1 Samuel 31

1Te Pilistidoma tɛn' pɛɛma la Israeldoma, te Israel pɛɛntɛɛnreba la zɔ te ba zo'e zo'e ki Gilboa zoore la zuo. 2Pilistidoma la tabikɛ Saul la a dayɔɔhe poore, ta ko' a dayɔɔhe sena wa Yonatan la Abinadab la Malki Sua. 3Te zaberɛ la ta mɔkɛ Saul te dagereba la dake Saul pɔgɔlom en. 4Saul yele a zaberɛ lɔgɔzanla wa yeti, Foe ho so'a wa lu' ma, ko', te baga kaanbereba wa da ganlom mam. Te lɔgɔzanla la zagahɛ, dabeem zuo, te Saul mɛŋa foe so'a lu' ka zuo, 5Zaberɛ lɔgɔzanla la n nyɛ te Saul ki' se'em la, te enŋa me foe a so'a lu' ka zuo lagom ki la Saul. 6Saul la a dayɔɔhe setan' la lɔgɔzanla la a pɛɛntɛɛnreba la zan'an ki la de daarɛ mea. 7Israeldoma sɛba woo n boe bɔn'ɔn la yakenɛ deyema ha la sɛba woo n boe Yordan Kolaa yakenɛ ha la n ta nyɛ te Israel pɛɛntɛɛnreba la zɔ ya, te Saul la a dayɔɔhe la me ki la, ba daa zɔ yehe ba teŋhe la poan mɛ, te Pilistidoma la wa'ana soe kɛn'ɛra se poan. 8Yiimbeere te Pilistidoma la wa n lebe te ba saahɛ kum la, ba nyɛ te Saul la a dayɔɔhe setan' la ki gan'an la Gilboa zoore la zuo. 9Te ba fike a zuo ge yɛɛhɛ a zaba lɔgɔrɔ la ge bo' sɔɔleŋa te la paɛ nɛreba la ba baga la. 10Te ba dekɛ Saul zaberɛ lɔgɔrɔ la ta biŋe ba Astarot baga la deo poan ge dekɛ Saul iŋa la me ta lo ta' Bet San teŋa dangoone. 11Te Yabes Gilead nɛreba n wom Pilistidoma la tom Saul yabeka se'em la 12ba pɛɛntɛɛnreba la ihege yu'uŋɔ keŋɛ ta yuluge Saul la a dayɔɔhe la iŋhe Bet San teŋa dangɔɔma la zuo lebe Yabes teŋa na nyɔ' ba bilam. 13Ge ba degehɛ ba kɔnba na laɛ *tamarisk tia tilin, Yabes teŋa poan, ge zagahɛ ba mɛhe dabeha ayopɔe.

will be added

X\