1 Samuel 8

1Te Samuel ta korogɛ, ge dekɛ a dayɔɔhe la te ba beha Israel teŋa. 2A dayɔkeema la yu'urɛ dela Yoel, te be'a la me yu'urɛ dɛna Abiya. Bama n behere Beerseba teŋa. 3Ge Samuel dayɔɔhe la ka dole Samuel sore la, ge ŋmɛregɛ pina nɛreba, tɔ'ɔha mu'ure bo'olom ge lila yelemɛŋɛrɛ. 4Te Israel keendoma la zan'an lagahɛ taaba wa'an Samuel zen'an Aramah teŋa na 5yele en yeti, Ho korogɛ ya. Ho dayɔɔhe la me ka dole ho sore la. Bala zuo, loe naba bo to te a beha tɔ wo teŋhe wa woo n tare naba te a beha ba se'em la. 6Ge ban yele en yeti, bo' to naba te a beha to la, la daam Samuel suunre te a sohɛ Na'ayenɛ. 7Te Na'ayenɛ lerege en yeti, Nɛreba wa n yele ho se'ere woo sakɛ bo ba. Ba ka zagahɛ la hom. Ba zagahɛ la mam te n da dɛna ba naba. 8Toon se'a te ba pon tona n bala. Ba zagaha mam la bala ge tona bɔ'ɔra baga, pɔhɛ se'em ma'an te mam Na'ayenɛ tare ba ze'ele Mizraim teŋa yehe na la tara tara la zina wa. Bala mea te ba eta ho wa. 9Bala ban yeti ho sɛla woo sakɛ bo ba. Hom yeen yele ba la ninmɔ'ɔrɛ ge pa'alɛ ba ba naba se'em n wan beha ba la yele n wan ana se'em. 10Te Samuel tɔgɛ Na'ayenɛ nɔɔrɛ la zan'an bo Israeldoma wa n eere naba te ka beha ba wa. 11A yele ba yeti, Naba sɛka n wan beha ya la n wan ana se'em n wana. Ka wan fan' ya dayɔɔhe te se behera a yiri toroto, te sese'ehe me dɛna a yiri ban'areba ne bɔna a yiri la nɛŋa. 12A wan vaɛ zaba nɛŋadoma bo a mɛŋa, te basɛba behera pɛɛntɛɛnreba tuha tuha, te basɛba me behera pihinuu nuu, te basɛba kɔɔra a va'am te basɛba buna a va'am poan dia, te sɛba maala a zaba lɔgɔrɔ, te sɛba me maala a yiri toroto lɔgɔrɔ. 13A wan vaɛ ya pɔyɔɔhe te ba ta maala kaam, te sɛba dogora a dia, te sɛba me sɛn'ɛra a dia bɔ'ɔra en. 14A wan fan' ya va'am disoŋa la tiihe wɔla vatɔ la kaam tiihe vatɔ bo a kpɛ'ɛndoma. 15Naba wa wan tɔ'ɔha ya va'amen dia porogerɛ boyena pia woo poan bɔ'ɔra a nɛrekanreba la a kpɛ'ɛndoma. 16A wan fan' ya tontoneba boraahe la pɔgɔhe sɛba n tan' tona, ya nii soma la ya bonhe tare tona a va'am poan. 17A wan tɔ'ɔha ya piihe la ya boohe porogerɛ boyena porogerɛ pia woo poan ge te ya dɛna a yamehe. 18Saŋkaŋa ya wan kaahɛ bo Na'ayenɛ doohe ya naba sɛka te ya mɛhe loe bo ya mɛŋa wa ge Na'ayenɛ kan lerege ya. 19Te nɛreba la zagahɛ Samuel nɔɔrɛ la ge yeti, Ɛɛn! To kɔ'ɔn bɔta la to tara to naba 20me ana wo teŋhe woo n tare se'em la, te ka beha tɔ. Te to han ne yehe pɛɛntɛɛnrɛ, ka wan bɔna to nɛŋa. 21Te Samuel kelehe nɛreba la yetɔgom zan'an, tɔgɛ bɔ bala mea bo Na'ayenɛ. 22Te Na'ayenɛ yele Samuel yeti, Sakɛ ban bote se'em la loe naba bo ba. Te Samuel yele Israeldoma wa woo yeti, Nɛra woo kule a yire.

will be added

X\