1 Samuel 19

1Te Saul yele a dayɔa Yonatan la a yamehe la woo te ba ko David. Ge Saul dayɔa Yonatan nɔŋɛ David mɛ. 2Te Yonatan yele David yeti, Mam sɔ Saul zegere te a ko ho mɛ. Bala gu'ura ho mɛŋa soŋa. Beere bolika, keŋɛ ta sogɛ bɔna zen'an. 3N wan doohe la n sɔ la wa'an zen'an te ho sogɛ la na tɔgɛ ho yele bo en. N han wom se'ere n wan yele ho. 4Te Yonatan tɔgɛ David yelesoma bo a sɔ Saul ge yele en yeti, La ka nare te hom naba tom ho yameŋa David wa be'em. A tooma woo me ne tare la soŋorɛ na. 5A wa ponhɛ a vom mɛ la n daa yehe zabɛ la Pilistia boraa Goliat la. Na'ayenɛ daa doohe la bilam tare nyaŋerɛ kantɛ na bo Israel teŋa zan'an. Ho nini daa nyɛ mɛ te ho poorɛ pee. Bene zuo te ho bɔta te ho ka'ɛ ziim n ka tare taalɛ, doohe la hom yeti ho ko' David wa? 6Te Saul sakɛ Yonatan yetɔgom la ge pɔ' yeti, N pɔ' la Na'ayenɛ yu'urɛ wa te n kan ko' David. 7Pooren te Yonatan yi' David yele en sɛla woo, ge tare en keŋɛ Saul zen'an te a le ta bɔna a nɛŋan wo n ne pon bɔna se'em la. 8Te zaberɛ le ta bɔna la Pilistidoma wa, te David le yehe ta zabɛ la ninmɔ'ɔrɛ, te Pilistidoma la zɔ mɛlom a nɛŋan. 9Te Na'ayenɛ bahɛ te sebe'a sige Saul zuo, te a zin'an zanla kanɛ, te David ŋmɛ'ɛra a kɔnlɔgɔ la. 10Te Saul zegɛ te a lo' David la a kanɛ la lamenɛ dangoone. Te David le'ehɛ te kanɛ la tole ta lo' dangoone, te David yehe yire la poan yu'uŋɔ la zɔ. 11Te Saul tom nɛreba te ba ta pigira David a yire la poan ko en bolika. Ge David pɔga Mikal yele David yeti, Ho han ka zɔ yu'uŋɔ wa, beere bolika ba wan ko hɔ. 12Te Mikal soŋɛ David te a doohe takole poan sige zɔ, 13ge te Mikal dekɛ bagarɛ n yagom ana wo nɛra la, te boohe kɔnberɔ vuge de zuo, gan'arɛ gɔrɔgɔ la zuo pile dela futo. 14Yiimbeere bolika te Saul tom a nɛreba te ba wa'ana nyɔkɛ David na. Te Mikal yele ba yeti, David bɛn'ɛnre mɛ. 15Te Saul le tom ba te ba lebe ta nyɛ David la ba nini. Ge yele ba yeti, David han pon gan'an la gɔrɔgɔ zuo kan ta'an ihege, tare ya en a gɔrɔgɔ la zuo na te n bahɛ te ba ko en. 16Sɛba te Saul tom la n kɛn' na la, ba nyɛ la bagarɛ n maalɛ wo nɛra la, vuge boohe kɔnberɔ n gan' gɔrɔgɔ la zuo. 17Te Saul soke Mikal yeti, Bene te ho pan'ahɛ mam wana ge bahɛ te n dima wa zɔ peɛn wa? Te Mikal lebehe en yeti, a yele mam mɛ yeti, N han kan soŋɛŋ enŋa te a zɔ, a wan ko mam. 18Te David zɔ peɛn wa'an Samuel zen'an Aramah teŋa poan na yele en sɛla woo te Saul dekɛ eŋɛ en la. Te enŋa la Samuel keŋɛ ta zin'ire nɔtɔgɔheba teŋa la poan. 19Te Saul ta wom te David boe la nɔtɔgɔheba teŋa Naiot teŋa la n boe Aramah teŋa poan la. 20Te Saul tom nɛreba bini te ba ta tare David na. Te ba paɛ Aramah teŋa na nyɛ te Samuel boe nɔtɔgɔheba la nɛŋan te ba pota. Te Na'ayenɛ sea la sige Saul n tom sɛba na la zuo, te ba lagom pota. 21Te Saul wom bala le tom basɛba. Te bama me paɛ na yee porega, te Saul le tom basɛba, pa'ahɛ sugumnɔɔren botan', te bama me paɛ na yee porega. 22Te Saul mɛŋa nya ihege yɛ'a Aramah teŋa na. Wa'ana paɛ Seku teŋa loa poan, nya soke yeti, Samuel la David wa boe la bɛha wa? Te nɛra ayema yele en yeti, ba boe la nɔtɔgɔheba teŋa Naiot n boe Aramah teŋa poan la. 23N boe sore la zuo kena yɛ'a la, te Na'ayenɛ sea la sige a zuo te a pɔhɛ porega sore la zuo tara tara ta paɛ nɔtɔgɔheba teŋa wa n boe Aramah teŋa poan la, 24Yɛɛhɛ a futo bahɛ ge pota Samuel nɛŋan. Gan'an teŋa beele de daarɛ wontɛɛŋa la la yu'uŋɔ la. Te nɛreba sɔkera yeti, Saul me lagom pa'ahɛ nɔtɔgɔheba la poan mɛ?

will be added

X\