1 Timõtɩ 2

1Yia poan, sokere la sohoga la to Yenɛ fara bɔ'ɔra nɛra woo. 2Ba sohora Yenɛ bɔ'ɔra nadoma la nɛrekanreba. Bala te to wan bɔna baanlam ge tara sunma'ahom, wo tomam n ete sɛla n de ma'an ge ana soŋa bɔ'ɔra Yenɛ. 3Sɛla n sɔe te to sohora Yenɛ bɔ'ɔra nɛra woo la dela la ane la soŋa ge me bahera te Yenɛ to Faanra la tara popeelom. 4Se'ere n sɔe la, a bote a fan' nɛra woo bahɛ ge bɔta te nɛra woo baŋɛ yelemɛŋɛrɛ la. 5Yenɛ dela deyena ma'an, la nɛra ayena se'em n boe Yenɛ la nɛreba teŋasoka sugun na ba. Enŋa de nɛra se'em n de Krista Yesu. 6A dekɛ a mɛŋa yɔ to'e nɛra woo. Dena pa'alɛ nɛra woo te se'em ma'an te Yenɛ bɔta te a fan' nɛra woo bahɛ la paɛ ya. 7A daa loe mam te n dɛna tontona ta'an dekɛ yele dena wa tɔgɛ. Mam yeti la yelemɛŋɛrɛ n ka parone. A loe mam te n pa'alɛ la sɛba n dagɛ Yudoma la yelemɛŋɛrɛ la sera pa'alegɔ. 8Bala mam bote ya lagaŋɔ zen'enhe la woo te boraahe sohora Yenɛ ba zɛnga ba toolom nu'uhen saazuo po'oha Yenɛ ge ka tara sunsunyiim la nɔkpema. 9Mam bote ya lagaŋɔ zen'enhe woo pɔgɔhe yɛɛra la lɔgɔseto n wan pin' ba soŋa. Ba tara yam ge da pan'an na zuto bii ba yɛɛra sanlema bii kugasaalehe bii lɔgɔseto da'a n tɔe te ba pa'alɛ ba mɛhe. 10Ge ba etesoŋɔ la pa'ala te ba dole la Yenɛ. 11La dela pɔka zamehɛ la a sina ge sigehe ba mɛhe. 12Mam ka sakɛ te pɔka pa'ala boraahe, bii a tara paŋa beha ba. A ton sina. 13Se'ere n sɔe bala la dela, Yenɛ maalɛ la Adam yia ge nya maalɛ Eve pooren. 14Sɛla n le sɔna la dela, sagona daa ka pan'ahɛ Adam ge a pan'ahɛ la pɔka la. Bala, pɔka la zagahɛ sɛla te Yenɛ daa yele la yia. 15Pɔgɔhe wan nyɛ' faanrɛ la ba kɔma dɔgom poan, ban nana Na'ayenɛ ge nɔŋɛ nɛreba ge sakɛ bɔna la Na'ayenɛ ge ka pa'ala ba mɛhe.

will be added

X\