋa na. 17A yiri toroto ze'ete la Mizraim teŋa na, te toroko koyena woo lagahɔ dɛna sanlenpeelega kpila kɔbehe seyoobe, te yeho me dɛna sanlenpeelega kpila kɔbega la pihinuu. Ba koohere la bala mea bɔ'ɔra Hiti la Aramdoma teŋhe nadoma la me.

will be added

X\