1 Samuel 5

1Pilistidoma n fan' Yenɛ nɔbiŋere daka la, ba dekɛ ka ze'ele la Ebenezer tare ka wa'an Asdod teŋa na, 2tare ka ta ze'ele ba bagarɛ Dagon yire poan lɛm la ba bagarɛ Dagon la. 3Te beere ta yelegɛ te Asdod nɛreba ihege na behɛ te bagarɛ Dagon lu aliko gan'an Na'ayenɛ nɔbiŋere daka la nɛŋan. Te ba ɔnbegɛ bagarɛ Dagon lebehe ze'ele de ze'elego zen'an. 4Te yiimbeere bolika, ba ihege na te bagarɛ Dagon le lu la aliko gan'an Na'ayenɛ nɔbiŋere daka la nɛŋan te de zuo la de nu'uhe fige gan'an la nɔɔrɛn ge gee bagarɛ la linlinɛ. 5Bala n sɔe te tendaandoma sɛba n kaanbere bagarɛ wa, la nɛresɛba n kɛn'ɛre de zen'an Asdod teŋa poan la ka nɛɛra Dagon deo la nɔɔrɛ dɔɔ la zuo ge kɛn'ɛra ko poan la zina me la. 6Te Na'ayenɛ nu'o zabera la Asdod doma wa vuunha ba ge ŋmɛ'ɛra ba la nɔten kɛ'ɛhe Asdod teŋa la, la ka kenkɛlehe teŋhe zan'an. 7Asdod doma wa n ta nyɛ yɛla la n kene se'em ba teŋa la poan la, te ba yele taaba yeti, Israel yenɛ nɔbiŋere daka wa kan le ze'ele to zen'an. Se'ere n sɔe la, Yenɛ la n bala zabera la tomam la to bagarɛ Dagon wa. 8Te ba tom yi' tendaandoma woo n boe Pilistia teŋa poan lagahɛ na soke ba yeti, To wan eŋɛ la wane la Israel yenɛ nɔbiŋere daka wa? Te ba ko nɔɔrɛ yeti, Bahɛ ya te Israel yenɛ nɔbiŋere daka wa keŋɛ Gat teŋa. Bala te ba bahɛ te Israel Yenɛ nɔbiŋere daka wa paɛ Gat teŋa wa n de Pilistia teŋa kayema la poan. 9Ban tare nɔbiŋere daka la paɛ Gat teŋa na ba'ahɛ la, Na'ayenɛ nu'o pɔhɛ mɛ zabera la Gat teŋa la te dabeem kantɛ kɛn' teŋa la. Te nɔten kɛ'ɛhe pogolom bonkotɛ la bonbila woo n boe teŋa la poan. 10Te ba tare Israel Yenɛ nɔbiŋere daka wa tole Ekron teŋa. Toolom daka wa n ta paɛ Ekron teŋa poan la, teŋa la nɛreba la woo bo'ore la tagurehe, ge sokera yeti, Wane te ba tare Israel yenɛ nɔbiŋere daka la wa'an to teŋa wa na te ka ko to nɛreba? 11Te ba tom yi' Pilistia teŋa tendaandoma zan'an lagahɛ na yele ba yeti, Bahɛ ya te Israel yenɛ nɔbiŋere daka wa lebe ka mɛŋa teŋa, te to nɛreba wa da ki. Kum ma'an dabeem n boe teŋa la zan'an poan, Yenɛ nu'o n zaberɛ la ba ba teŋa la poan zuo. 12Hom se'em n pon ka ki, nɔten kɛ'ɛhe wan nyɔkɛ hɔ. Wana zuo te teŋa la nɛreba kaahɛ, te ba kaahega la paɛ Yenɛ nɛŋan.

will be added

X\