1 Samuel 17

1Te Pilistidoma lagahɛ ba pɛɛntɛɛnreba te ba zabɛ. Ba lagahɛ la Soko teŋa n de Yuda sɔ'ɔlom la poan, nya ta tiihom Epes Damim n boe Soko la Azeka teŋhe teŋasoka la poan. 2Saul la Israel pɛɛntɛɛnreba me tiihom Elah Bɔn'ɔn poan, maahom te ba zabɛ la Pilistidoma wa. 3Pilistidoma la yaga zoore deyema zuo te Israeldoma me yaga zoore deyema me zuo, te bɔn'ɔn gan'an ba teŋasoka. 4Paŋadaana ayema yu'urɛ n dela Goliat n kɛn'ɛra Gat teŋa, ze'ele Pilistidoma tiiheŋɔ la poan yehe na ze'ele, te ka woko dɛna santira pia la ayoobe la tabatɛ. 5A vuge nyɔgom wanɛ, yɛ' nyɔgom fuo, te ko tebehom zona la nyɔgom kpila tuha anuu tebehom la. 6Ge a pire nyɔgom forɛ a na'ma ge buga nyɔgom kanɛ se'ere n tare lɔbera a bɔgɔrɔ zuo. 7Te a kanɛ la kanregɛ, te de nɔɔrɛ ana sɔnpe wo piŋkpa'a la, te de nɔɔrɛ la ma'an tebehom zona la kuto kpila kɔbehe seyoobe tebehom, te se'em n zanle a zaba tɛ'ɛlega la nya bɔna a nɛŋa. 8Te a ne yehena ze'ele tanhɛ Israel pɛɛntɛɛnreba la yeti, Bene te ya zan'an maahom zɛ'a te ya zabɛ? Mam dagɛ la Pilistia te yamam me dɛna Saul yamehe? Loe ya boraa ya poan te ka sige paɛ mam ka'lam na. 9Ka han nyaŋɛ zabɛ ko mam, tomam zan'an wan dɛna ya yamehe. Mam han zabɛ la en nyaŋɛ ko en, yamam me wan dɛna tomam yamehe. 10Ge a le pa'ahɛ yeti, Zina, mam ka behɛ nyɛ Israel teŋa pɛɛntɛɛnreba wa. Loe ya boraa ya poan bo mam na te to zabɛ. 11Saul la Israel zan'an n wom Pilistia teŋa boraa wa yetɔgom wa la, ba giinla kɔ'ɔhe mɛ te dabeem kɛn' ba. 12David nan dela Yesse n de Eprata nɛra n boe Betlehem teŋa Yuda sɔ'ɔlom poan la dayɔa. Yesse wa tare la dayɔɔhe senii. Te Saul saŋa poan la te boraa wa pon korogɛ mɛ te a yuuma gaŋɛ. 13Boraa wa dayɔɔhe se'ehe setan' n de keendoma la pon doohe la Saul keŋɛ pɛɛn bɔn'ɔn la poan ha. A dayɔɔhe setan' la n doohe Saul keŋɛ pɛɛnbɔn'en la yu'ura dela Eliab n de keema la, tagalɛ Abinadab, nya tagalɛ Sammah. 14David n de yebega ba woo poan, ge keendoma batan' la zan'an doohe la Saul keŋɛ pɛɛnbɔn'ɔn la poan, 15ge te David yee bɔna Saul yire, ge lɛbera kula Betlehem teŋa behera a sɔ piihe la. 16Pilistia paŋadaana wa daarɛ woo yɛhera na zɛ'ɛta la bala tara tara la dabeha pihinaahe, bolika la yu'uŋɔ zan'an. 17Te daarɛ deyema te Yesse yele a dayɔa David yeti, Tɔnbegɛ ki sen'erema la wanɛ wa me'en, ge dekɛ boroboro pia wa keŋɛ pɛɛnbɔn'en la poan kalam ta bo ho keendoma la. 18Tara iilom kaam pia ana me ta bo ba kpɛ'ɛma la n behere ba woo la. Ta behɛ ho keendoma la n ane se'em ge lebe na te n baŋɛ. 19Saul la bama la Israel pɛɛntɛɛnreba zan'an boe la Elah teŋa pɛɛnbɔn'ɔn la poan zabera la Pilistidoma. 20David ihege bolika yu'uŋyu'uŋɔ bahɛ piihe la bo duŋkeena, ge dekɛ lɔgɔseto te a sɔ maahom bo en la keŋɛ wo a sɔ n pa'alɛ en se'em la. A ta paɛ tiiheŋɔ zen'an la la bolika, te ba maahene te ba yehe la pɛɛnbɔn'ɔn la poan sakera pɛɛntɛɛnrɛ baaŋa. 21Israel la Pilistia pɛɛntɛɛnreba la maahom te ba zabɛ taaba. 22David dekɛ lɔgɔrɔ la eŋɛ lɔgɔ behera la nu'uhen ge zɔ yehe kalam kɛn' pɛɛntɛɛnreba la poan ta po'ohɛ a keendoma la. 23N boe bini tɔgɔra la a keendoma la, te Pilistia paŋadaana Goliat n kɛn'ɛra Gat teŋa la n bala ze'ele Pilistia pɛɛntɛɛnreba la poan yehe na ze'ele tɔgɛ n ne pon tɔgɔra se'em la. Te David wom. 24Israeldoma la zan'an n nyɛ boraa wa la, dabeem n kɛn' ba, te pa pabegɛ zan'an. 25Bala te Israeldoma ne yɛta taaba yeti, Boraa wa n yehe na wa, ka yehe na te ka diihe la Israeldoma vi. Naba yeti se'em n nyaŋɛ ko boraa wa, a wan bo en lɔgɔrɔ te a daana lebege bontata, ge dekɛ a pɔyɔa bo a daana te a di, ge bahɛ te a daana yiredoma da yɔɔra teŋan koborɛ. 26David soke borase'ehe n ze' a zen'an yeti, Ba wan eŋɛ la bene bo nɛra se'em n nyaŋɛ ko Pilistia boraa wa, fan' Israel bahɛ? Pilistia boraa wa n ka ŋma wa me dela ane wan nyaŋɛ diihe Yenɛ vɔa wa pɛɛntɛɛnreba vi? 27Ba la lerege bala mea bo en yeti, Ba wan eŋɛ se'emdaana n wan ko boraa kana wa se'em n bala. 28A keema Eliab n wom en tɔgɔre la boraahe la, te a sunsunya nyie la David. Te a paɛ soke en yeti, Ho wa'an ka'lam na te ho eŋɛ la bene? Ho dekɛ piihe la fiin wa la bahɛ la ane mɔɔ la poan ha? Mam mi' ho tobekperega la, la ho potɛn'be'o seko te ho tɛn'ɛha la. Ho zɔ wa'ana te ho behɛ la zaberɛ wa. 29Te David yeti, Mam eŋɛ la bene? Sokere te mam yeen soke la bii. 30Ge te a bahɛ a keema ge ŋmɛregɛ tɔ boraa kayema, tɔgɛ la kaŋa me bala mea. Te nɛreba la lerege en wo ban pon lerege en yia se'em la. 31David n tɔgɛ se'em te nɛreba la wom la, ba dekɛ la bala mea ta tɔgɛ bo Saul. Te Saul tom yi' David na. 32David yele Saul yeti, Nɛra nɛra paleŋa da ŋmɛ'ɛra la boraa wa. Mam ho yameŋa wa wan keŋɛ ta zabɛ la Pilistia boraa wa. 33Saul yele David yeti, Ho kan ta'an ta ze'ele zabɛ la Pilistia boraa wa. Hom nan dela bonbilipaalega, enŋa me pon dɛna la a pɛɛntɛɛnra a bonbilomen na. 34Ge David yele Saul yeti, Mam ho yameŋa wa ne gura n sɔ piihe mɛ, te gbegenɛ bii sanheŋa ne han wa'ana te a nyɔkɛ pehego mam piihe wa poan. 35Mam ne dige en mɛ ta ŋmɛ' en bahɛ fan' pebila la a nɔɔrɛn. Te a han ŋmɛregɛ zabera la mam mɛŋa, n ne gin' la a kariyɛ'a lobɛ en teŋa ŋmɛ' en ta ko. 36Ho yameŋa wa ko' gbegema la sanhe mɛ. Bala Pilistia bonyore wa wan dɛna bama ayema la enŋa n deŋɛ diihe Yenɛ vɔa wa pɛɛntɛɛnreba wa vi la. 37Na'ayenɛ n ne fan' mam gbegema la sanhe nu'uhe poan bahɛ, a wan fan' mam Pilistia boraa wa nu'uhen bahɛ. Te Saul yele David yeti, Kena ge Na'ayenɛ wan bɔna la hɔ. 38Saul nya dekɛ a mɛŋa zaberɛ lɔgɔrɔ tee yɛ David, dekɛ nyɔgom zuowanɛ la vuge David zuo, dekɛ nyɔgom fuo la yɛ en. 39David dekɛ Saul so'a gabɛ pagalɛ a zaba lɔgɔrɔ la zuo, zegɛ te a keŋɛ wuu koŋe. Se'ere n sɔe la, a ka malom lɔgɔrɔ la. David yele Saul yeti, Mam kan ta'an yɛ futo tona eŋɛ sɛla. Ge te a yɛɛhɛ ba. 40Ge te a dekɛ a duŋkeendoore pɛnkɛ sige bɔka poan ta ganhɛ kugusaala anuu eŋɛ a tapɔɔ poan, ge zanla a kalɔbega yehe paara Pilistia wa. 41Te Pilistia boraa la me yehe na, te se'em n zanle a zaba tɛ'ɛlega la bɔna a nɛŋan te a vuta to'oha David. 42En n behere David la, a ka nam en. Se'ere n sɔe la David ba' dɛna la bonbilipaalega te a nini wekɛ, te a naanɛ ana soŋa. 43Pilistia boraa soke David yeti, Mam dela baa te ho tara dibehe yɛ'a na te ho ŋmɛ? Ge en dekɛ a baga pɔta baha David zuo. 44Ge a yele David yeti, Wa'ana, n wan tɔɔnhom ho iŋganɛ bo niihe la mɔen dunhe te ba di. 45Te David yele Pilistia boraa wa yeti, Hom tare la so'a la kanɛ la zan'anɛ to'oha mam na. Ge mam dekɛ la Pɛɛntɛɛnreba Na'ayenɛ la n de Israel pɛɛntɛɛnreba Yenɛ te ho kɛhɛ dela yu'urɛ to'oha ho na wa. 46Zina daarɛ wa, Na'ayenɛ wan dekɛ ho eŋɛ n nu'uhen. N wan ŋmɛ' hɔ lobɛ teŋa fike ho zuo. Ge n wan dekɛ Pilistia pɛɛntɛɛnreba wa iŋhe bo niihe la mɔen dunhe te ba di. Teŋparɛ wa zuo zan'an wa baŋɛ te Yenɛ boe Israel teŋa wa poan. 47Te sɛba me n kaahom zɛ'a wa wan baŋɛ te Na'ayenɛ ka tare la so'a bii kanɛ faanra nɛreba baha. Zaberɛ la dela Na'ayenɛ zaberɛ. A wan dekɛ ho eŋɛ to nu'uhen. 48Pilistia boraa wa n yehe me na to'oha David, te David me yehe zɔta tole la nɛŋan na to'oha en. 49Te David tom a tapɔɔ la poan foe kugure eŋɛ a kalɔbega la poan kpan' Pilistia boraa wa gbe'ere, te kugure la ferɛ a gbe'ere la poan ha, te a lu teŋa aliko. 50Te David dekɛ la kalɔbega la kugure kpan' Pilistia boraa wa lobɛ teŋa ko' en. David ka zanle so'a a nu'uhen. 51Te David zɔ paɛ zɛ'a en zuin, gin' Pilistia meŋa so'a daregɛ ka foe ka pɔkɔ la poan fike a zuo la so'a la. Pilistidoma wa n ta baŋɛ te ba paŋadaana la ki mɛ la, te ba zɔ'. 52Te Israel la Yuda pɛɛntɛɛnreba la kaahɛ tagurega, ge nya digera Pilistidoma wa tara tara paɛ Gat teŋa ta paɛ Ekron nayahe nɔɔrɛn. Te ban ko Pilistia sɛba la gan'an bala Saaraim sore zuo paɛ Gat la Ekron teŋhe ha. 53Israeldoma n ze'ele Pilistidoma dika la poan lebe na, ba nya va Pilistidoma tiiheŋɔ zen'an la lɔgɔrɔ la. 54Te David dekɛ Pilistia paŋadaana wa zuo la tare wa'an Yerusalem teŋa poan na, ge dekɛ a zaba lɔgɔrɔ la ta biŋe a mɛŋa sogorɛ deo poan. 55Saul n nyɛ ne te David ye' ne yɛhera te a ta zabɛ la Pilistia wa la, a yele ne la Abner n de zaba nɛŋadaana la yeti, Abner, ane dayɔa n de bonbilipaalega kana wa? Te Abner lerege en yeti, Naa naba, mam ze' mɛ wa. Mam ka mi'. 56Te naba la yele en yeti, Soke baŋɛ se'em bia n de ka. 57David n ko' Pilistia la ba'ahɛ lebe na la, te Abner tare en te a zanla Goliat zuo la a nu'uhen, te a tare en paɛ Saul nɛŋan na. 58Te Saul soke en yeti, Ane dayɔa n de hom? Te a lerege yeti, Mam dela ho yameŋa Yesse n de Betlehem teŋa nɛra la dayɔa.

will be added

X\