1 Samuel 16

1Te Na'ayenɛ yele Samuel yeti, Ho yeti ho kele bo Saul wa yuue la wane? Mam n zagahɛ n te a kan dɛna Israel naba. Perɛ ho iilɛ la la kaam yehe te n tom hɔ Betlehem teŋa boraa Yesse zen'an. Mam mɛŋa n loe naba a dayɔɔhe la poan. 2Ge Samuel soke yeti, N yeti n eŋɛ la wane keŋɛ? Saul han wom dena wa, mam ki mɛ n bala. Te Na'ayenɛ yeti, Nyɔkɛ nagasarega paɛ yeti, n wa'ana te n kaanbɛ la Na'ayenɛ. 3La ho yi' Yesse te a wa'an kaanbegɔ la poan na, te n pa'alɛ hom n wan eŋɛ se'em sɔ' se'em te n wan loe bo ho la kaam la bo mam. 4Samuel doohe Na'ayenɛ nɔɔrɛ la. En wa'an Betlehem teŋa poan na, te teŋa la kema yehe to'oha en na la dabeem, sɔkera en yeti, Ho kene la ho mɛŋa na wa? 5A lerege yeti, Ɛɛn. Kɔ'ɛ ya yam ge n ye na te n kaanbɛ la Na'ayenɛ. Bala, maahom ya mɛhe doohe mam keŋɛ kaanbegɔ zen'an la. Ge te a maahom Yesse la a dayɔɔhe la te ba wa'an kaanbegɔ la poan na. 6Ban paɛ na te a behɛ Yesse dayɔa Eliab la, a yele a mɛŋa yeti, Ho ka nyɛ, Na'ayenɛ mɛŋa n sɔ' se'em la n wana zɛ'a Na'ayenɛ nɛŋan wa. 7Te Na'ayenɛ yele Samuel yeti, Da behera a soŋa la bii a naanɛ la te a wɔgɛ zɛ'a se'em la. Mam ka loe en. Na'ayenɛ ka behere wo nɛresaala n behere se'em la. Nɛresaala behere la yeŋa, ge Na'ayenɛ behere la suunre poan. 8Yesse yi' Abinadab, te a wa'ana doohe Samuel nɛŋan tole. Te Samuel yeti, Na'ayenɛ ka loe ena. 9Yesse bahɛ te Sammah wa'ana doohe Samuel nɛŋan tole. Te Samuel yeti Na'ayenɛ ka loe ena me. 10Yesse yi' a dayɔɔhe seyopɔe la, kayena, kayena, te se woo wa'ana doohe Samuel nɛŋan tole, te Samuel yele Yesse yeti, Na'ayenɛ ka loe sena wa poan ayema. 11Te a nya soke Yesse yeti, Ho dayɔɔhe la zan'an n wana? Yesse yeti, La gee la kayena. Kaŋa n de yebega ba woo poan, ge ka behere la piihe bɔn'en ha. Samuel yeti, Tom te ba ta tare en na. N kan zin'ire teŋa, han dagana ka paɛ mɛ na. 12Te Yesse tom te ba tare bia la na. Bia wa dɛna mɔlega te ka nini ku'e, te ka som. Na'ayenɛ nya yeti, Ihege sɔ' en la kaam te kaŋa n bala. 13Te Samuel dekɛ iilɛ la te kaam bɔna de poan la, sɔ' bia wa, ka keendoma la nɛŋan. Te Na'ayenɛ Sea paŋa sige David zuo zo'e zo'e de daarɛ la kɔ'ɔn yɛ'ɛha. Samuel nya yehe yɛ'a lɛbera Aramah teŋa. 14Na'ayenɛ Sea paŋa la nya bahɛ Saul mɛ, ge te Na'ayenɛ bahɛ te sebe'a tee kɛn' en nameha en. 15Saul yamehe ta yele en daarɛ deyema yeti, Ho mi' te Na'ayenɛ bahɛ te sebe'a nameha hɔ. 16Bala to daana bahɛ te ho yamehe wa n behere wa ɛ nɛra se'em n mi' kɔnlɔgɔ ŋmɛ'a na. Te sebe'a la han sige ho zuo na te ka namehɛ hɔ, nɛra la wan ŋmɛ'ɛra kɔnlɔgɔ la te la ana ho lama lama. 17Te Saul bo a yamehe wa sore yeti, Ɛ ya se'em n mi' kɔnlɔgɔ ŋmɛ'a na bo mam. 18A tontoneba la ayema lerege yeti, Mam mi' Betlehem teŋa boraa Yesse dayɔa n ta'an kɔnlɔgɔ ŋmɛ'ɛra soŋa. Ka kpe'em mɛ, dɛna pɛɛntɛɛnra, tara yam ka yetɔgom poan, te Na'ayenɛ nu'o paga ka zuo. 19Bala te Saul tom nɛreba te ba ɛɛa yele Yesse yeti, Bahɛ te ho dayɔa David la n behere ho piihe la wa'an n zen'an na. 20Te Yesse ihege lo' boŋa, dekɛ boroboro la daam talaŋa la pebila lo' pagalɛ boŋa la zuo tom a dayɔa David te a tare ta bo Saul. 21David paɛ Saul zen'an na, kɛn' Saul tooma poan te Saul nini tegɛ la en, te a bahɛ te a ziira a zaba lɔgɔrɔ. 22Saul nya tom sɔɔleŋa bo Yesse ha yeti, Mam suunre n kɛn' la ho dayɔa la. Bala bahɛ te ka bɔna la mam. 23Te sebe'a sɛka te Na'ayenɛ bo fole te ka nameha Saul la, ne han sige Saul zuo na, David ne dekɛ la a kɔnlɔgɔ ŋmɛ', te la ne ana Saul lama lama. Te sebe'a la ne yehe ge bahɛ Saul.

will be added

X\