1 Pɩyɛɛrɩ 4

1Krista daa nyɛ' namehegɔ te la woŋɛ en. Bala, la sontii yamam mɛhe mɛ sɛ' ze'ele kaŋkaŋɛ la ya tɛn'ɛha tɛn'ɛkoŋo mea me. Te n daa nyɛ' namehegɔ la zuo, se'emdaana n nyɛte namehegɔ te la wona en ka dekere a mea tona be'emtooma. 2Dene poan, nananawa yɛ'ɛha, la sontii ya bɔŋa teŋa wa zuo ana wo Na'ayenɛ sunboolom. Ge dagɛ asaala suunre n tɛn'ɛhɛ be'em se'em. 3Wonse'eren ha te ya daa nan ka sakɛ bo Yesu la, ya bɔŋa daa ane wo sɛba n ka sakɛ bo Yesu bɔŋa n ane se'em la. Ya daa dela yalomdoma, koŋkoma'ahom yoorodoma, daamnyuureba, dikanra la baga kaanbegɔ. 4Ge nananawa, la eŋɛ sɛba n ka sakɛ bo Yesu la pakerɛ la ban ka le nyɛ' te ya lagom la ba bɔna bɔŋsɛka n de be'em ge me ka tara vɔnrɛ la. Bala n sɔe, te ba toora ya la. 5Ba wan ta yele Na'ayenɛ se'em n maahom ne te a gankɛ sɛba n vɔe la sɛba n ki' la sɛla te ba eŋɛ. 6Bala n sɔe, te ba daa mɔɔlɛ yelesoma la me bo sɛba n daa ki' la. Ba dela sɛba te Na'ayenɛ gankɛ ba wo n wan gankɛ nɛra woo se'em la. Ba daa mɔɔlɛ yelesoma la bala bo ba te ba sɛɛhe poan, la ba me wan bɔna wo Na'ayenɛ n bo se'em la. 7Ge sɛla woo pɔnre ba'ahegɔ mɛ n bala. Dene poan la sontii ya tara ya mɛhe soŋa soŋa la ya maahom ya mɛhe la ya ta'an soha. 8Sɛla n gane zan'an dela ya nɔŋɛ taaba. Se'ere n sɔe la, nɔŋerɛ zuo te to dita suguru bɔ'ɔra taaba yɛla zo'e zo'e poan. 9To'e ya taaba ya yɛ' poan soŋa soŋa ge da nyɔna de zuo. 10Ya zan'an to'e Na'ayenɛ bo'olom woo n boe boyema la mɛ. Bala, yamam n de sɛba n wan tare Na'ayenɛ bo'olom la n boe yema yema la tona soŋora nɛresɛba me. 11Hon se'em n ta'an mɔɔla Na'ayenɛ yɛla, sontii ho mɔɔla dɛ bɔ'ɔra nɛreba ge hon se'em me n ta'an soŋora sontii ho tara paŋsɛka te Na'ayenɛ bo ho la soŋora nɛreba. Bala, te sɛla woo poan, Na'ayenɛ wan nyɛ' pɛnka yɛhera Yesu Krista se'em n tare na'ahegɔ la paŋa wuuha la zen'en. Taarɛ. 12N zɔ'sonɔ wa, da bahɛ ya te la eŋɛ ya pakerɛ la namehe seto te ya nyɛta la n makere ya behɛ wa. Da dekɛ ya dɛ te de ana wo de dela yeledin'inne n din' ya la. 13Ge ton tare ya popeelom te ya lagom nyɛta la namehe seto te Krista daa nyɛ' la. Bala, te ya wan ta tara popeelom a han ta nɛɛna te ba pɛngera en. 14Ba han toora ya Krista zuo, popeelom boe la zuo mɛ. Se'ere n sɔe la na'ahegɔ Sea la n dela Yenɛ Sea boe ya zuo mɛ. 15Ge ya han nyɛta namehegɔ te la dela ya dela nɛrekooreba zuo, bii nayigehe zuo, bii sɛba n sagom yele zuo, bii tɛn'ɛha nɛreba basɛba yɛla zuo, bala dagɛ ma'an. 16Ge ya han ton nyɛta namehegɔ la yan dole Yesu sore la zuo, da bahɛ ya te valom tara ya de poan. Ge ton ya bo Na'ayenɛ fara te ya dela sɛba n dole Yesu sore. 17Dabaherɛ la paɛ ya te Na'ayenɛ gankɛ nɛreba. A me yeti a gankɛ la a mea nɛreba la yia. Te la han pɔhera tomam sɛba n de a mɛŋa nɛreba la yia, ya tɛn'ɛhe te la wan ana la wane ba'ahegɔ poan bo nɛresɛba n ka sakɛ bo Na'ayenɛ yelesoma la? 18Ge Yenɛ gɔŋɔ la yeti, Ba han leregera tontɔɔdoma teŋa wa zuo, potɔpa la be'emdoma nya wan ana la wane? 19Bala, sɛba n nyɛte namehegɔ Na'ayenɛ sunboolom, sontii ba etesoŋɔ la poan, ba kɔ'ɔn dekɛ ba mɛhe zan'an zan'an bo se'em n naam ba la. Te a dela se'em n ete n biŋe a nɔɔrɛ la se'em daarɛ woo la.

will be added

X\