1 Tesaloniki 3

1Depooren, ton daa behɛ te to kan ze'a go'ona bala la, to daa eŋɛ to potɛn'ɛrɛ te to yee to ma'an Atens teŋa poan. 2To tom to sɔɔn Timoti se'em te tomam la enŋa mɔɔla Krista yelesoma la te a wa'ana la a soŋɛ ya te ya sɛ' ze'ele soŋa soŋa ya sakerɛ Yesu sore dɔlɔga la poan. 3Te ton en bala na te a soŋɛ ya te se'em ya poan kan le vihe lebe pooren namehegɔ la zuo. Ya mɛhe me mi' te namehe kona taaba dela Na'ayenɛ n bote ba namehe tɔ bala. 4Bala, ton daa nan boe la ya la, to daa pon te'ele yele ya te nɛreba wan namehe tɔ. Te yan daa nyɛ' la, bala mea n bala daa eŋɛ tɔ la. 5Bala n sɔe, te n tom Timoti na la. N daa behɛ te n kan ze'a go'ona. Bala, te n tom en na te a behɛ ya dɔlɔga Yesu sore la poan ane wane. N paleŋa daa ɛngera te daanse'ere Sagona la wan pan'ahɛ ya te ya bɔta te ya tom be'em. Te ton namehe to mɛŋa tom toonse'a la bahɛ yoo. 6Ge nananawa, Timoti la ze'ele ya zen'en lebena. N paɛ na la, a yele to yelese'a n ane soŋa yɛhera ya nam Yesu se'em la yan tare nɔŋerɛ se'em. A me le yele to te daarɛ woo yan tɔgɔre yelesoma yɛhera to yele se'em. A yele to te ya kɔ'ɔn bɔta te ya nyɛ' tɔ se'em la, bala mea me te tomam me kɔ'ɔn bɔta te nyɛ' ya. 7Bala, to sɔɔnrɔ, ya sakerɛ Yesu sore dɔlɔga la poan soŋɛ tɔ yɛhera daanseto la namehe seto te to nyɛ' wa. 8Se'ere n sɔe la, yamam han sɛ' ze'ele soŋa soŋa Na'ayenɛ sore dɔlɔga la poan, tomam me yi' seren vɔe. 9Nananawa to bo'ore Yenɛ fara la popeelom sebo te to tara a nɛŋan doohe yamam zuo wa. 10To sohore en wontɛɛŋa la yu'uŋɔ to suunre poan te a bahɛ tɔ te to nyɛ' ya la to nini. To han nyɛ' ya bala, to me ta'an soŋɛ ya la sɛla n dela ya tara ya sakerɛ Yesu sore dɔlɔga la poan. 11To Sɔ Yenɛ a mɛŋa la to Na'ayenɛ Yesu wan naam sore bo to te to wa'ana behɛ ya. 12Na'ayenɛ wan bahɛ te ya malom tara nɔŋerɛ bɔ'ɔra taaba la nɛra woo. Ya wan tara nɔŋerɛ la bala wo tomam n tare dɛ se'em bɔ'ɔra ya wa. 13A wan bahɛ te ya sɛ' ze'ele soŋa soŋa ya sakerɛ la poan. Ka tara gbelerege ge dɛna toolom nɛreba to Sɔ Yenɛ nɛŋan. Se'em ma'an te to Na'ayenɛ Yesu han ta lɛbera na la sɛba woo n boe la en la.

will be added

X\