1 Samuel 20

1Te David zɔ nɔtɔgɔheba teŋa Naiot la n boe Aramah teŋa poan la wa'an Yonatan zen'an na soke Yonatan yeti, Bene te ho sɔ wa zegera te a ko mam wa? 2Te Yonatan lerege en yeti, Bala kan tom. Ho kan ki. Behɛ, mam sɔ la ka yeti a tom toonpeka bii toonkantɛ ge ka yɛta mam. Wane te mam sɔ wan sogɛ mam yele dena wa? La dagɛ sera. 3Te David yeti, Yonatan, n pɔ mɛ te la dela sera. Ge ho sɔ la n mi' te ho nɔŋɛ mam la te a tɛn'ɛhɛ yeti, N han yele Yonatan yele wa, de wan daam en. Bala te a ka yele ho la. Ge mam pɔ' la Na'ayenɛ wa la hom mɛŋa wa yeti, Mam na'arɛ deyema boe la yɔɔen. 4Te Yonatan yele David yeti, Hom bote n eŋɛ sɛla woo, n wan eŋɛ bo ho. 5Te David lerege yeti, Behɛ, beere n de ŋmarepaalega de'eŋɔ la. La dela n beere lagom zin'ire naba nɛŋan di la en. Ge bo mam sore te n keŋɛ ta sogɛ mɔen ha ta paɛ dabeha atan' daarɛ la zanɔɔrɛ. 6Ho sɔ la han ta ba' bɔta te a nyɛ mam, ho yele en yeti, David sohɛ mam mɛ la ninmɔ'ɔrɛ yeti, N bo en sore te a kule a mɛŋa teŋa Betlehem ta lagom bɔna a yiredoma yuunɛ woo kaanbegɔ la poan. 7Ho sɔ la han yeti la ane soŋa, n peɛn ya. Ge a suunre han nyie, ho mina te a tɛn'ɛhe la be'em la mam. 8Eŋɛ mam som. Se'ere n sɔe la, ho biŋe la nɔɔrɛ Na'ayenɛ nɛŋan te to wan dɛna zɔtɔ la taaba yɛ'ɛha. Mam han le tue la se'ere, ho mɛŋa ye ko mam, ge da dekɛ mam eŋɛ ho sɔ nu'uhen. 9Te Yonatan yeti, Bala ka boe bini. Mam han ta baŋɛ te n sɔ bote a ko hɔ mɛ, n wan ba'ahom yele ho. 10Te David soke Yonatan yeti, Ho sɔ la han ta lerege ho bora bora, ane n wan wa'ana yele mam? 11Te Yonatan lerege David yeti, Wa'ana te to sige bɔn'en. Te ba doohe taaba sige bɔn'en la ha. 12Te Yonatan ta yele David yeti, Mam pɔ' la Na'ayenɛ wa n de Israel Yenɛ wa yeti, dabeha ayi' wa poan, mam wan baŋɛ n sɔ la potɛn'ɛrɛ n de se'ere, la en maahene se'ere. A han tɛn'ɛha la ho som, n wan bahɛ te ho baŋɛ. 13Ge n sɔe la nini han tegɛ la a tom hɔ be'em ge te mam ka bahɛ te ho baŋɛ ge soŋɛ hɔ te ho peɛn, Na'ayenɛ namehɛ mam. Mam sohoga dela, Na'ayenɛ wan kan' som bahɛ ho zuo wo n boe la mam sɔ se'em la. 14Mam han kelom vɔna, zo'ohɛ mam wo Na'ayenɛ n zo'ohɛ hom se'em la te se'em da ko mam. 15Ge n han pon ki mɛ, ge te Na'ayenɛ pon piihe hom David diŋdoma zan'an teŋparɛ wa zuo bahɛ, da makɛ foe ho zo'ohogɔ mam buuri poan bahɛ. 16Te Yonatan biŋe nɔɔrɛ la David buuri, ge yeti, To nɔɔrɛ wa te biŋe wa bɔna bala. Ge se'em n kɔ dɛ, Na'ayenɛ bahɛ te diŋdoma lebehe yɔ en. 17Te Yonatan le bahɛ te David le pɔ' nɔɔrɛ doohe la nɔŋerɛ se'ere te enŋa Yonatan nɔŋɛ en la. A nɔŋɛ en mɛ wo a mɛŋa vom la. 18Te Yonatan nya yele David yeti, Beere n de ŋmarepaalega de'eŋɔ la. Nɛreba beere wan tɛn'ɛha hom n boe zen'an. Se'ere n sɔe la, ho zin'irego zen'an la beere dela voore. 19Ge daarɛ, ho keŋɛ sige zaan ha ta paɛ zen'an te ho daa pɔhɛ sogɛ la, la ho zɛ'a lɛm taŋa la n boe bini te ba yi'ira ka Ezel la zen'an. 20N wan tɛn' pɛɛma itan' bahɛ ka kenkɛleŋa na, wo n dagare ka mɛ la, 21ge ne tom bodibila te ka wa'ana ɛ pɛɛma la na. N han yɛta bia la na yeti, Behɛ kenkɛleŋa bɔba la ge pɛɛma la gan' bini degehɛ tare na, ho lebena. Ge n la pɔ' la Na'ayenɛ wa te la dela som daaŋɔ kan bɔna bini. 22Ge n han yele bodibila la yeti, Behɛ, pɛɛma la n bala bɔna nɛŋa nɛŋa ha la, ho keŋɛ, ge Na'ayenɛ n bote ho keŋɛ. 23Ge han dɛna yelese'a te mam la hom sɔnhɛ wa la, Na'ayenɛ mɛŋa n de aseradaana mam la hom teŋasoka yɛ'ɛha. 24Te ŋmarepaalega la ta paɛ, te David keŋɛ ta sogɛ zen'an la poan. Te Saul ta zin'ire te a di. 25Nya zin'an lɛm dangoone wo n ne pon zin'an se'em la. Te Yonatan ihege ze'ele te Abinadab zin'ire lɛm la Saul, te David zen'an la dɛna voore. 26Te Saul ka yelese'ere de daarɛ la, ge tɛn'ɛha te David eŋɛ la sɛla ganlom a mɛŋa, 27ge dabeha ayi' daarɛ la, daanse'ere n tagale ŋmarepaalega de'eŋɔ la te David zen'an la kelom dɛna voore. Te Saul soke Yonatan yeti, Bene te Yesse dayɔa la ka wa'ana lagom di la to zam la zina? 28Te Yonatan yele Saul yeti, David belom mam mɛ te n bo en sore te a keŋɛ Betlehem teŋa. 29A belom mam mɛ yeti, Bahɛ mam te n keŋɛ Betlehem teŋa ge to yiredoma n tare kaanbegɔ, te n keendoma la bo nɔɔrɛ na te n bɔna bini. Bala ho nini han tegɛ la mam, bo mam sore te n keŋɛ ta nyɛ n sɔɔnrɔ la. Bala zuo te a ka nyaŋɛ wa'an naba tebole wa zuo na la. 30Te Saul suunre nyie la Yonatan, te a nyabera Yonatan yeti, Hom dagɛ mam dayɔa. Dondota wa, mam mi' te ho bote la ho na'aha Yesse dayɔa wa. Ho dela zufagaha wo ho ma n de yaloma la tobekperega daana se'em la. Mam pon mina te hom n dekɛ Yesse dayɔa wa zɔtɔ la, la wan diihe ho mɛŋa la ho ma se'em n dɔgɛ ho la vi. 31Yesse dayɔa wa han vɔna teŋparɛ wa zuo, hom mɛŋa bii ho sɔ'ɔlom kan malom bɔna. Bala tom te ba ta tare en nananawa na. A dela a ki. 32Te Yonatan yele a sɔ la yeti, Bene te a dɛna a ki, a eŋɛ la bene? 33Te Saul dekɛ a kanɛ lobe Yonatan te a ko' en. Bala te Yonatan baŋɛ te a sɔ la maahom mɛ te a ko David. 34Te Yonatan ihege tebole la poan, te a sunsunya nyie, te a ka di dia ŋmarepaalega dabahese'ere n pa'ahere ayi' la poan la. Te a suunre sagom la David te a sɔ diihe en vi la zuo. 35Bolika te Yonatan ihege doohe la a yameŋa n de bonbila keŋɛ mɔen la ha, enŋa la David n sɔnhɛ se'em la zuo. 36Te a yele bia la yeti, N han tɛn' pɛɛma wa, ho zɔ ta ɛ a na bo mam. Te bia la pɔhɛ zoa, te a tɛn' pɛɛnɛ la zooe bia la ha. 37Bia la n zɔ ta paɛ pɛɛnɛ la n lu zen'an la, te Yonatan yi' bia la ha yeti, pɛɛnɛ la ka lu la ho nɛŋan ha la? 38Te Yonatan tanhɛ bia la yeti kalam, da ze'ele. Te bia la pin'ihe pɛɛnɛ la zɔ lebe a daana Yonatan zen'an na. 39Ge bia wa ka mi' te se'ere boe. Yonatan la David ma'an n mi' se'ere n ete. 40Te Yonatan yɛɛhɛ a zaba lɔgɔrɔ bo bia la yeti, tara lɛbera kula. 41Bia la n tole ba'ahɛ la, te David ihege taŋa la zen'an sure teŋa botan', te ba Yonatan kɔkɛ taaba lagom kɛla. Ge David kaahe vɔɔla gana Yonatan mɛ. 42Te Yonatan nya yele David yeti, kena la sunma'ahom. Ge tɛnra tomam n ze'ele Na'ayenɛ nɛŋan pɔ' yeti Na'ayenɛ bɔna mam la hom, la mam yaahe la ho yaahe teŋasoka saŋa woo la. Te David keŋɛ te Yonatan me lebe kule.

will be added

X\