1 Samuel 26

1Zip teŋa nɛreba wa le keŋɛ la Saul zen'an Gibea teŋa poan ta yele en yeti, David sogɛ bɔna la Hakila zoore la n boe Yesimon teŋa la zuo. 2Te Saul maahom ganhɛ Israel pɛɛntɛɛnreba sɛba n mi' zaberɛ la, ba nɛreba tuha atan' keŋɛ ta kɛn' Zip Pɔgɔtia la poan te ba ɛ David. 3Te Saul la a nɛreba wa ta tiihom Hakila zoore la zuo sore nɔɔrɛn na lɛm Yesimon, te David me bɔna pɔgɔtia la ha ge wom te Saul dole en mɛ na. 4Te a tom vɛɛhereba te ba wa'ana behɛ te la seren dela bala. 5Te David mɛŋa ihege le'ehɛ wa'an Saul la a nɛreba la n tiihom zen'an la na, wa'ana nyɛ Saul la Ner dayɔa Abner n de Saul zaba nɛŋadaana la n gan' zen'an. Saul gan' mɛ te pɛɛntɛɛnreba la kae en bahɛ teŋasoka. 6Te David soke Ahimelek n de Hiti nɛra la la Zeruiah bia Abisai n de Yoab sɔɔn la yeti, Ya ane n wan doohe la mam sige Sauldoma tiiheŋɔ wa poan ha? Te Abisai yeti, Mam wan doohe ho keŋɛ. 7Te David la Abisai keŋɛ Saul la a pɛɛntɛɛnreba tiiheŋɔ zen'an la poan yu'uŋɔ. Ba paɛ bini te Saul n bala gan'an teŋasoka ginha, te a kanɛ sɛ' zɛ'a a zuin, te Abner la pɛɛntɛɛnreba la zan'an ga'an kae Saul bahɛ teŋasoka. 8Abisai yeti, Zina Na'ayenɛ kɔ'ɔn dekɛ ho diŋdaana wa eŋɛ la ho nu'uhen. Bahɛ te n dekɛ n kanɛ wa vorogɛ en tabelɛ teŋa baanlam. N ka yeti n lo' en boyi'. 9Ge David yele en yeti, Da ko en. Ane n wan ta'an dekɛ a nu'o kalom se'em te Na'ayenɛ mɛŋa n sɔ' te taala kan dɔla en? 10Na'ayenɛ mɛŋa wan ko en a daarɛ n nan ka paɛ te a ki' bii a daarɛ wan paɛ, a ta'an keŋɛ pɛɛnbɔn'en mɛ ta ki bini. 11Na'ayenɛ da sakɛ te mam dekɛ n nu'o kalom se'emdaana te a mɛŋa sɔ' wa. Dekɛ a kanɛ la la a ko'om lɛɛnka la n ze' lɛm en la te to tare keŋɛ. 12Te David dekɛ Saul kanɛ la la a ko'om lɛɛnka la n ze' a zuin la, te ba tare keŋɛ. Nɛnɛra ka nyɛ ba bii mina sɛla n eŋɛ. Se'em me ka nɛɛ, ba zan'an yee la gɔɔm poan. Se'ere n sɔe la, Na'ayenɛ mɛŋa n eŋɛ ba te ba ginha bala. 13Te David yakɛ bɔn'ɔn la keŋɛ zaan zaanrɛ ha, nya ta yaga zoore zuo, zen'an te enŋa la Saul ka lɛm taaba. 14A nya ze'ele bilam yi' Saul zaba nɛŋadaana Abner la soke en yeti, Ho sini bo? Te Abner soke en yeti, Hom dela ane yi'ire naba wa? 15Te David lebehe soke en yeti, Hom dagɛ la boraa bii? Ane n boe Israel teŋa wa poan wona la hɔ? Bene n sɔe te ho ka gura ho daana la soŋa? Nɛra ayema wa'an bilam me na te a ko ho naba la. 16Hom eŋɛ se'em la dagɛ ma'an. La han dɛna yelemɛŋɛrɛ, mam pɔ' Na'ayenɛ wa, te hom la ho nɛreba la zan'an dela ba ko ya. Se'ere n sɔe la, ya ka gure ya daana la te Na'ayenɛ mɛŋa sɔ' en la kaam. Behɛ ya soŋa soŋa nya ya naba la kanɛ la la a ko'om lɛɛnka la n ze' ne a zuin la boe? 17Te Saul baŋɛ David konkore soke en yeti, N dayɔa David, hom konkore n bala? Te David lebehe yeti, N daana, mam n bala. 18Ge a pa'ahɛ yeti, Bene te ho digera ho yameŋa wa? N eŋɛ la bem? Bene tuure te n tue ho? 19N belone ho mɛ, n daana, te ho kelehe sɛla te mam ho yameŋa wa tara te n yele ho wa. La han dɛna la Na'ayenɛ mɛŋa n dekɛ hɔ sa'ahɛ la mam, kaanbegɔ bo'olom wan te a tee a suunre ge di suguru. Ge la han dɛna la saaleba n eŋɛ wa'ana wa, be'em dɔla ba Na'ayenɛ yu'urɛ poan. Ba sa'ɛ mam mɛ n sɛla woo poan Na'ayenɛ sɔ'ɔlom la poan, ge yele mam te n keŋɛ ta tona bɔ'ɔra baga. 20Mam belone ho mɛ te ho da bahɛ te n ki teŋsɛka n zaan la Na'ayenɛ teŋa wa poan. La dela daaŋɔ bɔ'ɔra mam, la Israel naba n yehe na ɛɛra mam zu'an wa wo tɔn'ɔnha n yehe na ɛɛra kɔrɔŋa zoore zuo se'em te a ko la. 21Saul lerege en yeti, Bahɛ, ge mam tue ya n dayɔa, bahɛ sɛla woo ge lebena. Zina te hom le bahɛ mam vom bo mam wa, mam pon kan le malom tɛn'ɛha te n ko hɔ. Mam seren tom mɛ wo gɔɔŋɔ la, ge me tue tuukantɛ. 22David yele en yeti, Naa, ho kanɛ la n wana. Bahɛ te te ho boraahe la kayema wa'ana to'e na. 23Na'ayenɛ yɔɔre hom se'emdaana n ze' tontɔɔ ge tara sakerɛ mɛ. Na'ayenɛ n dekɛ ho eŋɛ n nu'uhen zina wa ge mam ka sakɛ te n dekɛ n nu'o kalom se'em te Na'ayenɛ mɛŋa sɔ' la. 24Behɛ, wo mam n nɔŋɛ ho vom yele se'em zina wa la, Na'ayenɛ me wan nɔŋɛ mam me vom yele bala, ge yehe mam n daaŋɔ woo poan. 25Saul nya yele David yeti, N dayɔa wa, kan'somɔ wan bɔna ho zuo. Ho wan tom toonkanra, ge le dɛna nyaŋera. Te David dekɛ a sore keŋɛ, te Saul me lebe kule.

will be added

X\