1 Samuel 11

1Ammon teŋa naba Nahas la a pɛɛntɛɛnreba wa'ana gum Yabes Gilead teŋa kae te ba zabɛ la ka. Te teŋa wa boraahe zan'an wa'ana yele naba Nahas wa yeti, Eŋɛ nɔɔrɛ la tɔ te to dɛna ho yamehe. 2Ge Ammon teŋa naba wa yele ba yeti, Mam wan eŋɛ nɔɔrɛ la ya sɔrɔɔ seko poan dela, n doohe kpegɛ nɛra woo zuɔ niho bahɛ, la n diihe Israel vi. 3Yabes keendoma yele en yeti, Bo to dabeha ayopɔe te to bahɛ te yele wa paɛ Israel zen'an woo. Te nɛra han ka bɔna wan to'e to bahɛ, to wan dekɛ to mɛhe bo ho. 4Mɔɔleba mɔɔlɛ n ta paɛ Saul teŋa Gibea poan na mɔɔlɛ yele wa bahɛ nɛra woo toberɛn te nɛra woo kaahɛ tagurega. 5Bala ma'an te Saul ze'ele la bɔn'en dɔɔra na la a lɔlehe. Nya a sokera yeti, Bene n eŋɛ? Wane te nɛra woo kaaha bala? Te ba yele en Yabes buuri la n tare yelese'ere wa'ana mɔɔlɛ bo ba la. 6Saul n wom yele la ba'ahɛ la, te Yenɛ Sea perɛ en la paŋa, te a suunre nyie gaŋɛ. 7A nyɔkɛ a lɔlehe seyi' la te a yɔgɛ la ko' ŋma' tɔnrɛ nɛra woo ge yeti, Hom se'em n ka yehe na doohe Saul la Samuel poore, la wan eŋɛ hɔ wo lɔlehe wa. Te Na'ayenɛ dabeem kɛn' nɛreba la zan'an te ba woo eŋɛ nɔyenɛ yehe na. 8Saul n kaanlɛ ba Bezek teŋa poan, te Israel boraahe wa kanlɛ dɛna tuha kɔbehe setan', te borase'ehe n yehe Yuda teŋa na dɛna boraahe tuha pihitan'. 9Ba nya yele se'em n wa'ana mɔɔlɛ yele la yeti, Lebe ta yele Yabes Gileaddoma yeti, beere, wontɛɛŋa ta tulugera la te ya nyɛ ya faanrɛ. Mɔɔleba la n lebe ta yele Yabes teŋadoma la, ba woo nyeene mɛ. 10Yabes buuri wa nya pan'aha Ammondoma wa yeti, Beere to wan dekɛ to mɛhe bo ya te ya eŋɛ tɔ yamam bote se'em. 11Yiimbeere te Saul yelehe a nɛreba la tansuga atan'. Te bolika te ba bibige Ammondoma tiiheŋɔ la poan na, kɔrom ba tara tara te wontɛɛŋa ta tulugɛ. Te Ammondoma sɛba n peɛn la yeregɛ zɔ mɛlom te ba nɛra ka bɔna dɔla a tadaana poore. 12Te nɛreba la nya yɛta Samuel yeti, Bane n daa yeti, Saul wan ta'an beha tomam yoi' la? Tare ya ba na bo to te to ko ba. 13Ge Saul yeti, Nɛra ka koore zina. Se'ere n sɔe Na'ayenɛ bo Israel la faanrɛ zina. 14Samuel nya yele nɛreba la yeti, Wa'an ya na te to keŋɛ Gilgal la to ta malom bobe naba la. 15Te nɛreba la zan'an keŋɛ Gilgal teŋa poan ta ze'ele Na'ayenɛ nɛŋan to'e Saul te a dɛna ba naba. Bilam te ba nya kaanbɛ sunma'ahom bo'olom bo Na'ayenɛ, ge te Saul la nɛreba la zan'an nyeena la taaba.

will be added

X\