1 Samuel 22

1David yehe Gat teŋa zɔ keŋɛ Adulam teŋan ta sogɛ kɛn'ɛra taŋa yoko poan. Te a keendoma la a sɔ yire zan'an wom bala keŋɛ a zen'an. 2Nɛresɛba sunya n sagom la sɛba n tare sama la sɛba woo n tare daaŋɔ lagahɛ David zen'an na paɛ wo nɛre kɔbehe senaahe te David dɛna ba nɛŋadaana beha ba. 3David nya bahɛ bilam ge keŋɛ Mizpa teŋa n boe Moab teŋa poan la, ta yele Moab teŋa naba yeti, Bahɛ te n ma la n sɔ bɔna ka'lam la hɔ gura te n ta baŋɛ Na'ayenɛ n tare potɛn'se'ere bɔ'ɔra mam. 4Te David tare a sɔ la a ma na eŋɛ Moab teŋa naba wa nu'uhen ge sogora a mea tanhe poan ha. 5Te Na'ayenɛ nɔtɔgɔha Gad yele David yeti, Da sogora ho mɛŋa ge yehe na keŋɛ Yuda teŋa poan. Bala te David bahɛ bilam ge kɛn' Heret teŋa mɔen la ha. 6Te Saul ta wom te ba nyɛ David la a nɛreba la n boe zen'an. Bala ma'an te Saul zin' la *tamarisk tia teŋa Gibea zoore zuo zanla a kanɛ te a kpɛ'ɛndoma la zan'an kae en bahɛ teŋasoka. 7Saul yele ba yeti, Benyamin boraahe wa, kelehe ya soŋa soŋa. Ya tɛn'ɛhe te Yesse dayɔa wa han ta dɛna naba, a wan sakɛ bo ya va'ame la tiihe? A wan bo ya sore te ya dɛna kpɛ'ɛndoma behera tuha tuha, te ya sɛba beha nɛre kɔbehe wo mam n eŋɛ ya se'em wa? 8Ge wane te ya zan'an ka bɔta mam? Ya ayena ka waaɛ mam te mam mɛŋa dayɔa Yonatan n naɛ la en. Ya ayena ka yele mam yeti Yonatan n soŋorɛ mam dima te a zabera la mam. Nananawa, Yesse dayɔa wa nya gan' la mɔen pigira mam wo n ete se'em zina wa. 9Ge Doeg la n de Edom buuri la la lagom zɛ'a la Saul pɛɛntɛɛnreba la lerege yeti, Mam boe ne Nob teŋa poan se'em ma'an la, mam nyɛ ne Yesse dayɔa wa bini. A wa'an ne la Ahitub dayɔa Ahimelek la zen'an na. 10Te Ahimelek soke yɛla Na'ayenɛ zen'an bo en, bo en dia ge dekɛ Pilistia boraa Goliat so'a la bo en. 11Te Saul tom yi' Ahitub dayɔa malemadaana Ahimelek la a yire nɛreba zan'an n de malemadoma Nob teŋa poan la zan'an na, 12yele ba yeti, Ahitub dayɔa wa, kɛleha mam na. Te Ahimelek yeti, N daana n kelehe. 13Te Saul soke en yeti, Bene te ya naɛ la Yesse dayɔa wa zabera la mam? Ho soŋɛ en mɛ te a zabera la mam doohe la hom n bo en dia la so'a, ge le soke yɛla Na'ayenɛ zen'an bo en la. Nananawa, a gan' la pigira mam. 14Te Ahimelek yele naba wa yeti, Ane n boe ho pɛɛntɛɛnreba wa poan dekɛ a mɛŋa bo ho wo David wa? Enŋa n de ho dɛɛma te ho ne bo en toonɛ te a tom dɛ kalam. A dela nɛre zure ho yire la poan. 15Dagɛ zina te mam pɔhɛ soke yɛla Na'ayenɛ zen'an bo en. Aai! Naba da zɛrɛgɛ mam bii n sɔ yire wa nɛra se'em la yele dena. Se'ere n sɔe, mam ka mi' de. 16Te naba Saul yeti, Hom Ahimelek, la dela ho ki, hom la ho nɛreba wa zan'an. 17Te naba wa ŋmɛregɛ yele a gura la yeti, Ko Na'ayenɛ malemadoma wa. Ba nu'o n lagom pa'ahɛ David poan mɛ. Ba mi' te a le'ehɛ la mam zɔta, ge ba ka yele mam. Te naba wa kpɛ'ɛndoma la ka sakɛ te ba dekɛ ba nu'o kalom Na'ayenɛ malemadoma la. 18Te naba wa ŋmɛregɛ yele Doeg yeti, Doeg ko ba. Te Doeg seren kɛ' ba zan'an ko. De daarɛ Doeg ko la malemadoma n yɛɛre toolom fugiriga la pihinii la banuu, 19ge keŋɛ ta zabɛ la Nob teŋa, zen'an te malemadoma la kɛn'ɛra la, ko nɛra woo bini, boraahe la pɔgɔhe la kɔma la bilɛɛhe zan'an, ta' ba nii la bonhe la piihe zan'an. 20Ge Ahitub dayɔa Ahimelek dayɔa Abiatar ma'an n peɛn zɔ keŋɛ David zen'an, 21ta yele en te Saul ko Na'ayenɛ malemadoma la. 22David nya yele Abiatar yeti, Mam daa nyɛ Doeg bini la, mam daa mi' te a wan ba'ahom yele Saul. Mam zuo te ho buuri wa ki wa. 23Bɔna la mam ka'lam. Da zɔta dabeem ge se'em n eere a ko mam la n eere a ko hom me. Bɔna la mam ka'lam ge sɛla kan daam hɔ.

will be added

X\