1 Samuel 18

1David n ta tɔgɛ la Saul ba'ahɛ la, te Saul dayɔa Yonatan sea kɛn' David, te Yonatan nɔŋɛ David wo a mɛŋa la. 2De daarɛ te Saul to'e David te a kan bahɛ te a lebe a sɔ yire. 3Yonatan biŋe nɔɔrɛ la David. Se'ere n sɔe la a nɔŋɛ David mɛ wo a mɛŋa la. 4Te Yonatan yɛɛ a fuseko te a yɛ la bo David, dekɛ a zaba lɔgɔrɔ pa'ahɛ en, la a zaba so'a la tanhɔ la a sɛganɛ. 5Saul han ne tom David zen'an woo, a ne keŋɛ lebe mɛ na la nyaŋerɛ. Te la bahɛ te Saul dekɛ en te a dɛna a pɛɛntɛɛnreba la nɛŋadaana. Te la pee nɛreba la zan'an suunre ta ta' la Saul yamehe mɛŋa, te a dɛna ba nɛŋadaana. 6David n ko Pilistia boraa la te Israeldoma la nya lɛbera kula na la, te Israel teŋa pɔgɔhe nya yehe la ba bonŋmɛ'ɛla, yoona wa'ara la ba senyagahe la duurenhe to'oha Naba Saul la popeelom. 7Te pɔgɔhe la poorɛ pee, te ba nya yoona sakera yeti, Saul ko la tuha te David ko tuha pia. 8Te Saul suunre nyie la ban yeti se'em la. Te a yele a mɛŋa yeti, Ba dekɛ la tuha pia bo David ge ton dekɛ tuha bo mam. La wan eŋɛ la wane te a kan sɔe dɛna naba? 9Pɔhɛ de daarɛ, Saul nini tɛnte mɛ la David. 10Yiimbeere te sebe'a sɛka te Na'ayenɛ bahɛ te ka nameha Saul la sige Saul zuo na, te a bɔna a yire la poan nyabera, te David ŋmɛ'ɛra kɔnlɔgɔ la wo n ne pon eta se'em daarɛ woo la. Te Saul zanla kanɛ a nu'uhen, 11nya tɛn'ɛhɛ bo a mɛŋa yeti, N wan kɔ'ɔn dekɛ la kanɛ wa vorogɛ en lamenɛ la dangoone wa. Seren dekɛ kanɛ la lobe David, te David le le'ehɛ bilam me pa'ahɛ boyi'. 12Saul nya zɔta David. Se'ere n sɔe la, Na'ayenɛ bahɛ Saul mɛ ge nya tee bɔna la David. 13Te a foe David te a da le bɔna a nɛŋan, ge dekɛ pɛɛntɛɛnreba tuhure ma'an bo en te a beha. Te David ne bɔna pɛɛntɛɛnreba tuhure wa nɛŋan tare ba yehe ge tare ba lebe na. 14Sɛla woo te David ne eŋɛ, a ne nyaŋɛ mɛ. Se'ere n sɔe la Na'ayenɛ n boe la en. 15Saul n ta behɛ te David nyaŋere eta sɛla woo mɛ la, te dabeem nya tara en la David. 16Ge te Israel la Yuda teŋhe nɛreba zan'an me nɔŋɛ David. Se'ere n sɔe la, enŋa n ne bɔna ba nɛŋa tare ba yehe ge tare ba lebe na. 17Te Saul ta yele David daarɛ deyema yeti, Mam pɔyɔkeema Merab n wana. N wan dekɛ bo ho te ka dɛna ho pɔga. Ze'ele kaŋkaŋe bo mam la ho zabɛ Na'ayenɛ zaberɛ wa. Saul tɛn'ɛhɛ bo la a mɛŋa yeti, N kan dekɛ n nu'o kalom en, n wan bahɛ te Pilistidoma wa tulugɛ en. 18Te David yele Saul yeti, Mam me dela ane? N keendoma dela bane n sɔ yire la poan Israel teŋa wa poan, te mam me ta dita naba pɔyɔa? 19Ge saŋsɛka te ba wan dekɛ ne Saul pɔyɔa Merab wa bo ne David la, ba tee dekɛ ka bo la Adriel n de Mehola tla te a di. 20Te Saul pɔyɔa kayema bɔna te ka yu'urɛ dɛna Mikal, nɔŋɛ David. Te Saul ta wom te la pee a poorɛ. 21Te a tɛn'ɛhɛ bo a mɛŋa yeti, Bahɛ te n dekɛ en bo en te a di en, te a dɛna bɛnregɔ bo en te Pilistidoma wa nyaŋɛ ko en. Te Saul le yele David pa'ahɛ a boyi' yeti, Saŋkana poan, ho nya wan dɛna mam dɛɛma. 22Te Saul bo a yameŋa nɔɔrɛ yeti, ta tɔgɛ la David a ma'an yeti, Behɛ, naba wa nɔŋɛ ho yele mɛ, te a tontoneba wa woo me nɔŋɛ hɔ. Bene zuo te ho kan di a pɔyɔa la? 23Te Saul yamehe la tare yele ana wa wa'ana tɔgɛ la David a ma'an. Te David yele ba yeti, Yamam n tɛn'ɛhɛ te la dela naana? Mam naha wa, mam se'em n dagɛ sɛsɛla wa, ta dita naba pɔyɔa? 24Te Saul yamehe wa lebe ta yele Saul David n yele se'em la. 25Te Saul yele ba yeti, ta yele ya David yeti, Naba ka eere pɔge solɛ ho zen'an. A bote la Pilistidoma yo'gɔnɔ ma'an. Naba bote la ho yeen lerege a diŋdoma wa ma'an. Saul ete wana wa la a bahɛ te David ta lu Pilistidoma la nu'uhen. 26Naba yamehe wa n wa'ana yele David wana wa la, David poorɛ pee mɛ te a bɔta te a di naba pɔyɔa la. Te naba la n bo saŋsɛka la ta paara, 27te David ihege la a pɛɛntɛɛnreba keŋɛ ta ko Pilistidoma nɛre kɔbehe seyi' fige ba yo'gɔnɔ wo naba la n bote kanlɛ se'ere la tare na bo naba la, te a nyaŋɛ di naba pɔyɔa la. Te Saul dekɛ a pɔyɔa Mikal bo David te ka dɛna a pɔga. 28Ge naba Saul n ta baŋɛ te Na'ayenɛ n boe la David te a pɔyɔa Mikal me nɔŋɛ David la, 29te Saul malom zɔta David. Yehe bilam yɛ'ɛha, Saul nya kɔ'ɔn dɛna la David diŋdaana. 30Te Pilistia teŋa zaba nɛŋadoma maahom yehe na te ba zabɛ la Israeldoma, te bama me yehe na wo ban ne pon yɛha se'em na la, ge David ma'an n nyɛ nyaŋerɛ gana Saul yamehe la zan'an. Te David yu'urɛ yehe dɛna yu'urɛ kantɛ.

will be added

X\