1 Samuel 23

1Ban ta yele David daarɛ deyema yeti, Behɛ, Pilistidoma n zabera la Keila teŋadoma faanra ba dia, 2a sohɛ Na'ayenɛ yeti, N keŋɛ ta zabɛ la Pilistidoma wa? Te Na'ayenɛ lerege en yeti, Ɛɛn. Keŋɛ ta zabɛ Pilistidoma wa fan' Keila teŋa wa bahɛ. 3Ge David nɛreba la yeti, Tomam n pon bɔna Yuda teŋa poan wa la, dabeem tare to mɛ la Pilistidoma wa. To nya han yeti to keŋɛ Keila teŋa wa poan ta zabɛ la Pilistidoma wa, la nya wan ana to la wane? 4David le sohɛ Na'ayenɛ de zuo, te Na'ayenɛ le yele en yeti, Ihege sige Keila teŋa poan nananawa ge n wan dekɛ Pilistidoma wa eŋɛ ho nu'uhen. 5Te David la a nɛreba la ihege keŋɛ Keila teŋa poan ta zabɛ la Pilistidoma wa, nyaŋɛ ba ge pe'e ba dunhe ge ko Pilistidoma wa zo'e zo'e ge fan' Keila teŋadoma bahɛ. 6Ahimelek dayɔa Abiatar n wa daa zɔta yɛ'a David zen'an Keila teŋa poan la, a daa dekɛ toolom fugiriga la pa'ahɛ mɛ wa'ana. 7La ta lu Saul toban te David boe la Keila teŋa, te Saul yeti, Na'ayenɛ n dekɛ en eŋɛ mam nu'uhen. A bɛnrɛ la a mɛŋa la enŋa n wa'ana kɛn' teŋa te dangoone mɛ kae ka mum, te ka tara nayahe yu'ura wa. 8Te Saul lagahɛ a pɛɛntɛɛnreba la zan'an te ba keŋɛ ta gilige Keila teŋa, te ba nyɔkɛ David la a nɛreba la. 9David n ta baŋɛ te Saul eere la a vom ninmɔ'ɔrɛ la, te a yele malemadaana Abiatar yeti, Tare toolom fugiriga la na te to baŋɛ Na'ayenɛ potɛn'ɛrɛ. 10David sohɛ yeti, Na'ayenɛ Israel Yenɛ, ho yameŋa wa wom ya te Saul maahom mɛ te a wa'ana sagom Keila teŋa wa mam zuo. 11Keila keendoma la wan nyɔkɛ mam bo Saul? Saul wan seren wa'ana wo ho yameŋa n wom se'em wa? Na'ayenɛ lerege en yeti, Ɛɛn, a wan wa'ana. 12David soke Na'ayenɛ yeti, Keila nɛreba wa wan nyɔkɛ mam la n pɛɛntɛɛnreba wa bo Saul? Na'ayenɛ lerege en yeti, Ɛɛn, ba wan eŋɛ bala. 13Te David la a pɛɛntɛɛnreba la n de wo nɛre kɔbehe seyoobe la bahɛ Keila teŋa la ge lɔmeha teŋhe. Saul n ta wom te David zɔ yehe Keila teŋa poan mɛ la, a ka le keŋɛ bini. 14David bɔna pɔgɔtia teŋa poan ha, sogɛ a mɛŋa pɔgɔtia la n boe Zip zoore teŋhe la poan, te Saul mɔ'ɛ nini ɛɛra en daarɛ woo, te Na'ayenɛ me ka dekɛ en eŋɛ Saul nu'uhen. 15David n ta bɔna la Hores teŋa n boe Zip pɔgɔtia poan la a wom te Saul yehe na ɛɛra en mɛ te a ko'. 16Saul dayɔa Yonatan ihege keŋɛ David zen'an Hores teŋa poan, te Na'ayenɛ doohe a poan kpemehe David. 17Yonatan yele en yeti, Da zɔta dabeem. Mam sɔ Saul nu'o kan malom gorɛ hɔ. Hom wan ta dɛna Israel naba te mam dɔla ho poore. N sɔ mɛŋa mi' bala. 18Te ba bayi' la ze'ele Na'ayenɛ nɛŋan biŋe nɔɔrɛ. Te David yee Hores pɔgɔtia la poan, te Yonatan me lebe kule. 19Te Zip teŋa nɛreba basɛba wa'an Saul zen'an Gibea teŋa na yele en yeti, David sogɛ bɔna la Hores zɔya la poan ha, Hakila zoore la n boe Yesimon teŋa gɔbega nu'o bɔba la poan. 20Bala naba, wa'ana wo ho suunre n bote se'em la. Tomam toonɛ dela to nyɔkɛ en eŋɛ ho nu'uhen. 21Te Saul yele ba yeti, Na'ayenɛ kan' som bahɛ ya zuo, la yamam n bote mam yele wa. 22Lebe ya ta malom behɛ soŋa, n kɔ'ɔn bɔna zen'an, la se'em n nyɛte en bini. Se'ere n sɔe la, ba yele mam n ta'an nyalema se'em. 23Ta ɛ ya baŋɛ a soka zen'enhe la zan'an, la ya tare yele yene na yele mam te n doohe la ya keŋɛ. A han seren bɔna teŋa la poan, n wan doohe Yudadoma la n kɛn'ɛre teŋa la poan la zan'an yiya foe en yehe na. 24Te ba yehe deŋɛra Saul nɛŋa yɛ'a Zip teŋa. Bala ma'an te David la a nɛreba la boe la Maon pɔgɔtia Arabah pɔgɔtia la poan, lebehe Yesimon gɔbega nu'o bɔba la. 25Te Saul la a nɛreba la keŋɛ te ba ta ɛ David. David n ta wom la, David keŋɛ la taŋa zoore la poan, ta sogɛ Maon pɔgɔtia la poan. Saul n ta wom bala la, a doohe David poore mɛ kɛn' Maon pɔgɔtia la poan. 26Te Saul ta bɔna zoore la liliŋo koyema, te David me bɔna liliŋo koyema ha la a nɛreba, kanbela te ba peɛn Saul, te Saul la a nɛreba la me mɔ'ɛ nini digera David la a nɛreba la te ba nyɔkɛ. 27Bilam te bitonoŋa tare sɔɔleŋa na bo Saul yeti, Kanbelɛ mɛ lebe yire kalam na ge Pilistidoma n sagom ho teŋa la la zaberɛ. 28Saul nya bahɛ David dika ge lebe yire te a ta zabɛ la Pilistidoma la. Bala zuo zen'an wa yu'urɛ dɛna Sela Hamalekot. 29Te David bahɛ bilam ge keŋɛ ta sogɛ En Gedi Pɔgɔtia tanhe poan.

will be added

X\