1 Tesaloniki 5

1N sɔɔnrɔ, ge han de'a se'em ma'an bii daanse'ere daarɛ te yele ana wan eŋɛ, to ka le nɔŋɛ to golehɛ bo ya yɛhera a yɛla. 2Se'ere n sɔe la, yamam mɛhe mi' soŋa soŋa te Na'ayenɛ daarɛ wan wa'ana la ana me wo nayiga n me ne ta wa'an yu'uŋɔ na se'em la. 3Te nɛreba han ne ta yɛta yeti, Daaŋɔ ka boe, sɛla woo bo la soŋa soŋa. Ba han ne ta yɛta wana, bilam bilam te ba ne ta nyɛ' sagaŋɔ ba zen'en. Ba kan nyaŋɛ le'ehɛ de poan. Ba namehegɔ la an me wo pɔka n ne virigera te la wona en se'em la. 4Ge, han de'a yamam n sɔɔnrɔ, yamam ka tone likatooma. Bala, daanse'ere daarɛ te to Daana lɛbera na la kan ta'an din'i ya wo nayiga n ne wa'ana te la din'i nɛreba se'em la. 5Ge yamam zan'an dela nɛɛhom la nɛreba. Ge te daanse'ere daarɛ te to Daana lɛbera na la me dela ya dabaherɛ. Bala, yamam la tomam dagɛ sɛba n tone yu'uŋɔ bii likatooma la. 6Dene poan, da bahɛ ya te to gan' ya ginha wo nɛresɛba n ete se'em la. Bahɛ ya te to maahom ya mɛ ge tara to mɛhe soŋa soŋa. 7Te la ne de'a la yu'uŋɔ te nɛreba gan'an ginhera. La ne dɛna la yu'uŋɔ te nɛreba nyuura daam bugura. 8Ge tomam n de nɛɛhom nɛreba la tara to mɛhe soŋa soŋa. Dekɛ ya nɔŋerɛ la naŋa yɛ' wo kuto fuseko te ba ne yɛ' pin' nyɔn'ɔn bɔba ma'an la. Ge dekɛ faanrɛ vuge wo zabere sapibire la. 9Te Na'ayenɛ ka loe to mɛ te a namehɛ tɔ mɛ. Ge a loe to te Na'ayenɛ Yesu Krista paŋa poan to tara faanrɛ. 10Ge Yesu daa ki' bo to te a han ta lebena, te to han pon ki' mɛ bii to vo'e mɛ te ta'an lagom bɔna la en. 11Bala, yele dena wa zuo, de ya sɛba n wan kpemehe ya ge soŋora taaba wo yan pon eta se'em wa. 12Ge to sɔɔnrɔ, to sohore ya mɛ te ya bɔ'ɔra sɛba n de zuodoma tona la ya la na'ahegɔ. Ba dela sɛba te Na'ayenɛ loe te ba soŋora ya ge kan'ana ya. 13Bo'ore ya ba na'ahegɔ ge tare ya nɔŋerɛ bɔ'ɔra ba toonse'ere te ba tona bɔ'ɔra ya la zuo. De ya sɛba n wan tara sunma'ahom la taaba. 14To sɔɔnrɔ, to yeti ya mɛ la ninmɔ'ɔrɛ te ya kan'an nɛresɛba n ka bote ba tom tontonɛ la. Ya soŋɛ sɛba te dabeem tara la ge me kelom soŋɛ sɛba n nan ka sɛ' ze'ele soŋa soŋa Yesu sore dɔlɔga la poan la. Ya mɛhe me dɛna sɛba n wan tara sugure la nɛra woo. 15Behɛ ya soŋa soŋa te se'em da dekɛ be'em yɔ be'em. Ge de ya sɛba n wan kɔ'ɔn bɔta te daarɛ woo ya tona sɛla n ane soŋa bɔ'ɔra taaba la nɛra woo. 16De ya sɛba n wan tara popeelom daarɛ woo, 17ge me sohora Yenɛ daarɛ woo, 18pɛngerɛ ya Yenɛ yelese'ere woo poan. Te dena wa n de sɛla te Yenɛ bɔta te ya eta Yesu Krista yu'urɛ poan. 19Da gu'ure ya Yenɛ Sea la n bote a bahɛ ya te ya eta se'em la. 20Da zagahe ya pa'aleseko n ze'ele Yenɛ zen'en na. 21Ya han wom yelese'ere woo, magahɛ ya de behɛ dene ane se'em. La ya tara sɛla n ane soŋa la, 22ge zagahɛ ya yelese'ere woo n de be'em. 23Yenɛ se'em n bahɛ te to tara sunma'ahom la wan bahɛ ya te ya bɔna bo la enŋa ma'an sɛla woo poan. A wan bahɛ te ya sɛɛhe la ya suunre, la ya iinhe kan ta tara tuure la fiin me to Na'ayenɛ Yesu Krista lebega daarɛ. 24Te se'emdaana n yi' ya la wan eŋɛ dɛ bo ya. Se'ere n sɔe la a dela birikina. 25To sɔɔnrɔ, sohore ya Yenɛ bɔ'ɔra tɔ. 26Po'ohɛ ya to sɔɔnrɔ la woo n boe bilam la soŋa soŋa. 27Ge n yeti ya mɛ la ninmɔ'ɔrɛ te Na'ayenɛ paŋa poan, ya kaanlɛ gɔŋɔ wa bo to sɔɔnrɔ la woo n boe bilam la. 28Na'ayenɛ Yesu Krista zo'ohogɔ bɔna la ya.

will be added

X\