1 Samuel 24

1Saul n ta zabɛ dige Pilistidoma la ba'ahɛ ge lebe na la, a wom te David sogɛ bɔna la En Gedi Pɔgɔtia la poan. 2Te Saul ganhɛ Israel pɛɛntɛɛnreba soma tuha atan' keŋɛ taŋa zoore te ba yi'ira ka Boyooro Taŋa bɔna En Gedi poan la, te ba ta ɛ David. 3Saul wa'ana paɛ piihe kɛn'an zen'enhe n boe sore la kenkɛlehe la, te taŋa yoko boe bini. Te Saul kɛn' yoko la poan te a dɔnbelɛ a na'ma. Bala ma'an te David la a nɛreba n pon bɔna yoko la poan poan ha. 4David nɛreba la waahom yele David yeti, Behɛ, zina n de daanse'ere te Na'ayenɛ pon tɔgɛ yeti, n wan dekɛ ho diŋdoma eŋɛ ho nu'uhen te ho eŋɛ ba hom bote se'em la. Te David ihege le'ehɛ ta ŋmaɛ fuo la te Saul yɛ la kenkɛleŋa. 5Ge pooren la daam David potɛn'ɛrɛ mɛ la en aanhegɛ Saul fuo la. 6A yele a nɛreba la yeti, Da tare ya potɛn'denɛ. Na'ayenɛ da bahɛ te mam dekɛ n nu'o kalom n daana se'em te Na'ayenɛ sɔ' wa. 7Bala te David kan'an a nɛreba wa la ninmɔ'ɔrɛ ka sakɛ te ba zabɛ la Saul. Te Saul dɔnbelɛ a na'ma la yoko la poan ba'ahɛ ge yehe sige sore zuo yɛ'a. 8David me ze'ele taŋa yoko la poan yehe na, keŋɛ ta zom yaga zen'an n zaan ge yi' Saul yeti, Naa, n daana! Saul n ŋmɛregɛ poore, te David pɔnrɛ na'ma 9ge yele Saul yeti, Bene te hom kɛleha nɛresɛba n yeti ho te David eere te a ko hɔ mɛ wa? 10Behɛ, zina Na'ayenɛ dekɛ ho eŋɛ n nu'uhen mɛ yoko la poan, te sɛba yele mam te n ko hɔ te mam zagahɛ ge bahɛ hɔ. Mam yeti mam kan dekɛ n nu'o kalom hom n daana wa te Na'ayenɛ sɔ' la. 11N sɔ, behɛ, ho fuo la tanɛ n wana te n aanhegɛ zanla wa. Mam n nyaŋɛ ŋmaɛ ho fuo wa, n ta'an ko ne hɔ. Ge mam bahɛ ho mɛ te ho vɔna te n pa'alɛ hɔ te mam ka eere n ko hɔ bii n tobekperega bɔna mam poan la hɔ. Mam ka tom ho be'em ge te ho ɛɛra mam te ho ko wa. 12Na'ayenɛ wan gankɛ mam la hom teŋasoka. Na'ayenɛ n wan yɔ' hɔ be'em sebo woo te ho dekɛ eta mam wa ge mam mɛŋa nu'o kan kalom hɔ. 13Wo deendoma n makɛ se'em yeti, yaalegɔ yɛla ze'ete la yaloma poan na. Bala mam nu'o kan kalom hɔ. 14Israel teŋa naba wa yehe na digera la ane? Bakiiriŋa wa bii zun'an wa? 15Na'ayenɛ wan gankɛ mam la hom teŋasoka ge bahɛ te ho baŋɛ te mam tare la som dɔla hɔ. 16David n tɔgɛ wana bo Saul ba'ahɛ la, te Saul soke en yeti, N dayɔa David, hom n bala tɔgɔra wa? Ge te a kɛla 17ge yeti, Hom n de nɛre tontɔɔ gana mam. Se'ere n sɔe la, mam eŋɛ ho la be'em te ho sina ge lebehe som yɔ mam. 18Zina ho yele mam Na'ayenɛ n dekɛ mam eŋɛ ho nu'uhen se'em ge te ho ka ko' mam. 19Nɛra han gin' a diŋdaana, a ne bahɛ en la naana? Bala, Na'ayenɛ wan yɔ hɔ la som, etesoŋɔ seko te ho dekɛ eŋɛ mam zina wa la zuo. 20Behɛ, mam mɛŋa pon mina te hom n wan ta dɛna naba te Israel sɔ'ɔlom wa bɔna ho nu'uhen. 21Bala ze'ele Na'ayenɛ wa n de ho seradaana wa nɛŋan biŋe nɔɔrɛ te la han ta ana bala, ho kan saalom mam yaahe wa yu'urɛ bahɛ, ge ho wan bahɛ ba te ba vɔna me pota mam yu'urɛ. 22Te David pɔ' bala bo Saul, te Saul lebe kule te David la a nɛreba la me le lebe tanhe zen'an.

will be added

X\