1 Samuel 6

1Na'ayenɛ Daka la n boe Pilistia teŋa poan la ŋmarehe seyopɔe, 2Pilistidoma wa yi' tendaandoma la behereba woo n boe ba teŋa la poan lagahɛ na soke ba yeti, To wan eŋɛ la wane la Na'ayenɛ daka wa? Pa'alɛ ya to wan eŋɛ se'em te ka lebe ka teŋa. 3Ba lebehe yeti, Ya han yeti ya bahɛ te Israel yenɛ nɔbiŋere daka wa lebe, da bahɛ ya ka zaŋa. Tare ya lebehe yɔ' bo'olom pa'ahɛ bo en la. A wan nyɛ tebegɔ, ge me baŋɛ. Se'ere n sɔe te a zabera la ya la. 4Te Pilistidoma wa soke ba yeti, Lebehe yɔ' bo'olom wa dela bene te to wan bo te daka wa lebe ba yenɛ la zen'an? Te ba yeti, Bo ya ba yenɛ la sanlema kpila anuu la sanlema kure sagerehe senuu. Sanlema la kpila la dɛna Pilistia teŋa tendaandoma la kanlɛ. Se'ere n sɔe la, namehegɔ yeŋɔ n sige yamam la ya tendaandoma la zan'an zuo. 5Kure ya nɔten kɛ'ɛhe la n ane se'em la la sagerehe la n ane se'em wa'ana sagom ya teŋa wa la. Ge la ya dekɛ pɛnka bo Israel yenɛ wa. Daanse'ere a wan bahɛ te la eŋɛ yamam la ya baga wa la ya teŋa la fɔla fɔla. 6Wane te ya kanbɛ ya sunya wo Mizraim teŋa naba Faro la a nɛreba la n yuun kanbɛ ba sunya se'em la? Na'ayenɛ n yuun namehe ba paɛ paɛ la, ba yuun ka bahɛ nɛreba la te ba yehe te ba yehe keŋɛ? 7Bala nananawa, maalɛ ya toroko paalega. Loe nii iyi' n nan dɔgɛ, nii te yɔgɔhɔga ka tabelɛ yɔgɛ i tom toonɛ. La ya lo' nii la ta' toroko la ge pɔnhɛ i nagabibihe la pagɛ yire. 8Ge dekɛ Na'ayenɛ daka la sugule toroko la zuo. Dekɛ sanlema lɔgɔrɔ la n de ya lebehe yɔ' bo'olom te bɔ'ɔra Yenɛ la eŋɛ daka kayema me poan kpe'ele Na'ayenɛ daka la logorɛ. Bahɛ ka te ka keŋɛ 9ge ya behera. Ka han kena tɔɔra ka teŋa Bet Semes, Na'ayenɛ n bahɛ te namehe kantɛ wa sige to zuo na wa. Ge ka han ka tɔ bilam, to baŋɛ te Na'ayenɛ nu'o ka boe to namehegɔ wa poan. La yeen wa'an la bala na. 10Te Pilistidoma wa eŋɛ bala. Ba nyɔkɛ nii iyi' n nan dɔgɛ yɔgɛ i ta' toroko la ge nyɔkɛ i nagabibihe la yu'. 11Ge ba dekɛ Na'ayenɛ daka la sugule toroko la zuo, dekɛ sanlema la n dekɛ kure sagerehe la nɔten kɛ'ɛhe la n nyɔkɛ ba la n ane se'em la eŋɛ daka kayema poan te ka suga pa'ahɛ. 12Te nagayan'ahe wa to'e Bet Semes teŋa sore tontɔɔ kena ge buuruna ka ŋmɛregera zuɔ bii gɔbega. Te Pilistia tendaandoma la dɔla i poore bala ta paɛ Bet Semes teŋa beene zuo. 13Saŋkaŋa poan la te Bet Semes teŋadoma boe la ki bɔn'ɔrɔ poan kɛɛra ba ki. Ban behɛ te nɔbiŋere daka la n bala te ba kerena ge zɔta to'oha ka. 14Te toroko la wa'ana paɛ taŋa n boe Bet Semes boraa Yosua va'amen. Te nɛreba la lagahɛ wɛgɛ toroko dɔɔrɔ la, dekɛ nii la kaanbɛ nyɔ'an bo'olom bo Na'ayenɛ. 15Bala ma'an la te Levidoma la pon ɔnbegɛ Na'ayenɛ daka la la daka sɛka te sanlema lɔgɔrɔ la bɔna ka poan la sige teŋa na sugule taŋa la zuo. Te Bet Semes nɛreba nyɔ' nyɔ'an bo'olom la kaanbegɔ bo'olom bo Na'ayenɛ de daarɛ. 16Pilistia tendaandoma banuu la nini nyɛ wana mɛ, ge nya tuluge lebe ba teŋa Ekron de daarɛ mea. 17Pilistia teŋse'ehe n dekɛ sanlema kure nɔten kɛ'ɛhe wa dɛna ba lebehe yɔ' bo'olom bo Na'ayenɛ la n wana: Asdod teŋa kure la ayena la Gaza teŋa ayena la Askelon teŋa ayena la Gat teŋa ayena la Ekron teŋa ayena. 18Ge ba me dekɛ sanlema kure sagerehe te se kanlɛ zona la Pilistia teŋkanra wa te nadoma banuu behera, ba teŋbibihe se'ehe te dangɔɔma mɛ kae se la teŋbibihe se'ehe n ka tare dangɔɔma kae se pa'ahɛ. Taŋkantɛ sɛka zuo te ba ze'ele suke Na'ayenɛ daka la sugule ka zuo la kelom bɔna bini la zina dɛna danlehom bo yele dena wa Bet Semes teŋa poan, Yosua samanɛ la zuo. 19Te Na'ayenɛ ko Bet Semes nɛreba pihiyopɔe, la bama n behɛ Na'ayenɛ daka la poan la zuo. Bet Semes nɛreba la kele, Na'ayenɛ n ko ba ba' zo'e la zuo. 20Te Bet Semes doma wa yeti, Ane n wan ta'an ze'ele Na'ayenɛ wa n de fa'a Yenɛ wa nɛŋan? Ane zen'an te to wan tare nɔbiŋere daka wa ta ze'ele? 21Wana zuo te ba tom sɔɔleŋa bo Kiriat Yearim teŋadoma ha yeti, Pilistidoma la tare Na'ayenɛ daka la lebe na. Sige ya na dekɛ ka keŋɛ ya zen'an.

will be added

X\