1 Pɩyɛɛrɩ 3

1Bala mea, yamam pɔgɔba me sontii ya nana ya sereba. Bala, te se'em sera han ka sakɛ bo Na'ayenɛ yetɔgom la, a wan sakɛ bo de yɛhera ya etegɔ poan ge dagɛ la ya yetɔgom poan. 2Se'ere n sɔe la, ba wan nyɛ' ya etegɔ de yelemɛŋɛrɛ ge tara na'ahegɔ se'em. 3Hon han dɛna pɔgɔsoŋa la kan dɛna zuo loa bii banhe bii lɔgɔsonɔ n wan bahɛ hɔ te ho behera soŋa. 4Pɔgɔsoŋa behere soŋa la n bo'ore Na'ayenɛ na'ahegɔ a suunre poan ge ana baanlam ge me sakɛ te a nana en la zuo. Dena wa n tare vɔnrɛ Na'ayenɛ nɛŋa. 5Bala, te yuuma yuuma pɔgɔhe la yuun da bɔna bo Na'ayenɛ. Ba yuun nam Na'ayenɛ ge me yuun nana ba sereba. 6Sarah n yuun ane bala la. A yuun nane a sera Abraham mɛ ge yuun yi'ira en te a daana. Te nananawa, ya dela a pɔyɔɔhe ya han eta soŋa, ge me ka zɔta dabeem la sɛla te ya eta. 7Yamam sereba me sontii ya bɔna la ya pɔgɔba yɛhera la yamam mi' ba te ba bɔŋa ana se'em la se'em. Bala, la sontii ya bɔ'ɔra ba na'ahegɔ. Se'ere n sɔe la, ba ka kpe'em wo boraahe n kpe'em se'em la. Na'ayenɛ wan bahɛ te bama la yamam lagom ta tara vom sebo n ka tare ba'ahegɔ a zen'en la. Ya han eta dena wa sɛla kan daana ya sohogɔ. 8Ba'ahegɔ poan, la sontii ya zan'an lagom tara nɔyenɛ la potɛn'yenɛ. Nɔŋɛ ya taaba wo sɔɔnrɔ Yesu sore dɔlɔga la poan la ge me ete ya sɛla n ane soŋa bɔ'ɔra taaba ge sirihe ya ya mɛhe bɔ'ɔra taaba. 9Se'em han eŋɛ ya be'em, da me lebehe ya en be'em. Le yɛ'ɛha, se'em me han kan' kan'be'o bo ya, da lebehe ya kan' kan'be'o me bo en, ge kan' ya kan'somɔ bo en. Se'ere n sɔe la, kan'somɔ dela sɛla te Na'ayenɛ biŋe a nɔɔrɛ te a bo ya n daa yi' ya na la. 10Yenɛ gɔŋɔ la poan yeti, Ya se'em n bote vom, ge bɔta te a di nyɛlom. Da dekɛ ho zɛleŋa tɔgɔra be'em, da dekɛ ho nɔgbanɛ pan'ahɛ. 11Yehe be'em poan, ge tona som. Ɛɛra sunma'ahom, dɔla sunma'ahom. 12Na'ayenɛ nini gan' tontɔɔdoma la zuo mɛ. A toba kelehe ba kaahega woo. Na'ayenɛ zaberɛ mɛ la be'emdoma. A toba kelehe ba kaahega woo. 13Nɛra boe wan ta'an daan ya, ya han kɔ'ɔn bɔta te ya tona sɛla n ana soŋa? 14Ge behɛ ya popeelom sebo te ya wan tara ba han pon namehɛ ya yɛhera ya tom sɛla n de ma'an zuo. Bala, da tare ya dabeem la nɛra se'em ge me da bahɛ ya te la daana ya. 15Bo'ore ya Yesu Krista na'ahegɔ ya suunre poan ge me dekɛ ya en te a dɛna ya Daana. De ya sɛba n wan bɔta daarɛ woo te ya lebehe se'emdaana n soke ya te ya pa'alɛ en te a bɔkɛ sɛla te ya sakɛ ya sunya poan gura la. 16Ge eŋɛ ya dɛ mɛ la na'ahegɔ etegɔ, ge me sirihe ya mɛhe de poan. Da eŋɛ yelese'ere n wan bahɛ te la daana ya potɛn'ɛra. Bala te valom wan nyɔkɛ sɛba n tɔgɔre sɛla n ka soŋa bɔ'ɔra ya yɛhera ya etesoŋɔ Krista sore dɔlɔga la poan la. 17Se'ere n sɔe la, la nyane ya namehɛ etesoŋɔ zuo wo Na'ayenɛ han bɔta de bala gana ba namehɛ ya yɛhera sɛla n dagɛ ma'an te ya tom. 18Te Krista mɛŋa n daa ki' la boyena zan'an zan'an nɛreba yelebe'ero zuo. A daa dela yelemɛŋɛrɛdaana ge sɔe ki' bo nɛresɛba n dagɛ yelemɛŋɛrɛdoma. A daa eŋɛ dena wa te a tare ya lebe la Na'ayenɛ zen'en. La ban n daa pon ko' Yesu la, ge Na'ayenɛ Sea daa bahɛ en te a vo'e mɛ. 19Sea poan a daa keŋɛ ta mɔɔlɛ Na'ayenɛ yɛla bo sɛɛhe sɛba te ba yu' la. 20Sebana dela nɛresɛba n yuun daa ka nane Na'ayenɛ nɔɔrɛ Noah saŋa ha la. Na'ayenɛ yuun din'inhe la suunre gura ba dabahese'a te Noah yuun kpa'ara ɔɔnrɔŋɔ la. Ge te la yuun da dela nɛreba banii la ma'an ɔɔnrɔŋɔ la poan n yuun nyɛ' faanrɛ ko'om la zuo. 21La dela ko'bona wa n wone te la dela sɛla te to yi'ira nananawa ko'om soa. Ko'om soa n faanre ya baha. Gee la dagɛ la sosɛka te nɛra sɔɔra te a dɛngerɔ yehe. Ge la dela nɔɔrɛ te to biŋera bɔ'ɔra Na'ayenɛ te a duuhe to be'em to suunre poan. Bo faanre to baha yɛhera la Yesu Krista n daa vo'e a kum poan la. 22Yesu Krista enŋa n bala n keŋɛ saazuo ha ta zin'an Na'ayenɛ zuɔ nu'o sɔna Na'ayenɛ soŋoreba woo la sɛla woo n boe saazuo ha la paŋa behera.

will be added

X\