1 Samuel 7

1Te Kiriat Yearim nɛreba la wa'ana dekɛ Na'ayenɛ nɔbiŋere daka la lebe ba teŋa, Abinadab yire n boe zoore zuo la poan, ta loe a dayɔa Ebenezer te a beha Na'ayenɛ nɔbiŋere daka la. 2Pɔhɛ daanse'ere daarɛ te nɔbiŋere daka la gan'arɛ Kiriat Yearim teŋa poan la, te Israeldoma zan'an kele mɛ la Na'ayenɛ yuuma pihiyi'. 3Te Samuel yele Israel buuri la yeti, Ya han ŋmɛregera lɛbera la Na'ayenɛ zen'an na la ya suunre zan'an, bahɛ ya sateŋhe baga la Astoret baga la n boe ya zen'an la. Dekɛ ya sunya bo Na'ayenɛ, la ya tona bɔ'ɔra enŋa ma'an, ge a wan fan' ya Pilistidoma wa nu'uhen bahɛ. 4Te Israel seren bahɛ Baal la Astoret baga la ge tona bɔ'ɔra Na'ayenɛ ma'an. 5Samuel yele ba soolom yi' Israel zan'an lagahɛ Mizpa teŋa na te n sohɛ Na'ayenɛ bo ba. 6Ban lagahɛ Mizpa teŋa poan, ba ankɛ ko'om loa poan ka'ɛ biŋe teŋa Na'ayenɛ nɛŋa zagahɛ ba mɛhe de daarɛ ge sohɛ yeti, Tomam tom la be'em hom Na'ayenɛ nɛŋan. Ge bilam te Samuel daa dɛna nɛreba wa nɛŋadaana. 7Pilistidoma wa n ta wom te Israeldoma la tiihom la Mizpa teŋa poan la, ba tendaandoma maahom ba nɛreba te ba zabɛ la Israeldoma. Israeldoma la n ta baŋɛ la, dabeem n kɛn' ba Pilistidoma la zuo. 8Israeldoma wa yele Samuel yeti, Da bahɛ sohoga la te ho soha Na'ayenɛ to Yenɛ la bɔ'ɔra to la. Sohɛ te a fan' tɔ Pilistidoma wa nu'uhen bahɛ. 9Samuel nyɔkɛ pebila n nan mɔgɔrɛ kaanbɛ nyɔ'an bo'olom bo Na'ayenɛ. Te Samuel kaahɛ bo Na'ayenɛ Israel zuo, te Na'ayenɛ lebehe a sohoga la bo en. 10Samuel n boe bini kaanbera nyɔ'an bo'olom la bɔ'ɔra Na'ayenɛ la, te Pilistidoma la n bala gɛnregera Israeldoma la na te ba zabɛ la ba. Ge de daarɛ la Na'ayenɛ tanhɛ tanhega n ka tare makerɛ bahɛ Pilistidoma wa zuo, te tuluŋɔ sige ba poan te ba zɔ Israeldoma wa nɛŋan. 11Te Israeldoma la ze'ele Mizpa teŋa poan yehe na digera ba koora ba tara tara ta gaŋɛ Bet Kar teŋa. 12Te Samuel dekɛ kugure sɛ Mizpa la Sen teŋhe teŋasoka te de dɛna danlehom kugure. Ge ta segɛ zen'an la yu'urɛ Ebenezer, yeti, La pa'alɛ te Na'ayenɛ n soŋɛ tɔ. 13Ban nyaŋɛ Pilistidoma wa se'em n bala te ba ka le lɛna tara zaba Israel teŋan beene na. Te Na'ayenɛ nu'o zabera la Pilistidoma wa Samuel saŋa la woo poan. 14Te Israel lebe to'ohe a teŋse'ehe woo te Pilistidoma fan' la, ze'ele Ekron ta paɛ Gat teŋa. Israel lebe to'e a sɔ'ɔlom woo mɛ Pilistidoma la nu'uhen. Te sunma'ahom me bɔna Israel la Amoridoma teŋasoka. 15Samuel behɛ Israel teŋa mɛ a vom yuuma zan'an poan. 16Yuunɛ woo, a ne keŋɛ ta kae la Betel la Gilgal la Mizpa teŋhe behɛ. Enŋa n sɔe Israel teŋhe sena wa woo beha. 17Ge ta ne lebe Aramah teŋa na a mɛŋa yire poan, zen'an te a kɛn'ɛra. Bilam te a beha Israeldoma ge mɛ kaanbegɔ zen'an bo Na'ayenɛ.

will be added

X\