1 Timõtɩ 3

1Yelehom deyema n boe sona te to sakɛ: se'em han bɔta te a dɛna lagaŋɔ kpɛ'ɛma, a bote la toonsonɛ. 2Kpɛ'ɛma la da eŋɛ sɛla to nɛreba zɛrɛgɛ en, a tara pɔgɔyeŋɔ, a dɛna nɛremama, a tana a mɛŋa nyɔkera, a tara zuo, a tɔ'ɔha saama, a pa'ala nɛreba soŋa. 3A da nyuura daam zɔ'ɔra bii a dɛna zabzabera, a ana baanlam, a da nɔŋɛ ligiri. 4La dela a tana beha a mea yire soŋa, a bahɛ te a kɔma nana en ge bɔ'ɔra na'ahegɔ. 5Nɛra han ka ta'an beha a mɛŋa yire a kan ta'an behɛ Yenɛ lagaŋɔ. 6A da dɛna se'em n nan doohe Yesu sore te la ka yue. Se'ere n sɔe la, la han dɛna bala, a wan pa'alɛ a mɛŋa. La han dɛna bala, Yenɛ wan gankɛ en wo n daa gankɛ sagona la. 7Le yɛ'ɛha, kpɛ'ɛma la dela a eta eteseko te nɛresɛba n ka dole Yesu sore la tɔgɛ tɔgɔsomɔ a yele. A han ka eta bala, ba wan zɛrɛgɛ en te a sige sagona la bɛnregɔ poan. 8Lagaŋɔ poan soŋoreba la bɔŋa soŋa, ba dɛna seradoma, ba da nyuura daam zɔ'ɔra ge me da bɛna la ligiri. 9Ba gorɛ sera pa'alegɔ la te Yenɛ yele la eta sɛla te ba mina te la de ma'an. 10Ba behɛ ba vom yia ge nya loe ba. Ba han ka tara se'ere, ba dɛna soŋoreba. 11Ba pɔgɔba me la bɔŋa soŋa, da tɔgɔra tɔgɔbe'ero yɛhera nɛreba yele, da tara kɔre la sɛla woo ge me dɛna birikindoma. 12Lagaŋɔ soŋoreba tara pɔgɔyeŋɔ ma'an. Ba beha ba kɔma la ba yiya lɔgɔrɔ soŋa. 13Soŋoreba han tona soŋa, nɛreba wan bo ba na'ahegɔ. Bala, te ba wan tana tɔgɔra yɛhera ban gorɛ Krista Yesu yele se'em ge te dabeem ka tara ba. 14Mam golehɛ gɔŋɔ wa bo wa, n tɛn'ɛhe te la kan yuue ge wa'an ho zen'en na. 15Ge n han yuue, gɔŋɔ la wan bahɛ te ho mina Yenɛ lagaŋɔ nɛreba la n sontii ba tara ba mɛhe se'em dole Yenɛ se'em n vɔe wa. Lagaŋɔ la n de yelemɛŋɛrɛ la daantɔlɔga la. 16La dela sera te dena dela ninmɔ'ɔrɛ pa'alegɔ te Yenɛ dekɛ bo te ge pa'ala tɔ, to wan bɔna sera sore la poan se'em: Ba daa dɔgɛ Krista te a dɛna la asaala, te Yenɛ Sea la pa'alɛ te a dela yelemɛŋɛrɛ nɛra. Yenɛ soŋoreba daa nyɛ' en. Nɛreba daa tɔgɛ a yele bo teŋa wa woo nɛreba. Nɛreba daa nam en teŋa wa poan ge te Yenɛ daa tare en zom saazuo ha.

will be added

X\