1 Samuel 25

1Te Samuel ta ki, te Israel zan'an lagahɛ na kele en ge pin' en a yire Aramah teŋa poan. David nya ihege kɛn' Paran Pɔgɔtia poan ha. 2Boraa n boe Maon teŋa poan dɛna dakanrɛ, tara piihe tuha atan' la boohe tuhure Karmel teŋa poan. Te boraa wa ta kɛɛra ka piihe kɔnberɔ Karmel teŋa la poan. 3Boraa wa yu'urɛ dela Nabal, te ka pɔga yu'urɛ dɛna Abigail, dɛna pɔka n de yamdaana ge me tara soŋa. Ge ka sera wa n de Kaleb nɛra wa dela nɛre wurubere te a suunre kanbɛ. 4Daarɛ deyema te David wom pɔgɔtia la ha te Nabal wa kɛɛre la a piihe kɔnberɔ. 5Te David loe a boraahe pia tom ba yeti, Keŋɛ ya Karmel teŋa boraa Nabal zen'en. Ta yele ya en yeti, Mam yeti n wa'ana po'ohɛ en. 6Ya han paɛ, ya kan' bo en yeti, Yenɛ wan bo ho vom woko, iŋma'ahom wan bɔna la hɔ la ho yiredoma, la sɛla woo n boe ho nu'uhen. 7Ge nya yele en yeti, Mam David wom te ho kɛɛre la ho piihe kɔnberɔ. Ho duŋkeema la n ne wa'ana bɔna la tomam la, to ka ete ba be'em. Ban wa'ana kɛn' la tɔ Karmel pɔgɔtia wa poan la, ba sɛsɛla ka bɔregɛ. 8Soke ho duŋkeema la ge ba wan yele ho. Bala zɔ n nɛreba wa n ze' ho nɛŋan wa ninbɔn'ɔn. Se'ere n sɔe la, tomam wa'an la de'eŋɔ daarɛ na. Bo' ho yamehe wa la ho dayɔa David sɛla te ho tara. 9David nɛreba la ta paɛ dekɛ David sɔɔleŋa la bo Nabal ge nya gura n wan lerege ba se'em. 10Te Nabal soke ba yeti, Ane n de David? Yesse dayɔa me dela ane? Ba taaba n bala zo'e zo'e baha ba daandoma zina wa la. 11Bene te n wan dekɛ n dia la n ko'om la n nɛnɔ seto te n ko' te n dogɛ bo n yamehe la, bo nɛresɛba te n ka mina ban ze'ele zen'an na? 12David boraahe wa ŋmɛregɛ lebe, wa'ana yele David sɛla woo te Nabal yele la. 13David yele a boraahe la yeti, nɛra woo dekɛ a so'a. Te ba zan'an degehɛ ba so'ahe lo, te David mɛŋa me lo' a so'a te ba yɛ'a. Boraahe wo kɔbehe senaahe n dole David yɛ'a, ge te kɔbehe seyi' yee ba tiiheŋɔ zen'an la gura ba lɔgɔrɔ. 14Nabal yamehe la kayema leen yele Nabal pɔga Abigail yeti, David n boe pɔgɔtia ha ge tom a nɛreba te ba wa'ana po'ohe to daana wa. Te ban paɛ na te a kɔ'ɔn nyɔkɛ ba toto te ba me lebe. 15Se'em ma'an te tomam daa bɔna nɛreba wa zen'an mɔen ha la to dunhe la, nɛreba wa daa ete to la soŋa. Tomam n daa boe la ba la, to sɛsɛla ka bɔregɛ. 16Tomam n daa boe la ba mɔen mea ha la, ba daa dela dangoone kae tomam bolika la yu'uŋɔ zan'an. 17Bala tɛn'ɛhɛ behɛ hom n wan eŋɛ se'em. Han dagana bala, sagaŋɔ n yeti ko sige to daana wa la a yire wa zan'an zuo. A me ba' dɛna la nɛre wurubere te a suunre kanbɛ gaŋɛ te nɛra kan ta'an tɔgɛ se'ere bo en. 18Te Abigail ihege kalam loe boroboro kɔbehe seyi' la daam talahe seyi' la piihe se'ehe te ba pon vuunle la me senuu la ki' kiinma pi'ɔ la tiihe wɔla wama kɔbega la mu'uro kɛ'ɛhe wama kɔbehe seyi' lo' lɔgɔtona wa a bonhe zuo. 19A nya yele a yamehe la yeti, Bone ya nɛŋa te n dɔla na. Ge a ka yele a sera Nabal se'ere. 20Te a yaga a boŋa zuo ta gaŋɛ zɔya la bahɛ. A yeti a behɛ te David la a nɛreba me kene na, to'ohɛ ba bilam. 21Te David nyɔna yeti, N daa namehɛ n mɛŋa la yoo beha Nabal piihe wa mɔen la ha te a pehego la koyena me ka loe bɔregɛ wa. Toonsonɛ se'ere te mam tom bo en la, a dekɛ la be'em yɔ mam wa. 22Beere bolika mam han ka ko se'em woo n de boraa sɛba woo n de Nabal nɛreba woo poan, Na'ayenɛ namehɛ mam. 23Abigail n ta nyɛta David la, Abigail kanbelɛ mɛ ze'ele a boŋa la zuo sige teŋa na dɔnbelɛ teŋa David nɛŋan, 24ge yeti, N daana, n belone ho mɛ. Bahɛ te tuure wa dɛna mam n tue ho. 25Da beha Nabal bonyore wa n eŋɛ se'em la. A yu'urɛ la vɔnrɛ dela Bonyore. N me ane se'em n bala. Ge mam ho yameŋa wa ka nyɛ ne boraahe la te ho tom na la. 26Mam pɔ' Na'ayenɛ wa la hom n daana wa mɛŋa yeti, Na'ayenɛ wa n gu' ho te ho ka ka'ahɛ ziim ganlom ho mɛŋa, doohe la hom ka dekɛ ho mɛŋa nu'o yɔ ho diŋdoma wa. Na'ayenɛ wan eŋɛ sɛba woo n eere ba tom hom n daana wa be'em la vom wo Nabal wa la. 27Ge nananawa, bahɛ te ba dekɛ bo'olom sebo te mam tare na wa bo hom n daana wa borase'ehe n dole ho wa. 28N belone hom n daana wa mɛ, te ho di sugure bo ho yameŋa wa tuure wa. Na'ayenɛ wan ba'ahom gu'ura hom n daana wa la ho yire zan'an. Se'ere n sɔe la, ho zaberɛ la Na'ayenɛ zaberɛ. Mam sohoga dela be'em wan zaanra la hɔ saŋa woo ho vom wa poan. 29Nɛra se'em han ihege digera ho te a ko, Na'ayenɛ ho Yenɛ la wan gu'ura hom n daana wa vom ge wan fan' hɔ ho diŋdoma vom lobe kalam bahɛ wo kalɔbega n lobe kugure bahɛ se'em kalam la. 30Na'ayenɛ han ta eŋɛ sɛla woo bo hom n daana wa wo n yele ho se'em la, ge nya ta loe ho te ho dɛna Israel naba, 31tɛn'ɛhebe'ero kan bɔna daana hom n daana te ho tabelɛ ko' nɛra n ka tue ho, bii hom n daana wa tabelɛ dekɛ ho mɛŋa nu'o lebehe be'em yɔ' nɛra. Na'ayenɛ han ta eŋɛ ho soŋa ba'ahɛ, ho tɛɛn mam me yele. 32Te David yele Abigail yeti, Kan'somɔ dɛna Na'ayenɛ Israel Yenɛ wa, Na'ayenɛ wa n dekɛ ho to'ohɛ mam zina wa denɛ. 33Kan'somɔ bɔna la ho potɛn'sonɛ wa ge bɔna la hom me, la hom fan' mam te n ka ka'ahɛ ziim sebo n ka tare tuure, ge le gu' mam te n ka dekɛ n mɛŋa nu'o lerege n diŋdoma wa. 34Yelemɛŋɛrɛ, mam ze' la Israel Na'ayenɛ wa n gu' mam te mam ka pogolom ho wa nɛŋan tɔgɔra wa. Hom han ka kanbele to'ohɛ ne mam kalam na, la dela sera te sɔɔnrom ta nyagere ne la te sɛla n wan yee dɛna Nabal denɛ kan gaŋɛ ne boraa kayena. 35Te David nya to'e a bo'olom la te a tare na te a bo en la, ge yele en yeti, Kula la sunma'ahom, n wom ho yetɔgom la la hom n bote sɛla la. 36Abigail lebe na paɛ yire te Nabal ete la de'eŋɔ kantɛ, te ko ana wo naba de'eŋɔ la. Te Nabal poorɛ pee la a mɛŋa. Se'ere n sɔe la, a buge mɛ. Te Abigail ka yele en se'ere ge gura te beere yelegɛ. 37Bolika se'em ma'an te Nabal daam la yehe ge te a yam nya bɔna la, te a pɔga la yele en yele ana woo. Te a paleŋa ɛnkɛ te a iŋa sɛɛn te a ka tana kena. 38Yɛ'a dabeha pia poan te Na'ayenɛ ko Nabal. 39David n ta wom te Nabal ki ya la, te a yeti, Pɛnka dɛna Na'ayenɛ denɛ, la enŋa n gankɛ tuure se'ere te Nabal tue mam la, la Na'ayenɛ n gu' mam te mam ka dekɛ n mɛŋa nu'o lerege n diŋdoma wa. Na'ayenɛ mɛŋa n dekɛ Nabal be'em la pagalɛ a zuo. Te David nya tom te ba ta soke Abigail behɛ, a han wan sakɛ te a di en. 40David yamehe la wa'ana paɛ Karmel teŋa, Abigail zen'an, yele en yeti, David n tom tɔ ho zen'an na, te to wa'ana tare ho na te ho dɛna a pɔga. 41Te a dɔnbelɛ teŋa ge yeti, Behɛ ya, mam ya pɔsɔɔ maahom ya te n dɛna ya daana yamehe wa yameŋa. 42Abigail maahom a mɛŋa kalam doohe David yamehe la lebe. A ban' la a boŋa, te a yamehe n de pɔgɔhe senuu bɔna a sakpekɔ, te ba keŋɛ ta paɛ te enŋa la David di taaba. 43Te David le daa di Yezreel teŋa pɔka Ahinoam pa'ahɛ, te ba bayi' la dɛna David pɔgɔba. 44Ge Saul pon to'e a pɔyɔa Mikal n de David pɔga la a zen'an mɛ tee bo Lais n de Galim teŋa boraa la dayɔa Paltiel te a di.

will be added

X\