1 Samuel 2

1Te Hana sohɛ yeti, Mam suunre nyeene mɛ la n Na'ayenɛ. Na'ayenɛ n kpemehe mam paŋa te mam me tara nɔɔrɛ ɛnregera n diŋdoma la mam n nyeene la sɛla te Na'ayenɛ eŋɛ bo mam wa. 2Se'em ka boe ana wo hom Na'ayenɛ wa. Se'em ka boe pa'ahɛ hom n Na'ayenɛ wa. Taŋa ka boe ana wo tomam Yenɛ wa. 3Da le pa'ala ho mea. Da bahɛ te toorɛ le ze'ele ho nɔɔrɛn yehe na. Na'ayenɛ dela yam Yenɛ ge a gankerɛ nɛreba. 4Panhedoma tiini la kɔ' mɛ. Taromdoma n ton kpe'em. 5Sɛba n daa dite tegera la nya tare la ba mɛhe tɛɛhena dia ge te sɛba n daa gan' kom la yoo dita tegera. Kondɔgɔrɛ n dɔgɛ boyopɔe, te se'em n daa pon dɔgɛ bodibinto zo'e zo'e la ka le tara bia. 6Na'ayenɛ ma'an n wan ta'an dekɛ vom, ge me bo vom. Enŋa n sigehere nɛra, ge zɛnkera nɛra. 7Na'ayenɛ la n bo'ore nɔŋɔ ge bɔ'ɔra na'am. Enŋa n sigehere nɛra ge zɛnkera nɛra 8Enŋa n zɛnkere taromdoma saazuo ge yɛhera nahadoma ba ninbɔn'ɔn poan te ba zin'ita la nabiihe ge nyɛta na'ahegɔ zen'enhe sɔna. Yuunhe se'ehe n te'ele teŋa wa tara la dela Na'ayenɛ denɛ. Enŋa n dekɛ teŋa wa yagelɛ se zuo. 9A te'ele a nɛreba na'ma mɛ ge ŋmaɛ potɔpa bahɛ lika poan. Dagɛ paŋa te nɛra wan dekɛ nyaŋɛ. 10Na'ayenɛ diŋdoma wan ma'ɛn. A wan damɛ saazuo ha bahɛ na. Na'ayenɛ wan gankɛ teŋa wa zen'an woo. A wan bo a mɛŋa naba la paŋa, ge zɛnkɛ se'em te a sɔ' la kaam. 11Elkana la a nɛreba zan'an lebe kule a yire Aramah teŋa, ge te bia la yee malemadaana Eli zen'an tona bɔ'ɔra Na'ayenɛ. 12Eli mɛŋa dayɔɔhe la dɛna kɔmwuruba ka zɔta Na'ayenɛ. 13Ba ka dɔla malemadaana n sone te a tona se'em bɔ'ɔra nɛreba la. Nɛra han ne tare a bo'olom na kaanbɛ te nɛnɔ la nan doga bugum la zuo kɔta, malemadoma wa ne tom la ba yameŋa te a dekɛ nɛnɔ yaahega n tare nyɛna atan', 14wana tom sarɛ la bii dokɔ la poan. Yaahega la n vorogɛ nɛnɔ seto woo dooe na la dela bama denɛ. Bala te ba ete Israeldoma la woo n ne wa'an Silo teŋa na te ba kaanbɛ la. 15Sɛla n le pa'ahɛ dela, ba han ne yeti ba nyɔ' duŋa kaam la, malemadoma wa ne tom la ba yameŋa na yele hom se'em n wa'ana kaanbera la yeti, bo malemadoma la nɛnɔ na te ba sɛn' ge ba ka bote nɛnɔ seto n dogɛ. Ba bote la nɛnɔ kanha. 16Te nɛra la han yeti, bahɛ te ba nyɔ' kaam la ba'ahɛ ge te ho dekɛ hom n bote sɛla ho, yameŋa ne yeti, aai, bo mam nananawa na, han dagana bala n wan peregɛ to'e mam bote sɛla la. 17Bodibinto wa be'em la n ba' kanregɛ Na'ayenɛ nɛŋan se'em n bala. Ba ka dekɛ kaanbegɔ la te nɛreba kaanbera Na'ayenɛ la yi' sɛla. 18Bala ma'an te Samuel nan dela bia yɛ malemadaana toolom fugiriga bɔna Na'ayenɛ nɛŋan tona. 19Yuunɛ woo, a ma ne han ta dɔla a sera yɛ'a na te ba kaanbɛ, a ne pɛ' la fuo woko tare na bo en. 20Te Eli ne kan' som bahɛ Elkana la a pɔga Hana zuo yeti, Na'ayenɛ wan lebehe kɔma yɔ pɔgɔkana wa, la kaŋa n dekɛ bo'olom sebo bo Na'ayenɛ wa. Te ba ne lebe kule. 21Te Na'ayenɛ tɛnra Hana yele, te Hana dɔgɛ bodibinto totan' la pugunto toyi'. Te Samuel me kɔ'ɔn zɔ'ɔra soŋa Na'ayenɛ nɛŋan. 22Te Eli ta ba' korogɛ ge me wona a dayɔɔhe la n ete Israeldoma wa se'em la zan'an, ban tare pɔgɔse'ehe n tone Sogorɛ nɔɔrɛn la gan'an se'em. 23Te a yele ba yeti, Bene n sɔe te ya tona toonfɛn'ɛha ana? Nɛra woo kɔ'ɔn yɛta mam la ya toonfɛn'ɛha wa yele. 24Aai, mam wune Na'ayenɛ nɛreba wa tɔgɔra ya yele se'em zen'an woo la, la dagɛ yelesonɛ. 25Nɛra han tue a tadaana, Na'ayenɛ n wan ta'an ŋmɛ' nu'po'ɔ bo en. Ge nɛra han tue Na'ayenɛ la mɛŋa, ane n wan ta'an ze'ele ŋmɛ' nu'po'ɔ bo en? Te ba ka kɛleha ba sɔ la kan'aŋɔ la. Se'ere n sɔe la, la dela Na'ayenɛ potɛn'ɛrɛ te a ko ba. 26Te Samuel kɔ'ɔn zɔ'ɔra soŋa iŋnaanɛ poan, te Na'ayenɛ nini tegɛ la en, te a dɔgɔreba nini tegɛ la en. 27Te Na'ayenɛ nɛra ayema ta wa'an Eli zen'an na yele en yeti, Na'ayenɛ n yele se'em n wana. Mam yuum nɛɛ n mɛŋa pa'alɛ ho sɔyaabdoma yire la saŋsɛka te ba yuum bɔna bini ha dɛna da'aba bo Mizraim naba la. 28Mam n loe ho yaaba Israel yizuto la woo poan yehe na te a dɛna malemadaana bo ma. A zɔna mam kaanbegɔ daka la nyɔ'anra ko'ɛnka bɔ'ɔra mam ge yɛɛra toolom fugiriga la mam nɛŋan. Mam n dekɛ Israel nɛra woo nyɔ'an bo'olom bo ho sɔyaabdoma wa te la dɛna ba tɔntɛ. 29Wane te hom ka dekɛ mam kaanbegɔ la bo'olom sebo te mam bo nɔɔrɛ te n nɛreba wa tare kena na kaanbera ma la yi' sɛla? Wane te hom ton na'aha ho dayɔɔhe la gana mam? Wane te Israeldoma wa ne tare dunhe na kaanbɛ te ya ganhɛ kaam nɛnɔ seto n de ba nyɔ' bo mam la obe nya kanregɛ kanregɛ wa? 30Na'ayenɛ Israel Yenɛ la yeti, Mam mɛŋa n daa biŋe nɔɔrɛ te ho yire la ho sɔyaabdoma yire wan bɔna mam nɛŋan kɛn'ɛra ge yɛhera saŋa woo. Ge nananawa, Na'ayenɛ yeti, bala kan le tom. Sɛba n na'ahere mam la te n wan na'ahɛ ba. Sɛba me zagahɛ mam, n wan bahɛ te la woŋɛ ba. 31Behɛ, saŋa kene na te n wan ŋma hom la ho sɔyaabdoma yire kpe'eŋo la bahɛ, te nɛra kan bɔna ya yire la poan nyɛ a zompeela ge ki. 32Ɛnregɔ wan nyɔkɛ hɔ mam yire la poan. N wan kan som bo Israel wa zuo na la, ge hom yire la poan nɛra kan bɔna nyɛ a zompeela ge ki. 33Ya se'em te n pon bahɛ te a lagom bɔna n kaanbegɔ zen'an, a daana wan kele te a nini ta fɔ a sunsagaŋɔ poan saŋa woo. Ge so'a n wan kɔrom ya yaahe zan'an. 34Sɛla n wan eŋɛ ho dayɔɔhe seyi' wa, Hopni la Pinehas, la wan dɛna danlehom bo ho. Ba zan'an wan ki daanyenɛ. 35N mɛŋa wan loe n malemadaana se'em n wan tona dɔla mam suunre la mam potɛn'ɛrɛ n bote se'em. N wan mɛ enŋa la a yire ze'ele. A wan tona bɔ'ɔra la se'em te n sɔ' la kaam saŋa woo. 36Se'em han yee hom yire wa poan wan wa'ana se'em te n sɔ' la kaam zen'an soha ligiri la dia. A wan belom yeti, dekɛ mam kɛn'ɛhɛ Yenɛ yire tooma wa zen'an kayema la n me lagom nyɛta boroboro zonra ɔbera.

will be added

X\