1 Pɩyɛɛrɩ 5

1N kan'ane yamam sɛba n de keema wo mam me n de se'em la. Mam n de se'em n daa nyɛ' la n nini Krista n daa namehegɔ. N me wan lagom ta nyɛ' na'ahegɔ sɛko n wan nɛɛ na la. 2Magahɛ wo duŋkeena n gure piihe se'em la, yamam me dɛna sɛba n wan gura nɛresɛba te Na'ayenɛ dekɛ bo ya la. Behera ya ba soŋa soŋa wo Na'ayenɛ sunboolom. Ge da behera ya ba wo ya ka bote ya behera ba me la. Da tone ya tooma la yɔɔrɔ ma'an zuo, ge ya tona mɛ la ya suunre zan'an zan'an. 3Da ete ya ba wo yamam dela nɛrekanreba la. Ge de ya sɛba n wan ton tona te ba wan behɛ tɔgɔha. 4Te Duŋkeema Nɛŋadaana la han ta nɛɛ na, ya wan to'e na'ahegɔ muŋa n wan bɔna wuuha. 5Dene me, yamam me bonbilipaalehe la sontii ya nana bonkɛgehe la. Ya zan'an sontii ya sirihe ya mɛhe zan'an zan'an la ya tona bɔ'ɔra taaba. Te ba golehɛ Yenɛ gɔŋɔ la yeti, Na'ayenɛ kɛhere sɛba n kɛhere la mɛ ge tara ninbɔn'ɔn bo sirihe mɛŋa doma la. 6Bala, sirihe ya mɛhe ge dekɛ ya mɛhe eŋɛ Na'ayenɛ se'em n gane zan'an nu'uhen. Bala, te a wan zɛnkɛ ya saazuo se'em ma'an te la sona te a zɛnkɛ ya. 7Yele ya en sɛla woo n daane ya. Te a dela se'em n tare ya a potɛn'ɛrɛ poan. 8De ya sɛba n wan maahom ya mɛhe, ge me tara ya mɛhe soŋa soŋa. Te ya diŋdaana se'em n de Sagona la eere kaara mɛ wo gbegenɛ n nyɛ' nɛreba tanha te a ko' se'em la. 9De ya sɛba n wan sɛ' ze'ele soŋa soŋa ya sakerɛ Yesu sore dɔlɔga la poan la ya da sakɛ bo ya Sagona la. Se'ere n sɔe la, ya mɛhe mi' te Yesu dɔlɔba sɛba woo me n boe teŋa wa zuo me nyɛte la namehe seto te yamam me nyɛta wa. 10Ge ya han ta namehɛ wana fiin wa, Na'ayenɛ n de zo'ohogɔ zan'an Yenɛ la ge yi' ya na te ya lagom ta nyɛ' pɛnka wuuha ya bɔŋa Krista poan ge me wan ta bahɛ ya te ya dɛna yelemɛŋɛrɛdoma. A wan ta bahɛ ya te ya sɛ' ze'ele soŋa soŋa ge bo ya paŋa ge me gorɛ ya te sɛla kan ta'an eŋɛ ya. 11Paŋa wan dɛna Yesu denɛ wuuha. Taarɛ. 12Ge gɔŋpeka wa te n golehɛ wa dela Silas se'em te mam mina te a dela to sɔɔn n de birikina la n de n gɔŋgoloha. N bote n soŋɛ ya mɛ te ya sɛ' ze'ele soŋa soŋa doohe la mam yele ya sɛla te n nyɛ' soŋa soŋa dela dena wa dela Na'ayenɛ zo'ohogɔ, sɛ' ya ze'ele ya dɛ poan. 13Ya sɔɔnrɔ sɛba n boe Babilon teŋa poan te Na'ayenɛ loe ba wo n loe yamam me se'em la po'ohere ya na. Mark se'em n wone te a dela n dayɔa la me po'ohere ya na. 14Po'ohɛ ya taaba wo sɔɔnrɔ Yesu sore dɔlɔga la poan la nɔŋerɛ. Na'ayenɛ wan bahɛ te ya sɛba woo n sakɛ bo Yesu Krista la tara sunma'ahom.

will be added

X\