1 Timõtɩ 5

1Da tanha boraa yan'ahe ge kan'ana ba wo ba dela ho sɔdoma la. Kan'ana bodibinpaalehe wo ba dela ho yebehe la ho keendoma la. 2Kan'ana pɔgɔyan'ahe wo ba dela ho madoma la. Kan'ana pɔgɔsa'ara wo ba dela ho tanpa la potɛn'ɛrɛ n ka tare dɛngerɔ. 3Bo'ore ya pɔkɔnpa sɛba n boe ba ma'an la na'ahegɔ ge beha ba. 4Ge pɔkɔɔnrɛ han tara kɔma, bii yaahe, kɔma la beha ba te la dɛna ba po'ohegɔ la tone. Wana te ba wan tee yɔ ba sɔdoma la ba madoma la te Yenɛ poorɛ pɛɛra. 5Pɔkɔnse'ere n boe a ma'an mi' te Yenɛ wan soŋɛ en, a daarɛ woo po'ohɛ Yenɛ wontɛɛŋa la yu'uŋɔ sɔkera en sɛla woo yele. 6Ge pɔkɔnse'ere n vɔe nyɛlom ma'an zuo, a ki' mɛ n bala ge vɔna la. 7Yele kɔma bii yaahe te ba eta dena te nɛra da ta'an zɛrɛgɛ ya. 8Se'em han ka beha a mɛŋa nɛreba, yele woo sɛba n boe a yire poan la, a zagahe sera pa'alegɔ la te to gorɛ la mɛ. A ete be'em gana se'em n ka nam Krista. 9Da dekɛ ya pɔkɔɔnrɛ se'ere yu'urɛ pa'ahɛ pɔkɔpa kan'alɛ la poan han dagana la a gaŋɛ la yuum pihiyoobe, ge kɔ'ɔn ele la boraa yeŋɔ 10te nɛreba me mina te a daa ton toonsoma, behɛ a kɔma soŋa, bo'ore Yenɛ nɛreba ko'om ge soŋora sɛba n boe daaŋɔ poan. A da dɛna se'em n tare zenyagarɛ la toonsoma woo. 11Da golehɛ ya pɔkɔnbibihe yu'ura. Se'ere n sɔe la, ba potɛn'ɛra han ta lebe boraahe bɔba kekeko, ba bote te ba ele, ba ne zagahɛ Krista. 12Ba han ka eŋɛ sɛla te ba yeti ba eŋɛ bo Krista ge ele, ba tuure mɛ. 13Ba kan ton toonɛ ge ba eere lɔ'ɔha la yiya. Ba zamehe la yelebibihe tɔgɔre la yelese'a n dagɛ ba tɔgɛ. 14Bala, mam bote te pɔkɔnbibihe ɛɛla dɔgɔra kɔma ge beha ba yiya. Ba da eŋɛ sɛla n wan bahɛ te to diŋdoma beha to yoo. 15Sɛla n sɔe te to mam yɛta wana wa dela pɔkɔnbibihe pon ŋmɛrege mɛ dɔla Dima la. 16Pɔgɔsɛka n dole Yesu sore ge te pɔkɔnpa bɔna a yire, la dela a beha ba. Te ba da kɔ'ɔn delom lagaŋɔ la, ge te lagaŋɔ la nyaŋɛ behera pɔkɔnsɛba n seren de ba ma'an la. 17Bɔ'ɔra kpɛ'ɛndoma basɛba n ta'an beha soŋa na'ahegɔ la yɔɔrɛ pa'aha. Kpeŋe ya mɛhe te ya soŋe bama basɛba n tɔgɔre ge pa'ala Krista yɛla la gana ba zan'an. 18Yenɛ gɔŋɔ la n tɔgɛ lana wa yeti, Da lo' lɔlega nɔɔrɛ ge tara ka tɔɔra ki. La le yeti, Tontona sontii a to'e a yɔɔrɛ. 19Nɛra wa'ana yeti kpɛ'ɛma eŋɛ la be'em, da kelehe en, han dagana ba dela bayi' bii batan' n wa'ana tɔgɔra sɛla en eŋɛ la. 20Kpɛ'ɛma han tom be'em, bahɛ ya te sɛba woo n dole Yesu la bɔna bini ge te ya kan'an en, te bala te dabeem wan kɛn' kpɛ'ɛndoma basɛba la te ba da tom be'em. 21Mam ze' la Yenɛ la Krista Yesu la Yenɛ soŋoreba sɛba te a loe la nɛŋan yɛta hɔ te ho eta sɛla te n yɛta la ge da bɔgɔha eta sɛla bɔ'ɔra. 22Da kanbelɛ dekɛ ho nu'o pagalɛ boraa kayema zuo pa'alɛ te a dɛna kpɛ'ɛma. Ho han eŋɛ bala kalam ge te a tom be'em ho nu'o boe bini. 23Da le nyuura ko'om ma'an. Nyuura daam fiin wa la ho tebera ho poorɛ la n daane ho daarɛ woo la. 24Nɛreba basɛba toonbe'ero ka lile te ba ne namehe ba. Te basɛba me toonbe'ero lile te nɛreba ka mina ge la wan lilige te nɛreba baŋɛ. 25Le yɛ'ɛha, nɛreba basɛba ne tom som te nɛreba ne baŋɛ n eŋɛ sɛla, te nɛreba basɛba me ne tom som baanlam ge te ba ne ta baŋɛ n eŋɛ sɛla la.

will be added

X\