1 Samuel 4

1Te Samuel yele kae Israel teŋa zan'an. Saŋkaŋa mea poan te Pilistidoma yehe pɛɛntɛɛnrɛ la Israeldoma, te Israeldoma yehe to'ohɛ Pilistidoma wa te ba zabɛ. Te Israeldoma tiihom bɔna Ebenezer, te Pilistidoma me tiihom bɔna Apek. 2Te Pilistidoma la maahom ze'ele te ba zabɛ Israeldoma la. Zaberɛ la n ta mɔ'ɛ la, Pilistidoma la nyaŋɛ Israeldoma mɛ, ko Israeldoma paɛ wo nɛreba tuha anaahe zaberɛ la poan. 3Israel pɛɛntɛɛnreba n lebe ba tiiheŋɔ zen'an na la, te Israel keendoma la yeti, Bene zuo te Na'ayenɛ tulum to bahɛ Pilistidoma wa nu'uhen bala zina? Bahɛ ya te to lebe Silo ta tare Na'ayenɛ nɔbiŋere daka la na, te Na'ayenɛ wa'ana pa'ahɛ to poan la a fan' tɔ to diŋdoma wa nu'uhen bahɛ. 4Te ba tom nɛreba Silo te ba keŋɛ ta zi Pɛɛntɛɛnreba Na'ayenɛ la n zin' an te kelompagehedoma kae en la nɔbiŋere daka zuo la na. Te Eli dayɔɔhe seyi' la, Hopni la Pinehas, wa'ana la Yenɛ nɔbiŋere daka la. 5Na'ayenɛ nɔbiŋere daka la n ta kɛn' Israel tiiheŋɔ la poan na la, Israeldoma la zan'an lagom sakɛ mɛ kpimm te teŋa la miim. 6Pilistidoma la n wom sake se'ere n sige Israeldoma tiiheŋɔ la poan la, te ba sokera taaba yeti, Wane te voole dena wa vɔɔla Hebrudoma wa tiiheŋɔ wa poan ha wa? Ban ta baŋɛ te Na'ayenɛ nɔbiŋere daka la n wa'an Israeldoma la tiiheŋɔ la poan na la, 7dabeem n kɛn' ba te ba yeti, Yena n kɛn' Israeldoma tiiheŋɔ la poan na. Yele boe to zuo! Yele dena wa taaba ka tabelɛ eŋɛ. 8Yele boe to zuo! Ane n wan ta'an fan' tɔ yena wa n kpe'em wa nu'uhen bahɛ? Yena ana n tabelɛ dekɛ ban'ahe yema yema ko' Mizraimdoma pɔgɔtia poan ha la. 9Kpeŋe ya mɛhe, Pilistia boraahe wa, la ya da lebege Hebrudoma wa da'aba wo bama Hebrudoma wa n de ya da'aba se'em wa. Ba' ya lea boraanɛ zabɛ. 10Te Pilistidoma wa zabɛ la sunkanberɛ nyaŋɛ Israeldoma wa. Te Israeldoma la zɔta te ba kule ba yiya. Daanden daarɛ, ba ko Israeldoma zo'e mɛ kɔrom ba pɛɛntɛɛnreba sɛba n kenɛ teŋa la paɛ wo nɛre tuha pihitan'. 11Te Pilistidoma wa nyaŋɛ fan' Yenɛ nɔbiŋere daka la ge kɔrom Eli dayɔɔhe seyi', Hopni la Pinehas la. 12De daarɛ mea te Benyamin boraa kayema peɛn pɛɛnbɔn'ɔn la poan zɔ na paɛ Silo teŋa. Te a futo aanhom, te a va tentɔnɔ yeele a zuo paɛ na. 13Boraa wa n paɛ na la te Eli zin' la koka zuo sore nɔɔrɛn limiha. Se'ere n sɔe la, a paleŋa n ɛngere la Yenɛ nɔbiŋere daka la. Boraa la n kɛn' teŋa la poan na yele sɛla woo n eŋɛ la, teŋa la zan'an taɛ mɛ la koonɔ. 14Te Eli ta wom koonɔ la soke yeti, Bene n sɔe koonɔ wa? Te boraa la mɛŋa wa'ana na yele Eli sɛla n eŋɛ. 15Bala ma'an la te Eli dela yuum pihiwae' la anii, te a nini yanlegɛ te a ka le nyɛta. 16Te boraa wa yele Eli yeti, Mam kɔ'ɔn peɛn la pɛɛnbɔn'ɔn la poan zina zɔta na wa. Te Eli soke en yeti, N dayɔa, la ane wane ha? 17Te boraa wa lebehe yele en yeti, Israel zan'an zɔ mɛ Pilistidoma la nɛŋan. Ba kɔrom Israel pɛɛntɛɛnreba zo'e mɛ. Ba ko ho dayɔɔhe seyi' Hopni la Pinehas ge fan' Yenɛ nɔbiŋere daka la. 18Boraa la n porɛ Yenɛ nɔbiŋere daka la, te Eli ze'ele a koka la zuo lu azampoyɛla nɔɔrɛ, te a nyugela kɔ' te a ki. Se'ere n sɔe la, a ba' korogɛ mɛ ge kanregɛ. A daa behɛ Israel teŋa la yuuma pihinaahe. 19Bala ma'an la me te a dayɔa Pinehas pɔga tare la puurɛ pɔnra dɔgom. Enŋa me n ta wom te ba fan' Yenɛ nɔbiŋere daka la, ge te a sera sɔ la a sera mɛŋa me ki la, te a virige kanha, dɔgɛ bilam bilam. Ge yele la damɛ en paɛ, 20te n ta bɔna bini te a ki la. Pɔgɔsɛka n dɔgɔhere en la yele en yeti, Da bahɛ te la dɛna daaŋɔ. Ho dɔgɛ la bodibila. Ge pɔka ka nyaŋɛ lebehe ba se'ere bii a kelehe ba. 21A segɛ bia la yu'urɛ te Ikabod yeti Na'ahegɔ yehe Israel poan pa'ala la ban faan' Yenɛ nɔbiŋere daka la a sera sɔ la a sera n ki la. 22A yeti Na'ahegɔ yehe Israel poan. Se'ere n sɔe la ba faan' Yenɛ nɔbiŋere daka la.

will be added

X\